អង្គការរូបិយវត្ថុអន្តរជាតិ ផ្តល់ជំនួយ ១៩១ លានដុល្លារដល់ សាធារណរដ្ឋអាហ្វ្រិកកណ្តាល
អង្គការរូបិយវត្ថុអន្តរជាតិ បានសម្រេចផ្តល់ជំនួយ ក្នុងតម្លៃជាទឹកប្រាក់ ១៩១ លានដុល្លារ ទៅឲ្យសាធារណរដ្ឋអាហ្វ្រិកកណ្តាល ដើម្បីជួយគាំទ្រប្រទេសនេះ ឲ្យបញ្ចៀសចេញពី«វិបត្តិមនុស្សធម៌»។ នេះបើតាមសេចក្តីថ្លែងការណ៍មួយរបស់ អង្គការរូបិយវត្ថុអន្តរជាតិ ចុះផ្សាយថ្ងៃសុក្រ ទី២៨មេសា និងដែលបញ្ជាក់ទៀតថា ប្រទេសអាហ្វ្រិកកណ្តាល បានសន្យាធានាប្រើប្រាស់កញ្ចប់ថវិកានេះ ឲ្យ«មានតម្លាភាព»។
ចុះផ្សាយនៅថ្ងៃ៖
ស្តាប់ - ០១:៥៩
ជាដំណាក់កាលដំបូង ក្រុមប្រឹក្សារដ្ឋបាលនៃអង្គការរូបិយវត្ថុអន្តរជាតិ បានផ្ទេរទឹកប្រាក់ចំនួន ១១,៣ លានដុល្លារ ឲ្យអាហ្វ្រិកកណ្តាល ដើម្បីប្រទេសនេះ ចាត់ចែងចំណាយ ជាអាទិភាពទៅលើវិស័យសាធារណៈ ដូចជាវិស័យ សុខាភិបាល និងអប់រំ។ នៅក្នុងកញ្ចប់កម្មវិធីជំនួយ ក៏បានចែកពីការជួយគាទ្រំ ពង្រឹកផ្នែកកិច្ចការរដ្ឋបាល ហិរញ្ញវត្ថុ និង ពន្ធ ជាដើម ។
ក្នុងសេចក្តីថ្លែងការណ៍ ចៅហ្វាយរង នៃ អង្គការរូបិយវត្ថុអន្តរជាតិ លោក Kenji Okamura បានគូសបង្ហាញថា សាធារណរដ្ឋអាហ្វ្រិកកណ្តាល ទទួលរងគ្រោះធ្ងន់ធ្ងរពីជំងឺឆ្លងរាតត្បាលសកល ជំងឺកូវីដ១៩។ ប្រទេសនេះ ជួបបញ្ហាអសន្តិសុខជាខ្លាំងនៅផ្ទៃក្នុងប្រទេស ហើយនិង ទទួលផលប៉ះពាល់អាក្រក់ពីសង្គ្រាមអ៊ុយក្រែន ថែមទៀត។ រីឯ បញ្ហាខ្វះស្បៀងអាហារ ក៏ចោទជាចំណោទខ្លាំងណាស់ដែរ។ ក្នុងចំណោមប្រជាពលរដ្ឋ ៥,៥ លាននាក់ គឺមានប្រជាជន ជាង ៣ លាននាក់ កំពុងខ្វះស្បៀង និងត្រូវការជំនួយសង្គ្រោះបន្ទាន់។
បើតាមអង្គការសហប្រជាជាតិ សាធារណរដ្ឋអាហ្វ្រិកកណ្តាល ជាប្រទេសជាប់លំដាប់ថ្នាក់ទី២ ដែលក្រីក្រជាងគេលើពិភពលោក។ ប្រទេសនេះ ធ្លាក់ខ្លួនក្រីក្រខ្លាំង ព្រោះតែ សង្គ្រាមស៊ីវិល ដែល អូសបន្លាយ ជិត ១០ឆ្នាំហើយ និងទើបតែបានធូរស្រាលបន្តិច នៅ២០១៨ ក៏ប៉ុន្តែ ជាអកុសល ២ ឆ្នាំក្រោយមក ការផ្ទុះអាវុធ ចាប់មានជាថ្មី។
ទុក្ខជាន់លើកទុក្ខ! សង្គ្រាមស៊ីវិល នៅស៊ូដង់ ផ្ទុះឡើងពីរសប្តាហ៍មកនេះ គឺធ្វើឲ្យពលរដ្ឋរត់ភៀសខ្លួន ហើយមានមួយចំណែក ក៏បានភៀសខ្លួន ចូលទៅ សាធារណរដ្ឋអាហ្វ្រិកកណ្តាល ដែរ។ នៅថ្ងៃព្រហស្បតិ៍ ការិយាល័យសម្របសម្រួលមនុស្សធម៌របស់អង្គការសហប្រជាជាតិប្រចាំអាហ្វ្រិកកណ្តាល បញ្ជាក់ថា មានពលរដ្ឋស៊ូដង់ ប្រមាណ ៣ ពាន់នាក់ ភៀសខ្លួនទៅ សាធារណរដ្ឋ អាហ្វ្រិកកណ្តាល ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ