អាមេរិកដាក់ទណ្ឌកម្មលើក្រុមហ៊ុនចិនដែលផ្តល់រូបភាពផ្កាយរណបដល់ក្រុមទាហានស៊ីឈ្នួលរុស្ស៊ី Wagner
ក្រសួងហិរញ្ញវត្ថុអាមេរិក កាលពីថ្ងៃព្រហស្បតិ៍ម្សិលមិញ បានដាក់ទណ្ឌកម្មសេដ្ឋកិច្ចទៅលើក្រុមហ៊ុនទាហានស៊ីឈ្នួលរុស្ស៊ី Wagner ដែលអាមេរិកចោទប្រកាន់ថា កំពុងធ្វើសកម្មភាពយោធាជួយរុស្ស៊ី នៅអ៊ុយក្រែន និងនៅទឹកដី អាហ្វ្រិក។ នៅក្នុងក្របខ័ណ្ឌនៃការដាក់ទណ្ឌកម្ម ទៅលើក្រុមហ៊ុន Wagner ក្រសួងហិរញ្ញវត្ថុអាមេរិកបានដាក់ទណ្ឌកម្មផងដែរទៅលើក្រុមហ៊ុនចិនមួយ ក្នុងបទចោទប្រកាន់ផ្គត់ផ្គង់រូបភាពផ្កាយរណបស្តីពីភូមិសាស្រ្តអ៊ុយក្រែន ទៅឲ្យក្រុមហ៊ុន ទាហានស៊ីឈ្នួលរុស្សី Wagner។
ចុះផ្សាយនៅថ្ងៃ៖
ស្តាប់ - ០២:១៧
នៅថ្ងៃព្រហស្បតិ៍ ក្រសួងការបរទេស និងក្រសួងហិរញ្ញវត្ថុអាមេរិកបានប្រកាសជាផ្លូវការ ចាត់បញ្ចូលក្រុមទាហានស៊ីឈ្នួលរុស្ស៊ី Wagnerទៅក្នុងបញ្ជី អង្គការឧក្រិដ្ឋកម្មឆ្លងដែន។ ការដាក់បញ្ចូលក្រុមទាហានស៊ីឈ្នួលរុស្ស៊ី ទៅក្នុងបញ្ជីខ្មៅ ជាផ្នែកមួយនៃការដាក់ទណ្ឌកម្មរបស់អាមេរិក ដែលសំដៅប្រឆាំងមន្រ្តី និងក្រុមហ៊ុនរុស្ស៊ី ដែលមានទំនាក់ទំនងជិតស្និទ្ធិនឹងអំណាចពូទីន។
តាមសេចក្តីថ្លែងការណ៍របស់ក្រសួងហិរញ្ញវត្ថុអាមេរិក ទាហានស៊ីឈ្នួលរុស្ស៊ី Wagner បានប្រព្រឹត្តឧក្រិដ្ឋកម្មធ្ងន់ធ្ងរ នៅ ទឹកដីអាហ្វ្រិក ដូចជាការប្រហារជីវិតមនុស្សដ៏ឃោឃៅ ការចាប់រំលោភ ការចាប់ជំរិត នៅអាហ្វ្រិកកណ្តាល នៅប្រទេសម៉ាលីជាដើម។
ក្រៅពីដាក់បញ្ចូលក្រុមទាហានស៊ីឈ្នួលរុស្ស៊ី Wagner ទៅក្នុងបញ្ជីខ្មៅ ក្រសួងហិរញ្ញវត្ថុអាមេរិកបានប្រកាសដាក់ទណ្ឌកម្មថ្មីទៅក្រុមទាហានWagner តាមរយៈការផ្អឹបទុកទ្រព្យសម្បត្តិ ដែលក្រុមនេះ មាននៅក្នុងទឹកដីអាមេរិក។ ទណ្ឌកម្មថ្មី នឹងហាមផងដែរ ជនជាតិអាមេរិក ផ្តល់ហិរញ្ញវត្ថុ ជំនួយសេវាដល់ក្រុមហ៊ុន ទាហានស៊ីឈ្នួលរុស្ស៊ី។
នៅក្នុងក្របខ័ណ្ឌនៃការដាក់ទណ្ឌកម្មសេដ្ឋកិច្ចលើក្រុមទាហានស៊ីឈ្នួល Wagner អាជ្ញាធរអាមេរិកបានប្រកាសដាក់ទណ្ឌកម្មលើក្រុមហ៊ុនបរទេសពីរ ដែលបានផ្តល់ជំនួយដល់ក្រុមទាហាន Wagner។
ទីមួយ គឺក្រុមហ៊ុនបច្ចេកវិទ្យា ចិន Changsha Tianyi SpaceScience and Technology Research Institute ដែលក្រសួងហិរញ្ញវត្ថុអាមេរិកចោទប្រកាន់ថា បានផ្តល់រូបភាពផ្កាយរណបដែលបង្ហាញ ពីទីតាំងភូមិសាស្រ្តអ៊ុយក្រែន ទៅឲ្យទាហានស៊ីឈ្នួលរុស្ស៊ី Wagner។ ក្រុមហ៊ុនបរទេសទី២ដែលជាប់ទណ្ឌកម្មរបស់ក្រសួងហិរញ្ញវត្ថុអាមេរិក គឺក្រុមហ៊ុនអាកាសចរណ៍ស៊ីវិល Kratol ដែលមានមូលដ្ឋាននៅប្រទេសអេមីរ៉ាតអារ៉ាប់រួម ដែលរងការចោទប្រកាន់របស់អាមេរិកថា បានផ្តល់យន្តហោះសម្រាប់ដឹកជញ្ជូនទាហានស៊ីឈ្នួល Wagner ពីអាហ្រ្វិកកណ្តាល ទៅម៉ាលី និងលីប៊ី។
បង្កើតឡើងដោយមហាសេដ្ឋី អេវហ្គេនី ព្រីហ្គោហ្ស៊ីន Evgueni Prigojine ដែលកំពុងឡើងឥទ្ធិពលកាន់តែខ្លាំងនៅវិមានក្រេមឡាំង ក្រុមទាហានស៊ីឈ្នួល Wagnerមានវត្តមានកាន់តែសកម្មនៅអ៊ុយក្រែន។ តាមមន្ទីរបញ្ចកោន ក្រុមទាហានស៊ីឈ្នួលរុស្ស៊ី Wagnerបានបញ្ជូនកម្លាំងប្រមាណ៥ម៉ឺននាក់ទៅប្រយុទ្ធនៅក្នុងប្រទេសអ៊ុយក្រែន ក្នុងនោះ១ម៉ឺននាក់ជាទាហានស៊ីឈ្នួល និង៤ ម៉ឺននាក់ ជាឧក្រិដ្ឋជន ជាប់ពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ