អង្គការសហប្រជាជាតិបង្ខំចិត្តកាត់បន្ថយជំនួយស្បៀងអាហារដល់យេម៉ែន
ដោយហេតុតែគ្មានមូលនិធិគ្រប់គ្រាន់ អង្គការសហប្រជាជាតិ បានបង្ខំចិត្តប្រកាស នៅថ្ងៃពុធទី ២២ធ្នូនេះ កាត់បន្ថយជំនួយជាស្បៀងអាហារ ដល់យេម៉ែន។ ជាផលវិបាក ពលរដ្ឋយេម៉ែន ជាច្រើនលាននាក់ នឹងត្រូវធ្លាក់ក្នុងគ្រោះទុរ្ភិក្ស និងអត់ឃ្លានរ៉ាំរ៉ៃ។
ចុះផ្សាយនៅថ្ងៃ៖
ពីពេលនេះដល់ខែឧសភា កម្មវិធីស្បៀងអាហារពិភពលោក ត្រូវការថវិកា ៨១៣លានដុល្លារ សម្រាប់បន្តជំនួយដល់ជនដែលរងគ្រោះខ្លាំងនៅយេម៉ែន។ នៅឆ្នាំ២០២២ អង្គការសហប្រជាជាតិ ត្រូវការជាចាំបាច់ថវិកាចំនួន ១៩០០លានដុល្លារ ដើម្បីអាចបន្តផ្តល់អាហារដល់គ្រួសារដែលប្រឈមខ្លាំងនឹងគ្រោះអត់ឃ្លាន។ ជាសរុប អង្គការសហប្រជាជាតិ មានកម្មវត្ថុប្រមូលថវិកាឱ្យបាន៣៨៥០លានដុល្លារ សម្រាប់ធ្វើជំនួយជាស្បៀងអាហារដល់ពលរដ្ឋយេម៉ែន ប៉ុន្តែអង្គការទទួលបានពាក្យសន្យាផ្តល់ជំនួយត្រឹមតែ១៧០០លានដុល្លារប៉ុណ្ណោះ។
ដូច្នេះពេលនេះ អង្គការសហប្រជាជាតិគ្មានប្រាក់គ្រប់គ្រាន់ សម្រាប់ធ្វើជំនួយជាស្បៀងអាហារជួយពលរដ្ឋយេម៉ែនជាង១៣លាននាក់ ដែលត្រូវការបានទេ។ នេះបើតាមសេចក្តីថ្លែងការណ៍របស់អង្គការកម្មវិធីស្បៀងអាហារពិភពលោក។ អង្គការបានបញ្ជាក់ថា ចាប់ពីខែមករា២០២២ទៅ ពលរដ្ឋយេម៉ែន ៨លាននាក់នឹងទទួលជំនួយស្បៀងអាហារតិចជាងមុន និងមានតែប្រមាណជាង៥លាននាក់ដែលធ្លាក់ក្នុងគ្រោះទុរ្ភិក្សហើយប៉ុណ្ណោះ ទើបអាចទទួលបានរបបអាហារពេញបាន។
នៅក្នុងប្រទេស ដែល៨០%នៃប្រជាជនរស់រំពឹងលើជំនួយស្បៀងអាហារពីអន្តរជាតិ ការកាត់បន្ថយជំនួយនឹងជំរុញមានគ្រួសារខ្លះទទួលបានរបបតែពាក់កណ្តាល និងជាច្រើនគ្រួសារផ្សេងទៀតលែងបានទទួលជំនួយសោះ។ ប្រឈមនឹងស្ថានភាពនេះ ភ្នាក់ងាររបស់អង្គការសហប្រជាជាតិ សន្និដ្ឋានថា ពលរដ្ឋយេម៉ែនពាក់កណ្តាលប្រទេស(ជាង១៦លាននាក់) នឹងត្រូវរស់ប្រឈមនឹងភាពអត់ឃ្លានរ៉ាំរ៉ៃ។
ក្រៅពីខ្វះថវិកា ជំនួយមនុស្សធម៌ សម្រាប់ប្រជាពលរដ្ឋស៊ីវិល ត្រូវជួបភាពយឺតយ៉ាវ និងរអាក់រអួលខ្លាំង ដោយអាកាសយានដ្ឋានក្រុងសាណា ត្រូវបិទតាំងពីថ្ងៃអង្គារទី ២១ធ្នូមក ក្រោយពីមានការវាយប្រហារពីសំណាក់ក្រុមសម្ព័ន្ធមិត្តដឹកនាំដោយអារ៉ាប៊ីសាអូឌីត លើពួកឧទ្ទាមហ៊ូទីដែលជាអ្នកគ្រប់គ្រងអាកាសយានដ្ឋានអន្តរជាតិយេម៉ែន។ អង្គការសហប្រជាជាតិ បានអំពាវនាវជាថ្មី ឱ្យគ្រប់ភាគីកុំប៉ះពាល់ដល់ដំណើរអាកាសយានដ្ឋាន និងត្រូវបើកអាកាសយានដ្ឋានឡើងវិញ ដើម្បីឱ្យប្រតិបត្តិការមនុស្សធម៌ អាចបន្តសកម្មភាពរបស់ខ្លួនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ