អូស្ត្រាលីគ្រោងពង្រឹងសមត្ថភាពកងទ័ពជើងទឹក ដោយទិញនាវាចម្បាំងថែម២៦គ្រឿង
អូស្ត្រាលីបានប្រកាសថា នឹងពង្រឹងសមត្ថភាពកងទ័ពជើងទឹករបស់ខ្លួន ដោយគេគ្រោងទិញបន្ថែម នូវនាវាចម្បាំងចំនួនដល់ទៅ២៦គ្រឿង។ នេះគឺជាទំហំចំនួននាវាចម្បាំងដ៏ច្រើនបំផុត ដែលអូស្ត្រាលីមិនធ្លាប់មាន បើគិតរាប់ពីក្រោយសង្គ្រាមលោកលើកទី២មក។ កម្មវត្ថុរបស់កងទ័ពអូស្ត្រាលី គឺដើម្បីការពារសន្តិសុខនៃចរាចរណ៍ផ្លូវសមុទ្រ ខណៈមានការប្រឈមមុខដាក់គ្នាកាន់តែខ្លាំងឡើង នៅក្នុងតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៣
អូស្ត្រាលីគ្រោងចំណាយប្រាក់ ចំនួន៦៥០០លានអឺរ៉ូ ដើម្បីពង្រឹងសមត្ថភាពកងទ័ពរបស់ខ្លួន។ ការពង្រឹងនេះ គឺផ្តោតជាពិសេស ទៅលើកម្លាំងប្រយុទ្ធនិងការពារខ្លួន របស់កងទ័ពជើងទឹក។ អូស្ត្រាលី នឹងទិញនាវាចម្បាំង ចំនួន២៦គ្រឿង មកបន្ថែមពីលើ១១គ្រឿងដែលខ្លួនមាននាពេលបច្ចុប្បន្ន។
លោក Richard Marles រដ្ឋមន្ត្រីក្រសួងការពារជាតិអូស្ត្រាលី បានលើកឡើងថា អូស្ត្រាលីនឹងមានទំហំចំនួននាវាចម្បាំង ច្រើនខ្លាំងបំផុតមិនធ្លាប់មាន បើគិតចាប់ពីក្រោយសង្គ្រាមលោកលើកទី២មក។ លោកបន្តថា កងទ័ពជើងទឹកអូស្ត្រាលី ត្រូវតែមានសមត្ថភាព ដើម្បីអាចធានាការពារឲ្យបានសុវត្ថិភាពនិងសន្តិសុខ នៃបណ្តាញផ្លូវចរាចរណ៍សមុទ្រ ព្រោះថាចរាចរណ៍សមុទ្រ មានសារៈសំខាន់ ចំពោះជីវភាពនិងបែបផែនរស់នៅព្រមទាំងវឌ្ឍនភាពរបស់អូស្ត្រាលី។
ផ្អែកតាមក្រសួងការពារជាតិអូស្ត្រាលី ក្នុងចំណោមនាវាចម្បាំងថ្មីទាំង២៦គ្រឿងនោះ គឺមាន នាវាFrégates ប្រភេទHunterចំនួន៦គ្រឿង នាវាDestroyersចំនួន៣គ្រឿង នាវាFrégates ពហុជំនាញ១១គ្រឿង និងនាវាប្រយុទ្ធលើផ្ទៃទឹក ដោយមិនចាំបាច់មានមនុស្សបញ្ជា ចំនួន៦គ្រឿងទៀត។ នាវាចម្បាំងទាំងនេះ នឹងត្រូវបំពាក់ដោយ ប្រព័ន្ធមីស៊ីលអាមេរិក ប្រភេទ Tomahawk ដែលអាចបាញ់បានចំងាយឆ្ងាយ ចូលជ្រៅក្នុងទឹកដីរបស់សត្រូវ។ ប្រព័ន្ធសព្វាវុធទំនើបនេះ គឺជាកត្តាចាំបាច់បំផុត ដើម្បីសំឡុតកុំឲ្យសត្រូវ ហ៊ានបើកការវាយប្រហារណាមួយជាមុន។
គួរកត់សំគាល់ថា ផែនការថ្មីនេះ នឹងតម្រូវឲ្យអូស្ត្រាលីដំឡើងការចំណាយផ្នែកកងទ័ព ដល់ចំនួន២,៤%នៃចំណូលដុលក្នុងស្រុង។ ពោលគឺលើសពី២% ដែលត្រូវបានកំណត់ដោយសម្ព័ន្ធភាពអូតង់។ នាវាចម្បាំងថ្មីៗទាំងនេះ មានខ្លះនឹងត្រូវសាងសង់នៅ កំពង់ផែផលិតនាវា Adelaïde នៅអូស្ត្រាលី ដែលនឹងអាចបង្កើតការងារចំនួន ៣៧០០នាក់ ចំណែកនាវាខ្លះទៀត នឹងត្រូវសាសង់នៅសហរដ្ឋអាមេរិក។ ដោយឡែក អាចមាននាវាមួយប្រភេទ ដែលអាចនឹងត្រូវបញ្ជូនមកពីអេស្ប៉ាញ អាល្លឺម៉ង់ កូរ៉េខាងត្បូង ឬជប៉ុន។
សូមរំលឹកថា កាលពីឆ្នាំ២០២១ អូស្ត្រាលីបានងាកទៅទិញនាវាមុជទឹកបាតសមុទ្រ ប្រើប្រព័ន្ធថាមពលនុយក្លេអ៊ែររបស់អាមេរិកចំនួន៣គ្រឿង ហើយបោះបង់ចោលគម្រោង ទិញនាវាមុជទឹកបាតសមុទ្ររបស់បារាំងចោលវិញ។ នាវាមុជទឹក Virginia របស់អាមេរិក ដើរដោយថាមពលនុយក្លេអ៊ែរមែន តែមិនបំពាក់អាវុធនុយក្លេអ៊ែរទេ។
គួរបញ្ជាក់ថា អ្នកវិភាគជាច្រើនយល់ឃើញថា អូស្ត្រាលីលនឹងធ្វើការពង្រឹងវិស័យសព្វាវុធទំនើបកាន់តែខ្លាំង ព្រោះថាការធ្វើទំនើបកម្មនៃវិស័យការពារជាតិរបស់ប្រទេសនេះកន្លងមក គឺបានដើរយឺត។ ស្របពេលដែលសន្តិសុខតំបន់អាស៊ីប៉ាស៊ីហ្វិក កាន់តែប្រឈមគ្រោះថ្នាក់ អូស្ត្រាលីមិនអាចបង្អែរបង្អង់ទៀតបានទេ។ លោក Michael Shoebridge អតីតមន្ត្រីយោធាជាន់ខ្ពស់អូស្ត្រាលីម្នាក់ បានអះអាងថា អូស្ត្រាលីត្រូវតែប្រញាប់ប្រញាល់ សម្រាលនីតិវិធីទិញសព្វាវុធទំនើបពីបរទេស។ ប្រសិនបើមានការយឺតយ៉ាវ នៅក្នុងការចុះកិច្ចសន្យាទិញ ឬការផលិត មានន័យថា តម្លៃចំណាយអាចនឹងឡើង ហើយពេលបានប្រព័ន្ធសព្វាវុធទាំងនោះ យកមកប្រើ គឺវាអាចនឹងមានបច្ចេកវិទ្យាចាស់ ដើរក្រោយគេ ឬមិនឆ្លើយតបទៅនឹងរបត់ថ្មីនៃស្ថានការណ៍សន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ