លោកចូ បៃដិន និងលោកស៊ី ជីនពីង នឹងជួបនិយាយគ្នានៅសាន់ហ្វ្រាន់ស៊ីស្កូ ក្នុងពេលប្រជុំ APEC
ចាប់ពីថ្ងៃទី១១ ដល់ទី១៧វិច្ឆិកា ទីក្រុងសាន់ហ្វ្រាន់ស៊ីស្កូ បើកទ្វារស្វាគមន៍ជំនួបកំពូល នៃបណ្តាប្រទេសសមាជិក អង្គការសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក ហៅកាត់ថា APEC។ តាមការគ្រោងទុក លោកប្រធានាធិបតីចិន ស៊ី ជីនពីង នឹងទៅចូលរួម ហើយនឹងជួបប្រជុំទ្វេរភាគី ជាមួយលោកប្រធានាធិបតី ចូ បៃដិន។ ជំនួបដ៏សំខាន់នេះ ត្រូវគេរំពឹងថា អាចនឹងនាំឲ្យមានការសម្របសម្រួលគ្នា ក្នុងទំនាក់ទំនងរវាងចិននិងអាមេរិក ដែលកំពុងតែល្អក់កករខ្លាំង។
ចុះផ្សាយនៅថ្ងៃ៖
ស្តាប់ - ០៣:០៥
នៅក្នុងសន្និសីទកាសែតនៅព្រឹកថ្ងៃចន្ទ ទី១៣វិច្ឆិកា លោកស្រី Mao Ning អ្នកនាំពាក្យក្រសួងការបរទេសចិន បានបញ្ជាក់ថា លោកស៊ី ជីនពីង និងលោកចូ បៃដិន នឹងជួបគ្នានៅថ្ងៃពុធទី១៥វិច្ឆិកា។ ប្រធានាធិបតីទាំង២ នឹងនិយាយគ្នាស៊ីជម្រៅ ស្តីអំពីបញ្ហាទូទៅផង និងបញ្ហាយុទ្ធសាស្ត្រផង ដោយផ្តោតសំខាន់ទៅលើទំនាក់ទំនង រវាងចិន និងសហរដ្ឋអាមេរិក។
លោកស្រីបានបន្ថែមថា ប្រធានាធិបតីទាំង២ នឹងនិយាយអំពី សន្តិភាព និងការអភិវឌ្ឍន៍។ ឆ្លើយនឹងសំណួរអ្នកកាសែត ដែលលើកឡើងថា ទំនាក់ទំនងរវាងចិននិងអាមេរិក ជាទំនាក់ទំនងបែបប្រកួតប្រជែងគ្នា លោកស្រី Mao Ning បានបដិសេធថាចិនមិនចាត់ទុកដូច្នេះឡើយ។ លោកស្រីបានអះអាងថា មិនមែនចិនខ្លាចការប្រកួតប្រជែងទេ តែចិនប្រឆាំងដាច់ខាត ចំពោះការប្រើពាក្យនេះ។
អ្នកនាំពាក្យចិនបានអំពាវនាវឲ្យសហរដ្ឋអាមេរិក ត្រូវតែគោរពដោយស្មោះត្រង់ ចំពោះការព្រួយបារម្ភដ៏សមហេតុសមផលរបស់ចិន ព្រមទាំងសិទ្ធិស្របច្បាប់របស់ចិនក្នុងការអភិវឌ្ឍន៍ ជាជាងការគិតខ្វល់តែប្រយោជន៍ខ្លួនឯង ហើយគិតតែពីដាក់ឧបសគ្គរំខានរារាំងមកលើចិន។ លោកស្រី Mao Ning សង្កត់ធ្ងន់ថា ចិនគ្មានចេតនាទៅផ្លាស់ប្តូរអាមេរិក ហើយអាមេរិកក៏មិនត្រូវមកចង់ធ្វើឲ្យចិនផ្លាស់ប្តូរដែរ។
ពីខាងវ៉ាស៊ីនតោន លោកស្រី Karine Jean-Pierre អ្នកនាំពាក្យសេតវិមាន បានបញ្ជាក់ឲ្យដឹងថា ប្រធានាធិបតីទាំង២ នឹងនិយាយអំពី បញ្ហាទ្វេរភាគី បញ្ហាតំបន់ និងពិភពលោកផង ព្រមទាំងអំពីការរិះរកមធ្យោបាយ ដើម្បីគ្រប់គ្រងឲ្យការប្រកួតប្រជែងគ្នា មានលក្ខណៈទទួលខុសត្រូវ។
សូមបញ្ជាក់ថា ប៉ុន្មានខែកន្លងមកនេះ ភាគីសហរដ្ឋអាមេរិកបានព្យាយាមបញ្ជូនឥស្សរៈជន និងមន្ត្រីធំជាច្រើននាក់ទៅចិន ដើម្បីនិយាយសម្របសម្រួល ឈានទៅស្តារទំនាក់ទំនងរវាងមហាអំណាចទាំង២ ដែលជួបបញ្ហាតានតឹងខ្លាំង មិនថាផ្នែកសេដ្ឋកិច្ចពាណិជ្ជកម្ម និងផ្នែកភូមិសាស្ត្រនយោបាយ។ នៅក្នុងឱកាសជំនួបកំពូល APEC លោកចូ បៃដិន នឹងព្យាយាមបង្ហាញឲ្យចិនឃើញថា អាមេរិកមានទំនាក់ទំនងល្អនិងស្អិតរមួត ជាមួយប្រទេសផ្សេងៗក្នុងតំបន់ប៉ាស៊ីហ្វិក មានដូចជាអូស្ត្រាលី កូរ៉េខាងត្បូង និងជប៉ុនជាដើម។
ដោយឡែក មន្ត្រីអាមេរិកម្នាក់ បានប្រាប់អ្នកកាសែតថា គេរំពឹងថា នៅថ្ងៃពុធ ប្រធានាធិបតីទាំង២ នឹងនិយាយគ្នាត្រង់ទៅត្រង់មក លើបញ្ហាទំនាស់ជាច្រើន ជាពិសេសគឺបញ្ហាកោះតៃវ៉ាន់។ មន្ត្រីរូបនេះសង្ឃឹមថា អាមេរិកនិងចិន នឹងបង្កើតឲ្យមានបណ្តាញទាក់ទងគ្នាដោយផ្ទាល់ រវាងកងទ័ពទាំង២ ព្រោះវាជារឿងសំខាន់ណាស់ ក្នុងករណីដែលផ្ទុះសង្គ្រាមនៅតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ