ឥណ្ឌាអាចចេញបញ្ជាអាសន្ន ហាមឃាត់ការលក់និងនាំចេញថ្នាំស៊ីរ៉ូក្អកកុមារ ដែលមានផ្ទុកសារធាតុពុល
រដ្ឋាភិបាលឥណ្ឌា អាចនឹងចេញបញ្ជាអាសន្ន ហាមឃាត់ការលក់ចែកចាយ និងនាំចេញថ្នាំស៊ីរ៉ូក្អកកុមារ ផលិតដោយសហគ្រាសឥណ្ឌា ឈ្មោះ Marion Biotech។ នេះបើផ្អែកតាមការលើកឡើង របស់មន្ត្រីជំនាញម្នាក់ ដែលបានចូលរួមត្រួតពិនិត្យស្វែងរកសារធាតុពុល ដែលមាននៅក្នុងថ្នាំស៊ីរ៉ូក្អកនេះ។ សូមបញ្ជាក់ថា យោងតាមអង្គការសុខភាពពិភពលោក យ៉ាង ហោចណាស់ មានកុមារជាង៣០០នាក់ នៅតាមប្រទេសមួយចំនួន ដែលបានស្លាប់បន្ទាប់ពីបានផឹកថ្នាំស៊ីរ៉ូក្អក ផលិតដោយសហគ្រាសឥណ្ឌាចំនួន២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
នៅថ្ងៃទី៣មីនា នគរបាលឥណ្ឌា បានចាប់ខ្លួនបុគ្គលិក៣នាក់ របស់សហគ្រាសផលិតឱសថ Marion Biotech ព្រមទាំងកំពុងតែស្វែងរកចាប់ខ្លួន នាយកធំ២នាក់ទៀត របស់សហគ្រាសនេះ។ ការចាប់ខ្លួន ដែលត្រូវបានធ្វើឡើង បន្ទាប់ពីអាជ្ញាធរគ្រប់គ្រងគុណភាពឱសថឥណ្ឌា បានបើកការស៊ើបអង្កេត ត្រួតពិនិត្យឃើញថា នៅក្នុងសំណាកថ្នាំស៊ីរ៉ូក្អកចំនួន៣៦ របស់សហគ្រាសនេះ គឺមាន២២ ដែលមានផ្ទុកដោយសារធាតុពុល។
លោក Vaibhav Babbar មន្ត្រីស៊ើបអង្កេតឥណ្ឌា ដែលចូលរួមក្នុងប្រតិបត្តិការនេះ បានអះអាងប្រាប់បណ្តាញ ព័ត៌មាន Reuters ថា គេពិតជាបានរកឃើញសារធាតុពុល ប្រភេទ diéthylène glycol និង éthylène glycol ក្នុងបរមាណច្រើនលើសកម្រិត នៅក្នុងថ្នាំស៊ីរ៉ូក្អករបស់ សហគ្រាស Marion Biotech។
អ្នកជំនាញឥណ្ឌា ដែលបានចូលរួមត្រួតពិនិត្យរោងចក្រផលិតឱសថ Marion Biotech ចំនួន៤ដងរូបនេះ បានលើកឡើងថា វាគឺជារឿងល្អប្រសើរណាស់ ប្រសិនបើរដ្ឋាភិបាលឥណ្ឌា ចេញបញ្ជាអាសន្នក្នុងពេលដ៏ឆាប់នេះ ដើម្បីទប់ស្កាត់ករណីស្លាប់កុមារ។ លោកអះអាងថា ថ្នាំស៊ីរ៉ូក្អករបស់សហគ្រាសនេះ គឺមាននាំចេញទៅលក់នៅប្រទេសកៀជីគីស្ថាន និងប្រទេសកម្ពុជាផងដែរ។
យ៉ាងណាក៏ដោយ គិតត្រឹមពេលនេះ បណ្តាញព័ត៌មាន Reuters មិនអាចទទួលបានការបញ្ជាក់ណាមួយ ពីក្រសួងសុខាភិបាលឥណ្ឌាឡើយ។ ការចេញបញ្ជាអាសន្នពីរដ្ឋាភិបាល អាចនឹងជំរុញឲ្យអ្នកលក់ ដកថ្នាំស៊ីរ៉ូដែលមានបញ្ហាចេញទីផ្សារ បើទោះបីជាពុំមានទណ្ឌកម្មផ្លូវច្បាប់ក៏ដោយ។
សូមបញ្ជាក់ថា កាលពីខែមករាឆ្នាំ២០២៣ អង្គការសុខភាពពិភពលោកបានប្រកាសថា ក្នុងឆ្នាំ២០២២ មានកុមារយ៉ាងហោចជាង៣០០នាក់ បានស្លាប់ដោយមានបញ្ហាខូចក្រលៀនធ្ងន់ធ្ងរ បន្ទាប់ពីពួកគេបានផឹកថ្នាំស៊ីរ៉ូក្អក ផលិតដោយសហគ្រាសឱសថ២របស់ឥណ្ឌា គឺ Marion Biotech និង Maiden Pharmaceuticals។ ក្នុងចំណោមកុមារដែលស្លាប់ ភាគច្រើនអាយុខ្ទង់៥ឆ្នាំ មានប្រមាណ៧០នាក់នៅប្រទេសហ្កំប៊ី ១៩នាក់នៅអ៊ូសបេគីស្ថាន និងនៅតាមប្រទេសមួយចំនួនដូចជាឥណ្ឌូណេស៊ី ជាដើម។
អង្គការសុខភាពពិភពលោក បានទាញសញ្ញាអាសន្ន ប្រាប់ទៅគ្រប់ប្រទេសឲ្យបង្កើនការប្រុងប្រយ័ត្ន ត្រួតពិនិត្យតាមដានគុណភាពឱសថប្រភេទនេះ។ អង្គការនេះអះអាងថា ថ្នាំស៊ីរ៉ូក្អកសម្រាប់ក្មេង ដែលផលិតដោយសហគ្រាសរបស់ឥណ្ឌាទាំង២នេះ ត្រូវបានគេនាំយកទៅលក់ នៅប្រទេសមួយចំនួន ដូចជា ហ្វ៊ីលីពីន ទីម័រខាងកើត សេណេហ្កាល់ និងកម្ពុជា ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ