ស៊ូដង់៖ស្ថានការណ៍នៅក្រុងខាទុំកំពុងបន្តដុនដាបដោយគ្មានឧត្តមសេនីយណាម្នាក់សុខចិត្តទម្លាក់អាវុធចុះ
នៅក្នុងប្រទេសស៊ូដង់ ថ្ងៃព្រហស្បតិ៍ ទី២០ មេសានេះឈានចូលដល់ថ្ងៃទី៥ នៃការវាយប្រហារផ្លូវអាវុធរវាងកម្លាំងរបស់ឧត្តមសេនីយពីររូបក្នុងទីក្រុងខាទុំ។ តុល្យការបណ្តោះអាសន្នផ្តល់ដោយស្ថានទូតបស្ចិមលោកប្រចាំក្រុងខាទុំនាថ្ងៃពុធ ទី១៩ មេសាឲ្យដឹងថា មានមនុស្សស្លាប់យ៉ាងតិច ២៧០នាក់ និងរបួសជិត ៣ ០០០នាក់។ ក្រៅពីចំនួនអ្នកស្លាប់ និងអ្នករបួសដែលនឹងអាចមានច្រើនជាងនេះ ក្រុងខាទុំលែងមានភ្លើងអគ្គិសនីប្រើប្រាស់ ហើយគ្រប់មន្ទីរពេទ្យកំពុងជោរជន់ដោយអ្នករបួសពីការទម្លាក់គ្រាប់បែកដោយទ័ពអាកាស និងការផ្លោងគ្រាប់កាំភ្លើងត្បាល់ពីកម្លាំងប្រដាប់អាវុធរបស់ឧត្តមសេនីយគូបដិបក្ខ។ ក្នុងចំណោមមន្ទីរពេទ្យដែលកំពុងជោរជន់ខ្លាំងដោយអ្នករបួសក៏មានមន្ទីរពេទ្យឯកជន Royal Care International មួយដែរ។ លោកសាលម៉ាន អូម៉ារ គ្រូពេទ្យម្នាក់ដែលបម្រើការនៅក្នុងមន្ទីរពេទ្យឯកជន Royal Care International បានរៀបរាប់ពីស្ថានការណ៍ដែលពិបាកទ្រាំ និងសង្ឃឹមថា ភាគីជម្លោះទាំងពីរនឹងបានដឹង និងបាន ឮ ពីទុក្ខភ័យរបស់ប្រជាជនស៊ូដង់។
ចុះផ្សាយនៅថ្ងៃ៖
ស្តាប់ - ០១:៥៦
« ខ្ញុំមិនគិតថា ស្ថានការណ៍នឹងប្រសើរឡើងទេ ប្រសិនបើភាគីជម្លោះទាំងពីរ កងទ័ព និងកម្លាំងគាំទ្ររហ័ស SFR បន្តប្រឈមមុខផ្លូវអាវុធដាក់គ្នានោះ។ គ្មាននរណាម្នាក់អាចដេកបានឡើយ។ ខ្ញុំមិនបានបិទភ្នែកតាំងពី ៥ថ្ងៃមកហើយ។ ជានិច្ចកាល ខ្ញុំតែងសំឡឹងមើលផ្ទះរបស់ខ្ញុំដែលស្ថិតមិនឆ្ងាយប៉ុន្មានពីមន្ទីរពេទ្យដែលខ្ញុំធ្វើការដើម្បីធានាថា គ្រួសាររបស់ខ្ញុំនឹងមិនជួបបញ្ហាអ្វីទាំងអស់។
នៅពេលដែលគេឮសំឡេងផ្ទុះភ្លាម គេបានលើកទូរស័ព្ទតេរកក្រុមគ្រួសារ ឬមនុស្សជំនិតដើម្បីចង់ដឹងថា គ្មាននរណាម្នាក់កើតអីទេ។ នេះហើយជាជីវិតរបស់ប្រជាជនស៊ូដង់នៅពេលនេះ។ គេមិនដឹងថាតើស្ថានការណ៍របៀបនេះនឹងបិទបញ្ចប់នៅពេលណាទេ។ យើងសង្ឃឹមថា ឧត្តមសេនីយទាំងពីរនាក់ដែលកំពុងឈ្លោះគ្នានឹងឮការអំពាវនាវរបស់យើងឲ្យបញ្ឈប់នូវអ្វីដែលពួកគេទាំងពីរកំពុងធ្វើពេលនេះ ព្រោះមានមនុស្សច្រើនណាស់កំពុងប្រឈមនឹងការបាត់បង់ជីវិត។
យើងមិនខ្វល់ខ្វាយពីរឿងនយោបាយទេ។ តម្រូវការខ្លាំងនៅចំពោះមុខពេលនេះ គឺមនុស្សធម៌។ មានមនុស្សចាស់ មានអ្នករងរបួស និងមានអ្នកជំងឺ។ គេឃើញមានសាកសពពាសវាល ពាសកាលនៅតាមផ្លូវ។ មនុស្សមិនអាចចេញពីផ្ទះដើម្បីទៅប្រមូលយកសាកសពទាំងនេះទៅកប់បានទេ ព្រោះខ្លាចគេសម្លាប់។ វាពិតជាពិបាកខ្លាំងណាស់។ យើងត្រូវការឲ្យមានការបិទបញ្ចប់ការប្រយុទ្ធគ្នាឱ្យបានឆាប់បំផុតដែលអាចធ្វើទៅបាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ