ទំនាក់ទំនងរវាងប្រទេសបារាំង និងប្រទេសម៉ាលីបានធ្លាក់ដុនដាបកាន់តែខ្លាំង
នៅរសៀលថ្ងៃចន្ទ ទី៣១ មករា រដ្ឋាភិបាលអន្តរកាលក្នុងប្រទេសម៉ាលីដែលដឹកនាំដោយក្រុមយោធាបានសម្រេចបណ្តេញឯកអគ្គរដ្ឋទូតបារាំងលោកហ្សូអែល មេយ័រចេញពីប្រទេស។ លោកមេយ័រមានរយៈពេល ៣ថ្ងៃដើម្បីចាកចេញពីប្រទេសម៉ាលី។ ទង្វើរបស់ម៉ាលីចំពោះបារាំងពេលនេះជាសក្ខីកម្មថ្មីមួយទៀតដែលបញ្ជាក់ពីទំនាក់ទំនងរកាំរកូសកាន់តែខ្លាំងរវាងក្រុងបាម៉ាកូ និងក្រុងប៉ារីសតាំងពីប៉ុន្មានខែកន្លងមក។
ចុះផ្សាយនៅថ្ងៃ៖
ស្តាប់ - ០២:៣៦
ការបណ្តេញឯកអគ្គរដ្ឋទូតបារាំងលោកហ្សូអែល មេយ័រចេញពីម៉ាលីត្រូវបានរបបសឹកម៉ាលីលើកយកហេតុផលទៅពន្យល់ថា មកពីខ្លួនមិនសប្បាយចិត្តនឹងការថ្លែងរបស់ប្រមុខការទូតបារាំងលោកហ្សង់អ៊ីវ ឡឺឌ្រីយ៉ាង់ដែលបានវាយប្រហារ និងប្រមាថធ្ងន់ៗលើរបបសឹកម៉ាលីនាប៉ុន្មានថ្ងៃចុងក្រោយនេះ។ លោកឡឺឌ្រីយ៉ង់បានចាត់ទុករដ្ឋអំណាចអន្តរកាលនៅម៉ាលីដែលកើតចេញពីរដ្ឋប្រហារយោធាសព្វថ្ងៃជារដ្ឋអំណាចខុសច្បាប់។ ក្រុងបាម៉ាកូយល់ថា ក្រុងប៉ារីសមិនអាចរក្សាទុកឯកអគ្គរដ្ឋទូតរបស់ខ្លួននៅក្នុងប្រទេសមួយដែលខ្លួនមិនទទួលស្គាល់ភាពស្របច្បាប់នៃរដ្ឋអំណាចរបស់ប្រទេសនោះបានទេ។
តែក្នុងពេលជាមួយគ្នា ក្រុងបាម៉ាកូក៏បានបញ្ជាក់ពីបំណងចង់រក្សាកិច្ចសន្ទនា និងចង់បន្តកិច្ចសហប្រតិបត្តិការជាមួយក្រុមប្រទេសដៃគូអន្តរជាតិទាងអស់ ក្នុងនោះក៏មានបារាំងមួយដែរ។ ខណៈនេះ បារាំងនៅមិនទាន់បញ្ចេញប្រតិកម្មខ្លាំងក្លាអ្វីទេ និងបានបញ្ជាក់ត្រឹមពីការឃើញសេចក្តីសម្រេចរបស់រដ្ឋអំណាចម៉ាលី។ តែប្រមុខការទូតអឺរ៉ុបលោកហ្សូសេព បូរែលបានយល់ឃើញថា ការសម្រេចចិត្តរបស់រដ្ឋអំណាចម៉ាលីគ្មានហេតុផលត្រឹមត្រូវ និងបានធ្វើឲ្យម៉ាលីកាន់តែឯកោ។ មែនទែនទៅ ភាពរកាំរកូសរវាងក្រុងប៉ារីស និងក្រុងបាម៉ាកូបានចាប់ផ្តើមតាំងពីរដ្ឋប្រហារទម្លាក់ប្រធានាធិបតីម៉ាលីលោកប៊ូបាការ កីតាក្នុងខែសីហា ឆ្នាំ ២០២០ មកម្ល៉េះ។
តែទំនាក់ទំនងនេះបានធ្លាក់ដុនដាបកាន់តែខ្លាំងនៅក្រោយរដ្ឋប្រហារយោធាលើកទី២ ក្នុងខែឧសភា ឆ្នាំ ២០២១។ នេះក៏ដោយសារក្នុងខែមិថុនា ឆ្នាំ ២០២១ ប្រធានាធិបតីបារាំងលោកម៉ាក្រុងបានប្រកាសពីការប្តូរយុទ្ធសាស្រ្តសម្រាប់វត្តមានទ័ពបារាំងនៅតំបន់សាហ៊ែល ពិសេសការបិទមូលដ្ឋានទ័ពនៅគីដាល់ នៅតេសាលី និងនៅតុមប៊ូទូ។ នាយករដ្ឋមន្រ្តីម៉ាលីលោកស្ហូហ្គែល មៃហ្កាមិនបានសាទរនឹងយុទ្ធសាស្រ្តថ្មីរបស់លោកម៉ាក្រុង និងបានចាត់ទុកទង្វើរបស់លោកម៉ាក្រុងថាជាការបោះបង់ចោលម៉ាលីនៅកណ្តាលផ្លូវ។ លោកម៉ាក្រុងក៏បានវាយបកវិញនាពេលនោះដោយបានចាត់ទុកលោកមៃហ្កាជាកូនក្មេងនៃការធ្វើរដ្ឋប្រហារចំនួន ២ដង។
បន្ទាប់មកក្នុងខែធ្នូ ឆ្នាំ ២០២១ លោកម៉ាក្រុងបានលុបចោលដំណើរទស្សនកិច្ចទៅម៉ាលីក្រោមហេតុផលផ្លូវការវិបត្តិកូវីដ១៩។ តែតាមពិតទៅនោះ បារាំងមិនសប្បាយចិត្តនឹងរបបសឹកម៉ាលីដែលបន្តអូសបន្លាយការរៀបចំបោះឆ្នោតដើម្បីប្រគល់អំណាចទៅឲ្យក្រុមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ