សង្រ្គាមនៅស៊ូដង់៖អង្គការសហប្រជាជាតិអំពាវនាវឲ្យមានបទឈប់បាញ់យ៉ាងតិច ៣ថ្ងៃ
នៅក្នុងប្រទេសស៊ូដង់ ថ្ងៃសុក្រ ទី២១ មេសានេះឈានដល់ថ្ងៃទី៦ នៃការប្រឈមមុខផ្លូវអាវុធដាក់គ្នាយ៉ាងហិង្សារវាងកម្លាំងរបស់ឧត្តមសេនីយចំនួនពីររូប គឺលោកអាប់ឌែល ហ្វាតា អាល់ បួរ៉ាន និងលោកម៉ូហាម៉េដ ហាំដាន ដាហ្កាឡូ។ តុល្យការបណ្តោះអាសន្នបានឲ្យដឹងថា ការប្រយុទ្ធគ្នាតាំងពីថ្ងៃទី១៥ មេសាបានបណ្តាលឲ្យស្លាប់មនុស្សជាង ៣៣០នាក់ និងរបួសជាង ៣ ៣០០នាក់។ តាំងពីថ្ងៃផ្ទុះអាវុធដំបូងមកដល់ពេលនេះ មានការអំពាវនាវពីគ្រប់ទិសទីឲ្យភាគីជម្លោះទាំងពីរទម្លាក់អាវុធចុះ និងចូលអង្គុយតុ ចរចា។ តែការអំពាវនាវនេះមិនត្រូវបានភាគីជម្លោះយកត្រចៀកស្តាប់ទេ។ ជាថ្មីម្តងទៀត ការអំពាវនាវដូចគ្នានេះបានធ្វើឡើងតាមរយៈកិច្ចប្រជុំតាមអនឡាញក្នុងថ្ងៃព្រហស្បតិ៍ ទី២០ មេសារវាងថ្នាក់ដឹកនាំនៃអង្គការអន្តរជាតិ រួមមានអង្គការសហប្រជាជាតិ សហភាពអាហ្រ្វិក សម្ព័ន្ធអារ៉ាប់ និងអង្គការអនុតំបន់ Igad។ ប្រមុខអង្គការសហប្រជាជាតិលោកអង់តូនីញ៉ូ ហ្គូទែរស៍បានអំពាវនាវឲ្យមានបទឈប់បាញ់យ៉ាងតិចចំនួន ៣ថ្ងៃចាប់ពីថ្ងៃសុក្រ ទី២១ មេសានេះទៅដែលជាថ្ងៃដែលអ្នកកាន់សាសនាអ៊ីស្លាមចូលរួមប្រារព្ធពិធីស្រាយបួស។
ចុះផ្សាយនៅថ្ងៃ៖
ស្តាប់ - ០១:៣២
« អាទិភាពភ្លាមៗនៅចំពោះមុខនេះ ខ្ញុំសូមអំពាវនាវឲ្យមានបទឈប់បាញ់យ៉ាងតិចបំផុតចំនួន ៣ថ្ងៃ។ បទឈប់បាញ់រយៈពេល ៣ថ្ងៃចាប់ពីថ្ងៃសុក្រ ទី២១ មេសាដែលជាថ្ងៃប្រារព្ធពិធីស្រាយបួស ឬពិធីបិទបញ្ចប់ការតមអាហាររបស់អ្នកកាន់សាសនាអ៊ីស្លាម។ បទឈប់បាញ់រយៈពេល ៣ថ្ងៃដើម្បីអនុញ្ញាតឲ្យជនស៊ីវិលដែលកំពុងជាប់កុននៅក្នុងតំបន់ជម្លោះភៀសខ្លួនចេញ និងស្វែររកជំនួយថ្នាំពេទ្យ ម្ហូបអាហារ និងតម្រូវការសំខាន់ៗចាំបាច់ផ្សេងទៀតសម្រាប់ជីវិតរស់នៅប្រចាំថ្ងៃ។
បទឈប់បាញ់យ៉ាងតិចរយៈពេល ៣ថ្ងៃនេះជាជំហានដំបូងដែលត្រូវធ្វើមុនគេ ហើយជំហានបន្ទាប់មក គឺការឈានទៅមានបទឈប់បាញ់ជាអចិន្រ្តៃយ៍។ ខ្ញុំយល់ឃើញថា ពិធីស្រាយបួស ឬពិធីបិទបញ្ចប់ការតមអាហាររបស់អ្នកកាន់សាសនាអ៊ីស្លាមជាពេលវេលាត្រឹមត្រូវដើម្បីអនុវត្តបទឈប់បាញ់។ គ្រប់ភាគីជម្លោះទាំងអស់នៅស៊ូដង់ជាអ្នកកាន់សាសនាអ៊ីស្លាម។ យើងកំពុងរស់នៅក្នុងពេលវេលាដ៏សំខាន់មួយនៃប្រតិទិនអ៊ីស្លាម។
យើងបានទាក់ទងជាមួយភាគីទាំងអស់។ យើងគិតថា វាពិតជាអាចទៅរួច។ ក៏ប៉ុន្តែ គ្រប់គ្នាត្រូវរួបរួមគ្នាដាក់សម្ពាធដើម្បីឱ្យបទឈប់បាញ់ត្រូវបានអនុវត្តឱ្យមានប្រសិទ្ធភាព »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ