ប្រទេសមួយចំនួនផ្តើមជម្លៀសជនជាតិខ្លួនចេញពីស៊ូដង់ដែលកំពុងធ្លាក់ក្នុងសង្រ្គាមផ្ទៃក្នុង
នៅក្នុងប្រទេសស៊ូដង់ សង្រ្គាមផ្លូវអាវុធកំពុងបន្តមានយ៉ាងហិង្សារវាងកម្លាំងរបស់ឧត្តមសេនីយចំនួនពីររូប គឺលោកអាប់ឌែល ហ្វាតា អាល់ បួរ៉ាន និងលោកម៉ូហាម៉េដ ហាំដាន ដាហ្កាឡូ។ ប្រឈមនឹងព្រឹត្តិការណ៍ដ៏ក្តៅគគុកមួយនេះ ប្រទេសជប៉ុន និងកូរ៉េខាងត្បូងបានប្រកាសក្នុងថ្ងៃសុក្រ ទី២១ មេសាពីការបញ្ជូនយន្តហោះទាហានទៅជម្លៀសពលរដ្ឋខ្លួនចេញពីស៊ូដង់។ អង្គការសុខភាពពិភពលោកបានបញ្ជាក់ពីចំនួនមនុស្សស្លាប់ដែលកើនជាង ៤០០នាក់ និងរបួសជាង ៣ ៥០០នាក់ក្នុងជម្លោះរយៈពេល ៦ថ្ងៃកន្លងទៅ។ ចំណែកអង្គការ Unicef បារម្ភពីសុខភាពក្មេងស៊ូដង់ដែលកំពុងប្រឈមនឹងកង្វះអាហារូបត្ថម្ភ។
ចុះផ្សាយនៅថ្ងៃ៖
ស្តាប់ - ០២:២៨
« មានស្លាប់ចំនួន ៤១៣នាក់ និងរបួសចំនួន ៣ ៥៥១នាក់ »នេះជាតុល្យការប្រកាសដោយលោកស្រី Margaret Harris អ្នកនាំពាក្យអង្គការសុខភាពពិភពលោកនៅក្នុងសន្និសីទកាសែតប្រចាំថ្ងៃក្នុងទីក្រុងហ្សឺណែវ ប្រទេសស៊្វីសនាថ្ងៃសុក្រ ទី២១ មេសា។ ចំណែកអ្នកនាំពាក្យរបស់អង្គការ Unicef លោក James Elder ដែលមានវត្តមានជាមួយលោកស្រី Margaret Harris បានបញ្ជាក់ពីការស្លាប់ក្មេងយ៉ាងតិចចំនួន ៩នាក់ និងបន្ថែមថា ដរាបណាការប្រយុទ្ធគ្នានៅបន្ត ដរាបនោះនឹងមានស្លាប់ក្មេងបន្ថែមទៀត។ តែអ្វីដែលលោក James Elder ចង់ទាញសញ្ញាអាសន្នលើសពីនេះ គឺការព្យួរការព្យាបាលចាំបាច់លើក្មេងប្រមាណជា ៥០ ០០០នាក់ដែលកំពុងប្រឈមនឹងកង្វះអាហារូបត្ថម្ភខ្លាំងតាំងពីមុនផ្ទុះសង្រ្គាម។
បន្ទាប់មក អ្នកនាំពាក្យរបស់អង្គការ Unicef រូបនេះដដែលបានលើកឡើងពីបញ្ហាគ្មានភ្លើងអគ្គិសនី និងមិនអាចប្រើម៉ាស៊ីនភ្លើងបានដោយខ្វះប្រេងសម្រាប់ដំណើរការទូរត្រជាក់ដែលមានផ្ទុកថ្នាំវ៉ាក់សាំងសម្រាប់ចាក់លើក្មេងក្នុងតម្លៃជាង ៤០លានដុល្លារ។ ក្រៅពីនេះ មន្ទីរពេទ្យ មជ្ឈមណ្ឌលសុខភាព និងហេដ្ឋារចនាផ្សេងទៀតត្រូវបានខូចខាត ឬកម្ទេចគ្មានសល់ដោយសង្រ្គាម។ តាមការប៉ាន់ប្រមាណរបស់ Unicef តម្រូវការជំនួយមនុស្សធម៌សម្រាប់ក្មេងស៊ូដង់មានកម្រិតខ្ពស់ខ្លាំងតាំងពីមុនផ្ទុះសង្រ្គាមទៅទៀត។ មានក្មេងស៊ូដង់ចំនួន ៣ភាគ៤ កំពុងរស់ក្នុងស្ថានភាពក្រីក្រខ្លាំង និងមានចំនួន ៧លាននាក់មិនបានទៅសាលារៀនទេ។
តាមលោក James Elderតម្រូវការជំនួយមនុស្សធម៌ពិតជារឿងចាំបាច់ និងសំខាន់ តែ Unicef និងអង្គការដៃគូមិនអាចនាំយកជំនួយនេះទៅជួយក្មេងស៊ូដង់បានទេ ដរាបណាសន្តិសុខ និងសុវត្ថិភាពរបស់ក្រុមបុគ្គលិក Unicef និងអង្គការដៃគូមិនទទួលបានការធានានោះ។ ដោយឡែក ប្រឈមមុខនឹងសង្រ្គាមពុះកញ្ជ្រោលខ្លាំងពេលនេះ ប្រទេសជប៉ុន និងកូរ៉េខាងត្បូងបានប្រកាសបញ្ជូនយន្តហោះទាហានទៅរំដោះជនជាតិខ្លួនចេញពីស៊ូដង់។ តាមក្រសួងការបរទេសកូរ៉េខាងត្បូង មានជនជាតិកូរ៉េខាងត្បូងចំនួន ២៦នាក់ ក្នុងនោះក៏មានមន្រ្តីការទូតកំពុងមានវត្តមាននៅស៊ូដង់។ ពីខាងជប៉ុន គឺមានប្រមាណជា ៦០នាក់ដែលត្រូវជម្លៀសចេញពីស៊ូដង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ