របាយការណ៍អង្គការសហប្រជាជាតិ៖ វិបត្តិកូវីដមិនបានធ្វើឲ្យចំនួនជនភៀសខ្លួន ធ្លាក់ថយចុះ
វិបត្តិកូវីដបានធ្វើឲ្យសេដ្ឋកិច្ចក្នុងពិភពលោកនៅឈរទ្រឹង ប៉ុន្តែ មិនបានធ្វើឲ្យសង្រ្គាម ជម្លោះប្រដាប់អាវុធធ្លាក់ថយចុះនោះទេ។ ជាលទ្ធផល ទោះ ពិភពលោកកំពុងជួបវិបត្តិកូវីដ ចំនួនជនភៀសខ្លួន និងមនុស្សផ្លាស់ទី ដោយសារសង្រ្គាម នៅតែបន្តកើនឡើង នៅឆ្នាំ ២០២០។ តាមរបាយការណ៍របស់ឧត្តមស្នងការទទួលបន្ទុកជនភៀសខ្លួនរបស់អង្គការសហប្រជាជាតិ ចំនួនមនុស្សផ្លាស់ទី បានកើនឡើងដល់ ៨២លាននាក់ នៅក្នុងពិភពលោក ពោល គឺកើនឡើង ទ្វេដង បើប្រៀបធៀបនឹងតួលេខ កាលពី១០ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
នៅឆ្នាំ ២០២០ មនុស្ស ជាង៨២លាននាក់ នៅក្នុងពិភពលោក ត្រូវផ្លាស់ទី ដោយបង្ខំ ដើម្បីគេចចេញពីសង្រ្គាម និងការធ្វើទុក្ខម្នេញ។ នៅ២ថ្ងៃមុនទិវាជនភៀសខ្លួន ដែលត្រូវប្រារព្ធនៅថ្ងៃទី ទី ២០មិថុនា អង្គការសហប្រជាជាតិបានចេញផ្សាយ របាយការណ៍មួយ ដែលបង្ហាញថា ទោះពិភពលោកកំពុងជួបវិបត្តិកូវីដ ចំនួន ជនភៀសខ្លួន មនុស្សផ្លាស់ទី នៅតែកើនឡើង ក្នុងរង្វង់ ជិត ៣លាននាក់ ក្នុងរយៈពេល ១ឆ្នាំ ២០២០។
សម្រាប់ប្រធានឧត្តមស្នងការទទួលបន្ទុកជនភៀសខ្លួនរបស់អង្គការសហប្រជាជាតិ លោក Filippo Grandi នៅក្នុងសម័យកូវីដ អ្វីៗបានឈប់ទ្រឹង ជាពិសេស សេដ្ឋកិច្ច។ ប៉ុន្តែ សង្រ្គាម ជម្លោះប្រដាប់អាវុធ អំពើហិង្សា រើសអើង និងការធ្វើទុក្ខបុកម្នេញ មិនបានឈប់នៅទ្រឹងនោះទេ។ តាំងពីយេម៉ែន អាហ្វហ្កានីស្ថាន ស៊ីរី សូម៉ាលី និងភូមា ជម្លោះប្រដាប់អាវុធនៅតែបន្តមាន ដែលជាហេតុធ្វើឲ្យចំនួន មនុស្សផ្លាស់ទី និងជនភៀសខ្លួននៅតែបន្តកើនឡើង រហូតធ្វើឲ្យពិភពលោក មានជនភៀសខ្លួនសរុប ៨២លាន ៤សែននាក់ គឺកើនឡើង ទ្វេដង បើប្រៀបធៀបនឹងឆ្នាំ ២០១១ ដែលមានចំនួន តែ ៤០លាននាក់។
អ្វីដែលធ្វើឲ្យគេរន្ធត់ចិត្តខ្លាំង គឺ ៤២%នៃជនភៀសខ្លួន និងមនុស្សផ្លាស់ទី ជាក្រុមយុវជន យុវតី ដែលមានអាយុ ក្រោម ១៨ឆ្នាំ។ សម្រាប់ប្រធានឧត្តមស្នងការទទួលបន្ទុកជនភៀសខ្លួន វាជាសោកនាដកម្មក្រៃលែង ដែលឃើញក្មេងរាប់លាននាក់ ក្នុងពិភពលោក កើតធំដឹងក្តី ក្នុងគ្រួសារដែលនៅរស់ត្រសាត់អណ្តែត គ្មានជំរកផ្ទះពិតប្រាកដ។
នៅពេលចំនួនជនភៀសខ្លួន និងអ្នកស្វែងរកសិទ្ធិជ្រកកោន នៅប្រទេសទី៣ ហាក់នៅថេរ ដោយសារតែវិធានការបិទព្រំដែន បិទប្រទេស ដើម្បីទប់ស្កាត់ការចម្លងមេរោគកូវីដ ចំនួនមនុស្សផ្លាស់ទី ក្នុងប្រទេស មិនបានឈប់ទ្រឹងនោះទេ ព្រោះថា ជម្លោះប្រដាប់អាវុធនៅតែបន្តមាន ក្នុងកាលៈទេសៈ កូវីដ ដូចជានៅប្រទេសស៊ីរី អេត្យូពី ជាដើម។
ដូចស្ថានការណ៍ នៅឆ្នាំ ២០១៩ ២ភាគ៣នៃ ជនភៀសខ្លួន និងមនុស្សផ្លាស់ទី មានប្រភពចេញមកពីប្រទេស៥ ដូចជា ស៊ីរី អាហ្វហ្កានីស្ថាន វ៉េណេស៊ុយអេឡា ស៊ូដង់ខាងត្បូង និងភូមា។ នៅក្នុងរយៈពេល ៧ឆ្នាំជាប់គ្នា តួកគី ជាប្រទេសដែលអនុញ្ញាតឲ្យមានជំរំដាក់ជនភៀសខ្លួន ច្រើនជាងគេក្នុងពិភពលោក ប្រមាណ ៣,៧លាននាក់។ កូឡុំប៊ី ទទួលជនភៀសខ្លួន ១,៧លាននាក់ ចំណែកអាល្លឺម៉ង់ មាន ១,២លាននាក់។
ក្នុងកាលៈទេសៈ ដែលចំនួនជនភៀសខ្លួនចេះតែកើនឡើងមិនឈប់ ចំណែក ប្រទេស ជាច្រើននៅតែបិទទ្វារមិនស្វាគមជនភៀសខ្លួនសង្រ្គាម ប្រធានឧត្តមស្នងការទទួលបន្ទុកជនភៀសខ្លួន អំពាវនាវឲ្យមេដឹកនាំក្នុងពិភពលោក លះបង់ចោល ភាពអត្មានិយម និងងាកមកជួយដោះស្រាយ បញ្ចប់វិបត្តិជម្លោះ ប្រដាប់អាវុធដែលជាប្រភពចំបងធ្វើឲ្យមនុស្សផ្លាស់ទី រត់ភៀសខ្លួនចាកចោលស្រុកកំណើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ