លោកម៉ាក្រុង៖បើគ្មានអន្តរាគមន៍យោធារបស់បារាំងក្នុងឆ្នាំ ២០១៣ រដ្ឋម៉ាលីត្រូវដួលរលំ
នៅថ្ងៃព្រហស្បតិ៍ ទី១៧ កុម្ភៈ ប្រទេសបារាំង និងប្រទេសអឺរ៉ុបដៃគូ រួមទាំងប្រទេសកាណាដាបានសម្រេចជាផ្លូវការពីការដកទ័ពចេញពីប្រទេសម៉ាលី។ គួរបញ្ជាក់ថាសព្វថ្ងៃនេះ បារាំងមានទ័ពប្រមាណជា ៤៦០០នាក់ប្រចាំនៅតំបន់សាហ៊ែលសម្រាប់ប្រតិបត្តិការបារកាន ក្នុងនោះ មាន ២៥០០នាក់កំពុងធ្វើប្រតិបត្តិការនៅក្នុងប្រទេសម៉ាលី។ តែទោះជាបារាំង និងប្រទេសដៃគូអឺរ៉ុបបានសម្រេចដកទ័ពចេញពីម៉ាលីក៏ដោយក៏ប្រតិបត្តិការបារកាន និងតូគូបារបស់ទ័ពអឺរ៉ុបសម្រាប់យុទ្ធនាការប្រឆាំងភេរវនិយមលើទឹកដីអាហ្វ្រិកនៅតែបន្តទៅមុខ។ គ្រាន់តែថា គេលែងធ្វើប្រតិបត្តិការទ័ពនៅក្នុងទឹកដីម៉ាលីដូចមុន និងបន្តធ្វើនៅក្នុងប្រទេសអាហ្វ្រិក៤ផ្សេងទៀតក្នុងតំបន់សាហ៊ែល។ តើវាជាបរាជ័យរបស់បារាំង ឬដែលប្រធានាធិបតីបារាំងលោកម៉ាក្រុងបានសម្រេចដកទ័ពចេញពីម៉ាលី?។ លោកម៉ាក្រុងបានឆ្លើយដោយពន្យល់ពីមូលហេតុដែលបារាំងបានចូលអន្តរាគមន៍លើម៉ាលីកាលពីឆ្នាំ ២០១៣។
ចុះផ្សាយនៅថ្ងៃ៖
ស្តាប់ - ០២:១៧
« តើវានឹងមានព្រឹត្តិការណ៍អ្វីកើតឡើង ប្រសិនបើបារាំងមិនបានជ្រើសយកផ្លូវធ្វើអន្តរាគមន៍លើម៉ាលីទេនោះ។ ច្បាស់ណាស់ បើបារាំងមិនអន្តរាគមន៍ទេ អ្វីដែលអស់លោកទទួលបានដោយមិនអាចគេចរួច គឺការដួលរលំរដ្ឋម៉ាលីទាំងមូលតែម្តង។ នេះហើយជាអ្វីដែលកំពុងកើតមានឡើងនៅពេលនោះ។គេអាចនិយាយពីវាសនាចំនួនពីរដែលម៉ាលីអាចជួបកាលណោះ បើជាស្ថានការណ៍មិនសូវអាក្រក់ខ្លាំង ដែនដីមួយផ្នែករបស់ម៉ាលីត្រូវធ្លាក់ក្នុងដៃពួកជីហាតអង្គការរដ្ឋអ៊ីស្លាម។ តែបើជាស្ថានការណ៍អាក្រក់ខ្លាំងវិញ គឺដែនដីម៉ាលីទាំងមូលដែលស្ថិតក្រោមការកាន់កាប់របស់ពួកជីហាតនេះ។
ក្នុងពេលជាមួយគ្នា នៅមានវត្តមានរបស់សាខាអង្គការភេរវនិយមអាល់កៃដាដែលមានសមត្ថភាពអាចធ្វើដំណើរចូលទីក្រុងបាម៉ាកូ។ នេះហើយជាស្ថានការណ៍របស់ប្រទេសម៉ាលីកាលពីឆ្នាំ ២០១៣។ ខ្ញុំបានឮការពន្យល់បកស្រាយ និងការរិះគន់ផ្សេងៗគ្នាជាច្រើន។ តែគេមិនត្រូវភ្លេចនិយាយពីចំណុចដែលយើងបានចេញដំណើរនិងអ្វីដែលកំពុងមាននាពេលសព្វថ្ងៃនេះទេ។ ខ្ញុំនិយាយប្រាប់អស់លោកដោយស្មោះត្រង់ពីអ្វីដែលកំពុងកើតមាននៅម៉ាលីពេលនោះ។ តែគឺអន្តរាគមន៍របស់បារាំងទេតើដែលបានធ្វើឲ្យម៉ាលីចៀសផុតពីព្រឹត្តការណ៍ដ៏អាក្រក់កាលណោះ។
បន្ទាប់មក កម្លាំងទាហានរបស់យើងបានទទួលជោគជ័យយ៉ាងច្រើនដូចជាសម្លាប់បានមេភេរជន Katibat El Forkane ក្នុងខែកុម្ភៈ ឆ្នាំ ២០១៩ ឬក៏មេភេរជនរបស់ចលនា Aqmi Abdelmalek Droukdel ក្នុងខែមិថុនា ឆ្នាំ ២០២០។ ការស្លាប់មេភេរជនទាំងពីរនេះ រួមទាំងមន្រ្តីជាច្រើនរូបទៀតបានធ្វើឲ្យចលនារបស់ពួកគេចុះខ្សោយ និងមិនអាចសម្រេចបាននូវផែនការវាយប្រហារដែលពួកគេបានព្រាងទុក។ ឃើញថា ស្ថានការណ៍របស់ក្រុមភេរវនិយមសព្វថ្ងៃនេះ មិនថានៅប៉ែកខាងជើងម៉ាលី ឬនៅតំបន់ព្រំដែនទាំង ៣ ទេ គឺខុសគ្នាឆ្ងាយណាស់ បើធៀបនឹង ៨ឆ្នាំមុន។ នេះដោយសារតែការងាររបស់បេសកកម្មស៊ែរវ៉ាល់ បន្ទាប់មកបាកាន និងពីក្រុមដៃគូរបស់យើងទាំងអស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ