លោកម៉ាក្រុងទៅពង្រឹងវត្តមានបារាំង នៅកាហ្សាក់ស្ថាន និងអ៊ូសបេគីស្ថាន
លោកប្រធានាធិបតីបារាំង អេម៉ានុយអែល ម៉ាក្រុង បានធ្វើដំណើរទៅដល់ទីក្រុង Astana រដ្ឋធានីកាហ្សាក់ស្ថាន នៅព្រឹកថ្ងៃពុធទី១វិច្ឆិកា។ ចេញពីកាហ្សាក់ស្ថាន លោកម៉ាក្រុង នឹងបន្តដំណើរទៅអ៊ូសបេគីស្ថាន នៅថ្ងៃព្រហស្បតិ៍។ នេះគឺជាទស្សនកិច្ច ក្នុងកម្មវត្ថុពង្រឹងវត្តមានរបស់បារាំង មិនថាផ្នែកការទូត និងផ្នែកវិនិយោគសេដ្ឋកិច្ច នៅក្នុងប្រទេសអាស៊ីកណ្តាលទាំង២នេះ ក្នុងបរិបទមួយដែលចិននិងរុស្ស៊ី កំពុងតែប្រជែងយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៦
ទៅដល់ភ្លាម លោកម៉ាក្រុង ត្រូវបានទទួលស្វាគមន៍ដោយលោកប្រធានាធិបតីកាហ្សាក់ស្ថាន Kassym-Jomart Tokaïev នៅវិមានប្រធានាធិបតី។ ផ្អែកតាមប្រភពពីភាគីបារាំង លោកប្រធានាធិបតីទាំង២ បានចុះហត្ថលេខាលើកិច្ចព្រមព្រៀងមួយចំនួន ក្នុងវិស័យផលិតឱសថ និងក្នុងវិស័យផលិតយន្តហោះជាដើម។ ថ្លែងទៅកាន់លោកប្រធានាធិបតីកាហ្សាក់ស្ថាន លោកម៉ាក្រុង បានលើកឡើងបារាំងចង់បង្កើនកិច្ចសហប្រតិបត្តិការសេដ្ឋកិច្ច ឲ្យកាន់តែរឹងមាំជាមួយកាហ្សាក់ស្ថាន។ ក្រោយជំនួបនេះ លោកម៉ាក្រុងនឹងទៅជួបក្រុមនិស្សិតកាហ្សាក់ស្ថាន មុននឹងឡើងយន្តហោះបន្តទៅអ៊ូសបេគីស្ថាន។
គួរបញ្ជាក់ថា ក្រៅពីមានធនធានរ៉ែប្រេងកាត កាហ្សាក់ស្ថានមានធនធានរ៉ែដ៏កម្រមួយទៀត គឺរ៉ែអ៊ុយរ៉ានីញ៉ូម ដែលជាវត្ថុធាតុដើមដ៏ចាំបាច់ សម្រាប់វិស័យនុយក្លេអ៊ែរផលិតចរន្តអគ្គីសនី។ បារាំងមានវត្តមានប្រជែងយកកិច្ចសន្យា សាងសង់រោងចក្រអគ្គីសនីនុយក្លេអ៊ែរទី១នៅកាហ្សាក់ស្ថាន ដែលប្រជាជនកាហ្សាក់ស្ថាន នឹងសម្រេចបោះឆ្នោតប្រជាមតិនៅចុងឆ្នាំនេះ។ យ៉ាងណាមិញ អមដំណើរជាមួយលោកម៉ាក្រុង គឺមានអគ្គនាយកក្រុមហ៊ុនធំៗរបស់បារាំងជាច្រើននាក់ ក្នុងនោះមានអគ្គនាយកក្រុមហ៊ុនអគ្គីសនីបារាំង EDF ក្រុមហ៊ុនគ្រប់គ្រងធនធានទឹក SUEZ និងក្រុមហ៊ុនផលិតអ៊ុយរ៉ានីញ៉ូមបារាំង Orano។
សូមបញ្ជាក់ដែរថា បច្ចុប្បន្ននេះ បារាំងគឺជាអ្នកវិនិយោគធំជាងគេលំដាប់ទី៥ នៅកាហ្សាក់ស្ថាន នាំមុខចិន ដោយសារតែបារាំងមានវត្តមាន របស់ក្រុមហ៊ុន TotalEnergy ដែលធ្វើអាជីវកម្មបូមប្រេងនៅតំបន់ Kachagan ក្នុងសមុទ្រកាសព្យែន។ ការដោះដូរពាណិជ្ជកម្មរវាងបារាំង និងកាហ្សាក់ស្ថាន មានទំហំទឹកប្រាក់ ប្រមាណ៥៣០០លានអឺរ៉ូ ក្នុងឆ្នាំ២០២២ ដែលមួយផ្នែកធំ គឺជាផលិតផលប្រេងឥន្ធនៈ។ ៤០%នៃទំហំអ៊ុយរ៉ានីញ៉ូម ដែលបារាំងត្រូវការប្រើ គឺទិញមកពីកាហ្សាក់ស្ថាន។
សូមរំលឹកថា តំបន់អាស៊ីកណ្តាលតែងតែស្ថិតនៅក្នុងរង្វង់ដែនឥទ្ធិពលរបស់រុស្ស៊ី មិនថាផ្នែកសេដ្ឋកិច្ច និងកិច្ចការបរទេស។ តែយ៉ាងណា ប៉ុន្មានឆ្នាំចុងក្រោយនេះ ចិនបានមានវត្តមានកាន់តែខ្លាំង ជាមួយនឹងមហាគម្រោងផ្លូវមួយខ្សែក្រវ៉ាត់មួយ។ កាហ្សាក់ស្ថានមិនត្រឹមតែបានទាក់ទាញបារាំងនោះទេ គឺបានទាក់ទាញទាំងតួកគី និងហុងគ្រីផងដែរ។ បន្ទាប់ពីលោកម៉ាក្រុង លោកប្រធានាធិបតីតួកគី និងនាយករដ្ឋមន្ត្រីហុងគ្រី នឹងធ្វើដំណើរទៅក្រុងAstana បន្តបន្ទាប់គ្នា នៅថ្ងៃព្រហស្បតិ៍ និងថ្ងៃសុក្រ។ សំបូរធនធានរ៉ែ ទាំងកាហ្សាក់ស្ថាន ទាំងអ៊ូសបេគីស្ថាន ដឹងពីសក្តានុពលសេដ្ឋកិច្ចរបស់ខ្លួន ហើយបានបើកចំហរទ្វារសេដ្ឋកិច្ចនិងវិស័យការទូត តែដោយរក្សាតុល្យភាព ចាត់ទុករុស្ស៊ីនៅតែជាដៃគូដែលមិនអាចខ្វះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ