អូស្ត្រាលីចេញច្បាប់តឹងតែង ដើម្បីទប់ស្កាត់ការជក់បារីអេឡិចត្រូនិក
អូស្ត្រាលី គឺជាប្រទេសដែលមានច្បាប់យ៉ាងតឹងតែង និងមុនគេបង្អស់មួយ ដើម្បីទប់កាត់ការញៀនបារី និងថ្នាំជក់។ តែយ៉ាងណា រដ្ឋាភិបាលអូស្ត្រាលី បានសង្កេតឃើញរបត់ថ្មីដ៏គ្រោះថ្នាក់មួយទៀត ជាពិសេសសម្រាប់យុវជនវ័យក្មេង នោះគឺការឈ្លក់វង្វេងនាំគ្នាជក់បារីអេឡិចត្រូនិក។ កាលពីថ្ងៃអង្គារ ទី២ឧសភា ក្រសួងសុខាភិបាលអូស្ត្រាលីបានប្រកាសពីវិធានការថ្មីបន្ថែមទៀត ដើម្បីហាមឃាត់ការប្រើប្រាស់បារីអាឡិចត្រូនិក ប្រសិនបើគ្មានវេជ្ជបញ្ជាពីគ្រូពេទ្យទេនោះ។
ចុះផ្សាយនៅថ្ងៃ៖
ស្តាប់ - ០២:៣៩
លោក Mark Butler រដ្ឋមន្ត្រីក្រសួងសុខាភិបាលអូស្ត្រាលី បានលើកឡើងថា ឧស្សាហកម្មផលិតបារី និងថ្នាំជក់ មានចេតនាចង់ធ្វើឲ្យយុវជនអូស្ត្រាលីជំនាន់ក្រោយ ក្លាយមនុស្សញៀននឹងសារធាតុនីកូទីន។ លោកបានបន្ថែមថា ការជក់បារីអេឡិចត្រូនិក កំពុងតែក្លាយជាបញ្ហាសង្គមមួយ ដែលមិនអាចប្រហែសបាន ព្រោះវាកំពុងតែចូលជ្រាបដល់ក្នុងសាលាវិទ្យាល័យ និងមានខ្លះនៅតាមសាលាបឋមសិក្សាផង។
យោងតាមលោករដ្ឋមន្ត្រី គឺឧស្សាហកម្មផលិតបារីអាឡិចត្រូនិក បានប្រើប្រាស់សារធាតុនីកូទីនគីមី លាយជាមួយនឹងសារធាតុគីមីផ្សេងទៀត ធ្វើឲ្យមានក្លិនក្រអូបប្លែកៗ អមជាមួយនឹងរូបរាងបារីដែលមានពណ៌ស្អាត ទាក់ទាញក្មេងៗ យុវជនឲ្យឈ្លក់វង្វេង។ លោក Mark Butler បានអះអាងថា បារីអេឡិចត្រូនិក ត្រូវបានគេអួតថា ផលិតឡើងដើម្បីជួយមនុស្សដែលញៀនបារីថ្នាំជក់ ឲ្យបោះបង់ចោលបន្តិចម្តងៗ នូវការជក់បារី។ តែផ្ទុយទៅវិញ ឧស្សាហកម្មនេះបានដាក់បញ្ចូលសារធាតុញៀនផ្សេងទៀតទៅក្នុងបារីអេឡិចត្រូនិក ហើយមិនត្រឹមតែប៉ុណ្ណោះ បានសំដៅទាក់ទាញក្មេងៗ យុវជនឲ្យទិញវាជក់ថែមទៀត។
អំណេះតទៅ រដ្ឋាភិបាលអូស្ត្រាលីនឹងមានវិធានការថ្មី រិតបន្តឹង ដោយហាមឃាត់ការទិញបារីអេឡិចត្រូនិកទាំងអស់ ប្រសិនបើគ្មានវេជ្ជបញ្ជាចេញដោយគ្រូពេទ្យទេនោះ។ បន្ថែមពីនេះ ពន្ធលើថ្នាំជក់ នឹងត្រូវដំឡើងចំនួន៥% ក្នុងមួយឆ្នាំ នៅរវាង៣ឆ្នាំតទៅមុខ ដើម្បីទាញទំលាក់ការលក់ថ្នាំជក់នៅអូស្រ្តាលី។
គួររំលឹកថា អូស្ត្រាលីជាប្រទេសមុនគេបង្អស់ នៅឆ្នាំ២០០២ ដែលបានចេញច្បាប់ដាក់កំហិត ឲ្យប្រើប្រាស់តែ « កញ្ចប់បារីអព្យាក្រិត្យ » ពោលគឺមិនដាក់ឈ្មោះម៉ាក ឬមានពណ៌អ្វីទាក់ទាញទេ។ កញ្ចប់បារីអព្យាក្រិត្យអាចភ្ជាប់ជាមួយដោយរូបថត និងសាររំលឹកពីគ្រោះថ្នាក់មកលើសុខភាព។ វិធានការនេះត្រូវបានប្រទេសជាច្រើនយកគំរូតាម។
មិនត្រឹមតែប៉ុណ្ណោះ រដ្ឋអូស្រ្តាលីយកពន្ធច្រើនណាស់ លើបារីថ្នាំជក់។ នៅអូស្ត្រាលី បារីថ្នាំជក់មួយកញ្ចប់មានតម្លៃខ្ទង់៥០ដុល្លារអូស្ត្រាលី។ ដោយសារតែវិធានការតឹងតែងទាំងអស់នេះ នៅអូស្ត្រាលីមានកម្រិតញៀនថ្នាំជក់ទាបបំផុត។ ក៏ប៉ុន្តែ យោងតាមវិទ្យាស្ថានអូស្ត្រាលីដើម្បីសុខមាលភាព គឺប៉ុន្មានឆ្នាំចុងក្រោយនេះ ចំនួនមនុស្សវ័យក្មេងអាយុក្រោម២៥ឆ្នាំ ដែលជក់បារី បានកើនឡើងគួរឲ្យព្រួយបារម្ភ។ Andrew Kohn អ្នករស់នៅទីក្រុងស៊ីដនី អាយុ៣១ឆ្នាំម្នាក់ បានអះអាងប្រាប់អ្នកកាសែតបារាំងថា រៀងរាល់ពេលដែលគេដើរកាត់មុខសាលារៀន ពេលម៉ោងឈប់សម្រាក គឺប្រាកដជាឃើញក្មេងៗសិស្សសាលា ជុំគ្នាបង្ហុយផ្សែងបារីអាឡិចត្រូនិក សឹងតែគ្រប់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ