ខួប៦០ឆ្នាំចំណងមេត្រីភាពចិនបារាំង៖ ប្រមុខរដ្ឋចិនពោលសរសើរឯករាជ្យភាពបារាំង
ថ្ងៃទី២៧ ខែមករា ឆ្នាំ២០២៤ ប្រទេសបារាំងនិងចិន ប្រារព្ធអបអររម្លឹកខួបទំនាក់ទំនងសម្ព័ន្ធស្ពានមេត្រីភាព ៦ ទសវត្សរ៍។ ៦០ឆ្នាំហើយ ដែល បារាំង ជាប្រទេសអឺរ៉ុបទី១ បានទទួលស្គាល់ទំនាក់ទំនងការទូតជាផ្លូវការជាមួយរដ្ឋចិនកុម្មុយនិស្ត នៅថ្ងៃទី២៧ មករា ១៩៦៤។ ឆ្នាំ១៩៦៤ ពេញឋិតក្នុងបរិបទសង្គ្រាមត្រជាក់ នៃការប្រកួតប្រជែងឥទ្ធិពលមនោគមវិជ្ជារវាង លោកសេរីនិងលោកកុម្មុយនិស្ត។ ការសម្រេចចិត្តរបស់ថ្នាក់ដឹកនាំបារាំង ឧត្តមសេនីយ៍ ហ្សាល ដឺហ្គោល ពីកាលនោះ ត្រូវរងការរិះគន់ជាខ្លាំងពីសម្ព័ន្ធមិត្តប្រជាធិបតេយ្យ ពិសេសសហរដ្ឋអាមេរិក។ តែ សហរដ្ឋអាមេរិក នៅទីបំផុតទៅ ក៏បានទទួលស្គាល់និងភ្ជាប់ទំនាក់ទំនងជាមួយសាធារណរដ្ឋប្រជាមានិតចិនដែរនៅឆ្នាំ១៩៧៩។
ចុះផ្សាយនៅថ្ងៃ៖
ស្តាប់ - ០៣:១៧
ក្នុងសារវីដេអូអបអរខួប៦០ឆ្នាំ ប្រធានាធិបតីបារាំង អេម៉ានុយអែល ម៉ាក្រុង បានថ្លែងសារបញ្ជាក់ពីតួនាទីរបស់បារាំងនិងចិន ដែលជារដ្ឋសមាជិកក្រុមប្រឹក្សាសន្តិសុខអង្គការសហប្រជាជាតិ ត្រូវមានទំនួលខុសត្រូវដើម្បីចូលរួមដោះស្រាយបញ្ហាអន្តរជាតិ។
ពីចំណែកខ្លួន ប្រធានាធិបតីចិន ស៊ី ជីនពីន បានថ្លែងសារវីដេអូអបអរខួប៦០ឆ្នាំ ដោយលើកឡើងថា ភាគីទាំងពីរ រដ្ឋបាលទីក្រុងប៉ារីសនិងប៉េកាំង ត្រូវពួតដៃឲ្យជាប់ និងធ្វើការរួមប្រកៀកស្មាគ្នា ដើម្បីឆ្លើយតបទៅនឹងការស្ថានភាព«មិនច្បាស់លាស់»របស់ពិភពលោកបច្ចុប្បន្ន។ ការណ៍នេះ អាចធ្វើទៅបាន អាស្រ័យនឹងការរក្សាស្ថិរភាពទំនាក់ទំនងឲ្យគង់វង្សរវាងបារាំងនិងចិន។
ប្រមុខរដ្ឋចិនក៏បានពោលសរសើរអំពីឯករាជ្យភាពបារាំង។ «ឯករាជ្យភាពបារាំង» ដែលលោក ស៊ី ជីនពីង ចង់សំដៅនោះ គឺជំហរស្វ័យសម្រេចចិត្តរបស់បារាំង ដែលរួមចំណែករក្សាស្ថិរភាពនិងសន្តិភាពពិភពលោក។
ករណីមានសំណុំបញ្ហាអន្តរជាតិទាក់ទងនឹងចិន គឺ បារាំង តែងតែជៀសវែង មិនធ្វើតាមការសម្រេចចិត្តរបស់សម្ព័ន្ធមិត្តរបស់ខ្លួនឡើយ។ ជាក់ស្តែង បន្ទាត់នយោបាយរបស់ក្រុងវ៉ាស៊ីនតោន និងសម្ព័ន្ធមិត្ត Aukus មាន អូស្ត្រាលី អង់គ្លេស និងអាមេរិក ដែលទំនងជាធ្វើឲ្យមានការប្រឈមមុខដាក់គ្នា ផ្ទុយពីបន្ទាត់សកម្មភាពរបស់បារាំង ដែលច្រើនតែសម្របសម្រួល និងបញ្ចៀសការប្រឈមមុខតានតឹងដាក់គ្នា។ នេះបើតាមការជញ្ជឹងគិតឃើញរបស់អ្នកវិភាគ Emmanuel Lincot ជាអ្នកសិក្សាស្រាវជ្រាវ នៅវិទ្យាស្ថានទំនាក់ទំនងអន្តរជាតិនិងយុទ្ធសាស្ត្រ (IRIS)។ អ្នកវិភាគរូបនេះ បានពិចារណាអំពីទំនាក់ទំនងបារាំងនិងចិន ដោយវាយតម្លៃថាស្អិតល្មួតផ្នែកយុទ្ធសាស្ត្រការទូតសហការ។ កិច្ចសហការទ្វេភាគី បារាំងចិន ក៏ត្រូវលោក ស៊ី ជីនពីង លើកឡើងក្នុងសារវិដេអូដែរ ជាពិសេសផ្នែកប្រែប្រួលអាកាសធាតុ ជីវចម្រុះ និង សន្តិសុខស្បៀង។
ដោយឡែក ក្រសួងការបរទេសបារាំង បានសង្កត់ធ្ងន់ចំពោះវិស័យទេសចរណ៍វប្បធម៌ ជាប្រធានបទសំខាន់នៃប្រទេសទាំងពីរ ក្នុងឆ្នាំនេះ។ ខណៈដែលប្រជាជនបារាំង-ចិន ក៏និយមទស្សនាស្រុកគ្នាទៅវិញទៅមកយ៉ាងសម្បើម អ្នកវិភាគខ្លះឲ្យយោបល់ថា គួរលើកលែងទិដ្ឋាការឆ្លងដែន ចំនួន ១៥ ថ្ងៃ ហើយនិងជំរុញឲ្យសិស្សសាលានៃប្រទេសទាំងពីរ រៀនភាសា ចិន និងបារាំង ឲ្យកាន់តែច្រើន។
ក្រោមកិច្ចសហការទ្វេភាគី នៅពេញ១ឆ្នាំ២០២៤នេះ កម្មវិធីសិល្បៈសំដៅតម្កើងមិត្តភាពបារាំង-ចិន នឹងត្រូវរៀបចំជាហូរហែ ក្នុងខេត្តក្រុង ជាង ៣០ របស់ចិន។ នៅបារាំងវិញ រដ្ឋធានីប៉ារីសនិងខេត្តធំៗមួយចំនួន ក៏នឹងទទួលស្វាគមន៍សិល្បករចិនឲ្យបញ្ចេញស្នាដៃដែរ។
ជាការរំឭក ឆ្នាំទៅមិញ លោក ម៉ាក្រុង អញ្ជើញទៅស្រុកចិន ហើយតាមបើគម្រោង ក្នុងឆ្នាំនេះ លោក ស៊ី ជីនពីន នឹងត្រូវអញ្ជើញមកស្រុកបារាំងវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ