សមាជិកព្រឹទ្ធសភាអាមេរិក Chuck Schumer ដឹកនាំគណៈប្រតិភូទៅចិន ដើម្បីស្តារទំនាក់ទំនង
ស្ថិតក្នុងកម្មវត្ថុស្វែងរកការស្រុះស្រួល និងការយល់យោគគ្នា រវាងចិននិងសហរដ្ឋអាមេរិក លោក Chuck Schumer ប្រធានក្រុមសមាជិកព្រឹទ្ធសភា បក្សប្រជាធិបតេយ្យ បានដឹកនាំគណៈប្រតិភូ ទៅដល់ទីក្រុងសៀងហៃ កាលពីថ្ងៃរសៀលថ្ងៃសៅរ៍ទី៧កក្កដា។ គណៈប្រតិភូសមាជិកព្រឹទ្ធសភាអាមេរិក សង្ឃឹមផងដែរថានឹងអាចទៅជួបលោកប្រធានាធិបតីចិន ស៊ី ជីនពីង នៅទីក្រុងប៉េកាំង ដើម្បីនិយាយអំពីការស្តារទំនាក់ទំនង រវាងមហាអំណាចទាំង២ ដែលកាន់តែល្អក់កករ មិនថាលើវិស័យសេដ្ឋកិច្ចពាណិជ្ជកម្ម និងវិស័យការទូត។
ចុះផ្សាយនៅថ្ងៃ៖
ស្តាប់ - ០៣:២៨
អមដំណើរដោយលោក Mike Crapo សមាជិកព្រឹទ្ធសភាប្រធានក្រុមបក្សសាធារណៈ គណៈប្រតិភូអាមេរិក ត្រូវបានទទួលស្វាគមន៍ដោយ លោកឯកអគ្គរដ្ឋទូតសហរដ្ឋអាមេរិក Nicolas Burns។ លោក Chuck Schumer បានបញ្ជាក់ប្រាប់អ្នកកាសែតថា លោកសង្ឃឹមថានឹងអាចជជែកជាមួយភាគីចិន នៅក្នុងន័យស្ថាបនា។
ដោយឡែក ក្រសួងការបរទេសចិនវិញបានឲ្យដឹងថា តាមរយៈជំនួបនេះគឺគេសង្ឃឹមថាភាគីអាមេរិក នឹងបានយល់ច្បាស់អំពីចិន ហើយឈប់យល់ច្រលំមកលើចិនតទៅទៀត។ យ៉ាងណាក៏ដោយភាគីចិន សូមស្វាគមន៍ចំពោះកាយវិការ និងឆន្ទៈក្នុងការជួបជជែកគ្នា ដែលភាគីអាមេរិកខិតខំធ្វើដំណើរមកពីឆ្ងាយ។
ពេលទៅដល់ក្រុងសៀងហៃ នៅរសៀលថ្ងៃសៅរ៍ គណៈប្រតិភូសមាជិកព្រឹទ្ធសភាអាមេរិក ត្រូវបានទទួលជួបស្វាគមន៍ ដោយលោក Chen Jining តំណាងខ្ពស់បំផុត នៃគណបក្សកុម្មុយនីស្តចិន ប្រចាំក្រុងសៀងហៃ។ ក្នុងឱកាសនោះ លោក Chuck Schumer បានលើកឡើងអំពីបញ្ហាជាច្រើនចំណុច ដែលចិននិងសហរដ្ឋអាមេរិក កំពុងប្រឈមមុខដាក់គ្នា។ យ៉ាងណាមិញ លោកបានប្រាប់ទៅភាគីចិនថា ក្រុមហ៊ុនអាមេរិក ដែលមករកស៊ីនៅចិនបានលើកឡើងកាន់តែញឹកញាប់ អំពីការលំបាកនៅក្នុងការធ្វើជំនួញ ព្រមទាំងបញ្ហាខ្វះសមភាពដោយប្រៀបធៀបទៅក្រុមហ៊ុនក្នុងស្រុករបស់ចិន។ ផ្អែកតាមសភាពាណិជ្ជកម្មអាមេរិកប្រចាំនៅចិន គឺក្រុមហ៊ុនអាមេរិកជាច្រើនកំពុងតែពិចារណា ងាកចេញទៅវិនិយោគនៅប្រទេសផ្សេងវិញ។
បន្ថែមពីនេះ លោក Chuck Schumer បានថ្លែងប្រាប់ដោយត្រង់ទៅភាគីចិនថា ក្រុមហ៊ុនចិនគឺជាអ្នកបង្កបញ្ហា នាំចូលសារធាតុញៀន ប្រភេទ Fentanyl ដែលបាននិងកំពុងតែបង្កឲ្យមានអ្នករងគ្រោះញៀនថ្នាំ ស្លាប់រាប់សិបនាក់ នៅសហរដ្ឋអាមេរិក។ លោកបញ្ជាក់ថា វាមិនមែនជាកំហុសរបស់រដ្ឋចិនទេ តែគឺលោកសំដៅទៅលើក្រុមហ៊ុនចិន។
គួរបញ្ជាក់ដែរថា ស្ថិតក្នុងសំណុំរឿងសារធាតុញៀន Fentanyl ដែលជាសារធាតុញៀនផ្សំដោយធាតុគីមីសំយោគ រដ្ឋាភិបាលអាមេរិក បានប្រកាសទណ្ឌកម្មកាលពីថ្ងៃអង្គារ ដោយបិទលែងឲ្យចូលក្នុងទីផ្សារហិរញ្ញវត្ថុអាមេរិក ទៅលើមនុស្ស និងនីតិបុគ្គលចំនួន២៨ ដែលមានប្រភពនៅចិន និងនៅកាណាដា។
គួររំលឹកដែរថា កាលពីខែឧសភា ក្រុមសមាជិកព្រឹទ្ធសភាអាមេរិក បានប្រកាសផែនការថ្មីមួយ ដើម្បីឈានទៅប្រយុទ្ធនឹងសកម្មភាពប្រើឥទ្ធិភពវាតទីរបស់ចិន នៅទូទាំងពិភពលោក។ ផែនការនេះ មានកម្មវត្ថុសំដៅកាត់បន្ថយការវិនិយោគនៅចិន ក្នុងវិស័យយុទ្ធសាស្ត្រមួយចំនួន តួយ៉ាងវិស័យបច្ចេកវិទ្យាទំនើប ព្រមទាំងធ្វើយ៉ាងណា ឲ្យចិនខ្លាចរអា កុំឈ្លានពានតៃវ៉ាន់។
ស្ថិតនៅក្នុងបរិបទ ស្វែងរកច្រកផ្លូវផ្សះផ្សារគ្នា រវាងមហាអំណាចទាំង២នេះដែរ នៅថ្ងៃសុក្រទី៦តុលា លោកចូ បៃដិន បានបញ្ជាក់ លោកអាចនឹងជួបប្រជុំទ្វេភាគី ជាមួយលោក ស៊ី ជីនពីង នៅក្នុងឱកាសជំនួបកំពូលអាស៊ីប៉ាស៊ីហ្វិក ហៅកាត់ថា ដែលនឹងត្រូវរៀបចំធ្វើនៅទីក្រុងសាន់ហ្វ្រាន់ស៊ីសកូ នៅពាក់កណ្តាលខែវិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ