ក្រោយបារាំងប្រកាសដកខ្លួនចេញ យោធាម៉ាលីបើកប្រតិបត្តិការបោសសម្អាតពួកភេរវជនជីហាត
មានទាហានម៉ាលី៨នាក់បានស្លាប់ នៅក្នុងប្រតិបត្តិផ្លូវអាកាស ដែលកម្ចាត់បានពួកភេរវជនជិត៦០នាក់។ ជាប្រតិបត្តិការយោធាក្នុងតំបន់ភាគខាងជើងប្រទេស ដែលមានជនស៊ីវិលយ៉ាងហោចណាស់៤០នាក់បានស្លាប់ ក្នុងសប្តាហ៍នេះ។ នេះបើតាមសេចក្តីថ្លែងការណ៍របស់អាជ្ញាធរយោធាម៉ាលី នៅថ្ងៃល្ងាចថ្ងៃសុក្រទី ១៨កុម្ភៈ។
ចុះផ្សាយនៅថ្ងៃ៖
ស្តាប់ - ០១:៤៤
កងទ័ពអាកាសម៉ាលី បានបើកប្រតិបត្តិការកម្ចាត់មូលដ្ឋានរបស់ពួកភេរវជន ដែលមានទីតាំងនៅតំបន់ព្រំដែនភាគខាងជើងប្រទេសម៉ាលីជាប់ជាមួយប្រទេសបួរគីណាហ្វាសូ និងប្រទេសនីហ្សេ។ ប្រតិបត្តិការបន្តដោយការប្រយុទ្ធគ្នាយ៉ាងហិង្សារហូតមានស្លាប់ទាហានម៉ាលី៨នាក់ និងភេរវជន៥៧នាក់។
អន្តរាគមន៍យោធានេះ បានកើតឡើងដោយចៃដន្យ នៅពេលកងកម្លាំងម៉ាលីកំពុងធ្វើល្បាត ដើម្បីធានាសន្តិសុខនិងសុវត្ថិភាពដល់ប្រជាជន ស្រាប់តែពើបប្រទះក្រុមប្រដាប់អាវុធគ្មានអត្តសញ្ញាណមួយក្រុម ដែលកំពុងតាមស្វែងរកស្រាប់ នៅចម្ងាយប្រមាណពីបួនដប់គីឡូម៉ែត្រពីតំបន់មុំព្រំប្រទល់បីប្រទេស។
គឺតំបន់ព្រំប្រទល់បីប្រទេសម៉ាលី បួរគីណាហ្វាសូ និងនីហ្សេនេះហើយ ដែលក្នុងអំឡុងពេលតែបីថ្ងៃ នៃសប្តាហ៍នេះ មានជនស៊ីវិលចំនួនយ៉ាងហោច៤០នាក់បានបាត់បង់ជីវិត ដោយស្នាដៃពួកភេរវនិយមប្រដាប់អាវុធអ៊ីស្លាមនៃអង្គការរដ្ឋអ៊ីស្លាម។ បើតាមប្រភពក្នុងស្រុកផ្សេងៗ ពួកជីហាតរដ្ឋអ៊ីស្លាម បានកាប់សម្លាប់ប្រជាពលរដ្ឋ ដោយចាត់ទុកជនស៊ីវិលទាំងអស់នោះថាបានផ្សំគំនិតជាមួយអាជ្ញាធរ (ក្រុមប្រជែងរបស់ពួកវា)។
តំបន់ប្រជុំព្រំដែនបីប្រទេសដែលកងទ័ពម៉ាលីកំពុងធ្វើប្រតិបត្តិការនេះ ក៏ស្ថិតនៅក្រោមការការពាររបស់ទាហានបារាំងក្នុងក្របខ័ណ្ឌនៃបេសកកម្មBarkhane និងកងកម្លាំងពិសេសរបស់អឺរ៉ុប Takuba ព្រមទាំងកងកម្លាំងមួកខៀវ អង្គការសហប្រជាជាតិ ប្រចាំម៉ាលី Minusma ដែរ។ ប៉ុន្តែបារាំង និងដៃគូអឺរ៉ុប ទើបបានប្រកាសនៅថ្ងៃព្រហស្បតិ៍ទី ១៧កុម្ភៈ ២០២២ ដកកម្លាំងរបស់ខ្លួនទាំងស្រុងចេញពីម៉ាលី។ ការដកកងទ័ពដែលនឹងប្រព្រឹត្តទៅជាដំណាក់ៗ ដោយប្រើពេលពី៤ទៅ៦ខែ តែរដ្ឋាភិបាលយោធាម៉ាលីចង់ឃើញបារាំងដើរភ្លាមតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ