អង្គការសុខភាពពិភពលោកប្រកាស “វិធានការបន្ទាន់” រួមគ្នាទប់ស្កាត់ចរាចរណ៍ឱសថមានផ្ទុកសារធាតុពុល
យោងតាមអង្គការសុខាភាពពិភពលោក ក្នុងរវាង៤ខែមកនេះ មានករណីស្លាប់កុមារចំនួនយ៉ាងហោច ជាង៣០០នាក់ ដែលបណ្តាលមកពីថ្នាំស៊ីរ៉ូក្អក ដែលមានសារធាតុពុល ផលិតនៅប្រទេសឥណ្ឌា។ ក្រោយការទាញសញ្ញាអាសន្នជាបន្តបន្ទាប់ តែដោយគ្មានប្រសិទ្ធភាព អង្គការសុខភាពពិភពលោកបានប្រកាសនៅថ្ងៃអង្គារ ទី២៤មករានេះ ដាក់ចុះនូវវិធានការបន្ទាន់ និងអំពាវនាវឲ្យរួមគ្នាសហការ រវាងវិស័យពាក់ព័ន្ធទាំងអស់ នៅតាមប្រទេសនីមួយៗ ដើម្បីទប់ស្កាត់ចរាចរណ៍ឱសថ ដែលមានផ្ទុកសារធាតុពុលដ៏គ្រោះថ្នាក់ទាំងនេះ។
ចុះផ្សាយនៅថ្ងៃ៖
ស្តាប់ - ០២:៣២
ក្នុងរវាង៤ខែមកនេះ មានប្រទេសយ៉ាងហោចចំនួន៧ ដែលបានជូនដំណឹងថាមានករណីស្លាប់កុមារ បន្ទាប់ពីបានផឹកស៊ីរ៉ូក្អកផលិតនៅប្រទេសឥណ្ឌា។ អាជ្ញាធរសុខាភិបាលប្រទេសហ្កំប៊ី ឥណ្ឌូណេស៊ី និងអ៊ូសបេគីស្ថាន ជាដើម បានជូនដំណឹងទៅកាន់អង្គការសុខភាពពិភពលោក ពីករណីស្លាប់កុមារ ដែលភាគច្រើនគឺមានអាយុក្រោម៥ឆ្នាំ។
យោងតាមដំណឹងដែលទទួលបាន គឺករណីស្លាប់កុមារ មានសរុបជាង៣០០នាក់ ដែលពាក់ព័ន្ធនឹងថ្នាំស៊ីរ៉ូក្អក ផលិតដោយក្រុមហ៊ុនឥណ្ឌា Marion Biotech និង Maiden Pharmarceuticals។ សារធាតុពុល២ប្រភេទ គឺ diéthylène glycol និង éthylène glycol ត្រូវបានគេរកឃើញនៅក្នុងថ្នាំស៊ីរ៉ូក្អកទាំងនេះ ក្នុងបរិមាណខ្ពស់ខ្លាំងណាស់។ យោងតាមអង្គការសុខភាពពិភពលោក សារធាតុគីមីដ៏គ្រោះថ្នាក់ទាំង២មុខនេះ ជាធម្មតាគេប្រើក្នុងឧស្សាហកម្ម ដើម្បីរំលាយ ឬទប់កុំឲ្យកក។ អ្នកជំនាញបន្ថែមថា មិនមានហេតុផលណាមួយ ដែលសារធាតុគីមី២មុខនេះ ត្រូវទៅនៅក្នុងថ្នាំទឹកស៊ីរ៉ូក្អក សម្រាប់កុមារនោះឡើយ ព្រោះវាគ្រោះថ្នាក់ខ្លាំងណាស់ ទោះលេបចូលក្នុងខ្លួនក្នុងបរិមាណតិចប៉ុណ្ណាក៏ដោយ។
អង្គការសុខភាពពិភពលោក បានទាញសញ្ញាអាសន្ន៣ដងហើយ នៅខែតុលាក្រោយប្រទេសហ្កំប៊ីជូនដំណឹង ក្រោយមកនៅខែវិច្ឆិកា ក្រោយករណីស្លាប់កុមារនៅឥណ្ឌូណេស៊ី ហើយចុងក្រោយបំផុតនៅដើមខែមករានេះ បន្ទាប់ពីបានដំណឹងពីប្រទេសអ៊ូសបេគីស្ថាន។ អង្គការសុខភាពពិភពលោក បានអំពាវនាវ ឲ្យអាជ្ញាធរពាក់ព័ន្ធទាំងអស់ នៅតាមប្រទេសនីមួយៗ រួមគ្នាបង្កើនការប្រុងប្រយ័ត្ន តាមដាន ស្វែងរក និងដកចេញពីចរាចរណ៍ទាំងអស់ នូវថ្នាំស៊ីរ៉ូក្អក ដែលផលិតដោយក្រុមហ៊ុនឥណ្ឌាទាំង២ខាងលើ។
នៅថ្ងៃអង្គារទី២៤មករា អង្គការសុខភាពពិភពលោក បានចេញសេចក្តីប្រកាស ដាក់ចុះនូវវិធានការបន្ទាន់ ដើម្បីឲ្យគ្រប់វិស័យពាក់ព័ន្ធ ទាំងអាជ្ញាធររដ្ឋ ទាំងបណ្តាញផ្គត់ផ្គង់ឯកជន ត្រូវតែរួមគ្នា ទប់ស្កាត់ឲ្យបាននូវចរាចរណ៍ឱសថដែលមានផ្ទុកសារធាតុពុល។ អាជ្ញាធររដ្ឋ ដែលមានតួនាទីសមត្ថកិច្ចត្រួតពិនិត្យគុណភាពឱសថ គឺត្រូវតែតានដានស្វែងរក ហើយដកចេញទាំងអស់ នូងឱសថដែលមិនគោរពតាមក្រិត្យក្រមគុណភាព។ ទន្ទឹមគ្នានេះ អាជ្ញាធរមានសមត្ថកិច្ច ត្រូវតែជូនដំណឹងបន្ទាន់មកកាន់អង្គការសុខភាពពិភពលោក ព្រមជាមួយនឹងការពិនិត្យដោយល្អិតល្អន់ ថាឱសថទាំងនោះ ត្រូវបានចែកចាយលក់ ដោយភ្នាក់ងារដែលបានទទួលអាជ្ញាបណ្ណត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ