លោកចន ឃែរី ថ្លែងប្រាប់លោកវ៉ាង យី ថាវិបត្តិអាកាសធាតុគឺជាបញ្ហាសកល ហើយគំរាមកំហែងមនុស្សជាតិទាំងមូល
លោកចន ឃែរី ប្រេសិតពិសេសរបស់សហរដ្ឋអាមេរិក ទទួលបន្ទុកកិច្ចការអាកាសធាតុ កំពុងតែស្ថិតនៅទីក្រុងប៉េកាំងប្រទេសចិន។ បន្ទាប់ពីបានជួបជាមួយមន្ត្រីចិនទទួលបន្ទុកកិច្ចការអាកាសធាតុ លោក ចន ឃែរី បានជួបជាមួយលោក វ៉ាង យី មន្ត្រីជាន់ខ្ពស់ចិន ទទួលកិច្ចការបរទេស នៅព្រឹកថ្ងៃអង្គារនេះ នៅឯវិមានប្រជាជនចិនក្នុងទីក្រុងប៉េកាំង។
ចុះផ្សាយនៅថ្ងៃ៖
គួរបញ្ជាក់ ទំនាក់ទំនងការទូតរវាងចិន និងសហរដ្ឋអាមេរិក កំពុងស្ថិតនៅក្នុងដំណាក់កាលមួយដ៏តានតឹង ប្រឈមមុខដាក់គ្នាសឹងគ្រប់វិស័យទាំងអស់។ លោកចន ឃែរី បានឆក់យកឱកាសនេះ អំពាវនាវឲ្យ ចិន និងអាមេរិក បើកទំព័រថ្មីនៃទំនាក់ទំនងសហប្រតិបត្តិការ ជាពិសេសនៅក្នុងយុទ្ធនាការប្រយុទ្ធប្រឆាំងនឹងវិបត្តិអាកាសធាតុ ដែលជាបញ្ហាសកលបន្ទាន់បំផុត។
សម្រង់សំដីលោក ចន ឃែរី ថ្លែងនៅពេលជួបលោកវ៉ាង យី នៅប៉េកាំង ថ្ងៃទី១៨កក្កដា២០២៣
លោក ចន ឃែរី ៖ “ខ្ញុំសង្ឃឹមថា ជំនួបប្រជុំនៅពេលនេះ នឹងគូសវាសចំណុចចាប់ផ្តើមនិយមន័យថ្មី នៃទំនាក់ទំនងសហប្រតិបត្តិការ ព្រមទាំងសមត្ថភាពរបស់យើង ក្នុងការដោះស្រាយវិបត្តិទាស់ទែងទាំងឡាយ ដែលយើងមានរវាងគ្នា។ យើងទាំង២ដឹងច្បាស់ ថាពិតជាមានទំនាស់តទល់គ្នា។ ក៏ប៉ុន្តែយើងទាំង២ក៏ដឹងច្បាស់ដែរថា តាមរយៈបទពិសោធន៍ នៅពេលណាយើងប្រឹងប្រែង មានចេតនាពិត នោះយើងពិតជាអាចរកដំណោះស្រាយបាន។ ពិភពលោកទាំងមូល កំពុងសំឡឹង និងរំពឹងយ៉ាងខ្លាំងមកលើភាពជាមេដឹកនាំ របស់យើងទាំង២ ដើម្បីប្រយុទ្ធប្រឆាំងនឹងវិបត្តិអាកាសធាតុ។ វិបត្តិអាកាសធាតុ ដូចអ្នកដឹងហើយ ថាវាគឺជាបញ្ហារបស់ពិភពលោកយើងទាំងមូល វាមិនមែនជាបញ្ហាទ្វេភាគីនោះទេ។ វាគឺជាការគំរាមកំហែង មកលើមនុស្សជាតិយើងទាំងមូលតែម្តង។”
គួរបញ្ជាក់ដែរថា ចិន និងអាមេរិក គឺជាប្រទេសធំជាងគេទាំង២ ដែលបញ្ចេញឧស្ម័នកាបូនិកច្រើនជាងគេបង្អស់។ តែយ៉ាងណា បញ្ហាទំនាស់ ការប្រជែងគ្នា និងការប្រចាំគ្នា រវាងមហាអំណាចសេដ្ឋកិច្ចទាំង២នេះ បានធ្វើឲ្យដំណើរការកាត់បន្ថយការបញ្ចេញឧស្ម័នកាបូនិក ត្រូវដើរយ៉ាងយឺត។ ក្នុងពេលជួបគ្នាជាមួយលោកចន ឃែរី លោកវ៉ាង យី បានលើកឡើងថា ដើម្បីពង្រឹងសហប្រតិបត្តិការរវាងប្រទេសទាំង២ ស្តីពីបម្រែបម្រួលអាកាសធាតុ គឺចាំបាច់ត្រូវតែកសាងទំនាក់ទំនងរវាងចិននិងអាមេរិក ឲ្យក្លាយជាទំនាក់ទំនង ដែលស្អាតបរិសុទ្ធ មានស្ថិរភាព មាននិរន្តរភាព។
នៅលើបណ្តាញTwitter លោកចន ឃែរី បានសរសេរថា ចិន និងអាមេរិក ត្រូវតែដាក់ចុះនូវវិធានការរួមគ្នាជាបន្ទាន់ ក្នុងសំណុំរឿងអាកាសធាតុ តួយ៉ាងទាក់ទិននឹងការកាត់បន្ថយផ្សែងពុល ដែលកើតចេញពីចំហេះធ្យូងថ្ម និងឧស្ម័នម៉េតាន។ លោកបន្ថែមថា វិបត្តិអាកាសធាតុសកល ដាក់កំហិតឲ្យមហាអំណាចធំៗទាំង២ ត្រូវតែចាប់ដៃគ្នាធ្វើការ ដើម្បីទប់ស្កាត់ការឡើងសីតុណ្ហភាពផែនដី។
ដោយឡែក កាលពីថ្ងៃអាទិត្យកន្លងទៅ លោក Jake Sullivan ទីប្រឹក្សាសន្តិសុខជាតិអាមេរិកបានថ្លែងតាមទូរទស្សន៍ CNN ថា ចិនមិនអាចជ្រកពីក្រោយពាក្យថា “ចិនជាប្រទេសកំពុងអភិវឌ្ឍន៍” ដើម្បីគេចវេសពីកាតព្វកិច្ចក្នុងការកាត់បន្ថយការបញ្ចេញឧស្ម័នកាបូនិក បានតទៅទៀតទេ។ ប្រទេសទាំងអស់ រាប់ទាំងចិនផង គឺមានកាតព្វកិច្ច ត្រូវតែចូលរួមកាត់បន្ថយការបញ្ចេញឧស្ម័នពុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ