អ៊ូហ្កង់ដា៖ ពួកឧទ្ទាមជីហាត វាយប្រហារសាលារៀន ស្លាប់កូនសិស្ស ៣៧នាក់
នៅប្រទេស អ៊ូហ្កង់ដា ពួកឧទ្ទាមប្រដាប់អាហ្វ្រិកភ្ជាប់ខ្លួននឹងអង្គការរដ្ឋអ៊ីស្លាមជីហាត បានវាយប្រហារលើវិទ្យាល័យមួយ ដែលបណ្តាលឲ្យស្លាប់សិស្សានុសិស្ស ចំនួន ៣៧នាក់។ នេះបើតាមអាជ្ញាធរការពារជាតិអ៊ូហ្កង់ដា។ ការហេតុការណ៍សោកនាដកម្មនេះ បានកើតឡើងនៅរាត្រីថ្ងៃសុក្រឈានចូលថ្ងៃសៅរ៍ ដែលបានធ្វើឲ្យខូចខាតអន្តេវាសិកដ្ឋាន និងហាងបាយនៅសាលារៀន។
ចុះផ្សាយនៅថ្ងៃ៖
ស្តាប់ - ០២:២៣
ពេលផ្ទុះហេតុការណ៍វាយប្រហារភ្លាមៗ គេរកឃើញសកសពមនុស្ស ២៥ នាក់ ហើយ មនុស្ស ៨នាក់ទៀត រងរបួសខ្លាំងនិងឆេះពេញខ្លួន ត្រូវបញ្ជូនទៅមន្ទីរពេទ្យ។ ជាអកុសល ព្រោះសារតែរបួសធ្ងន់ធ្ងរខ្លាំងពេក ជនរងគ្រោះបានស្លាប់ជាបន្តបន្ទាប់ៗ។ ជាសរុប ចំនួនជនរង្គ្រោះ ក្នុងហេតុការណ៍វាយប្រហារសាលារៀននៅព្រំដែនអ៊ូហ្កង់ដា ស្លាប់ ៣៧ នាក់ គិតត្រឹមថ្ងៃរសៀលថ្ងៃសៅរ៍។
នេះគឺជាស្នាដៃរបស់ ក្រុមឧទ្ទាមប្រដាប់អាវុធ ADF ដែលជាក្រុមនិយមចូលចិត្តសាសនាអ៊ីស្លាម និងមានកំណើតនៅអំលុងទសវត្សរ៍១៩៩០។ ពួកនេះ បានប្រកាសភ្ជាប់ខ្លួនទៅនឹងក្រុមអង្គការរដ្ឋអ៊ីស្លាម នៅឆ្នាំ២០១៩ ហើយ តាំងខ្លួនជាតំណាងសាខាជីហាតនៅតំបន់អាហ្វ្រិកកណ្តាល និងបានធ្វើព្យុះធ្វើភ្លៀង បង្កគ្រោះភ័យខ្លាចសម្បើមខ្លាំង នៅតំបន់អាហ្វ្រិក ពិសេសនៅព្រំប្រទល់ដែន អ៊ូហ្កង់ដា នៅសាធារណរដ្ឋប្រជាធិបតេយ្យកុងហ្គោ និង នៅប្រទេសរ៉វាន់ដា។
ក្នុងខែមេសាកន្លងទៅនេះ ក្រុមឧទ្ទាមកម្លាំងប្រដាប់អាវុធ ADF បានវាយប្រហារលើភូមិអ្នកស្រុកមួយ នៅប៉ែកខាងកើត សាធារណរដ្ឋប្រជាធិបតេយ្យកុងហ្គោ ហើយសម្លាប់មនុស្សយ៉ាងហោច ២០ នាក់។
ក្រៅពីសកម្មភាពវាយប្រហារសម្លាប់មនុស្ស សម្លាប់ជនស៊ីវិល ពួកឧទ្ទាមនេះ ក៏ចាប់ជំរិតមនុស្សដែរ។ ការវាយប្រហារទៅលើសាលារៀនគ្រានេះ គឺ ពុំមែនជាស្នាដៃលើកទី១ នោះទេ ចំពោះពួកឧទ្ទាមADF។ នៅខែមិថុនា ឆ្នាំ១៩៩៨ សិស្សានុសិស្ស ប្រមាណ ៨០ នាក់ បានរងគ្រោះនិងឆេះស្លាប់ នៅក្នុងការវាយប្រហារទៅលើ អន្តេវាសិកដ្ឋាន នៅក្បែរព្រំដែនកុងហ្កោ ពីសំណាក់ ពួកឧទ្ទាមប្រដាប់អាវុធ ADF។ ពួកនេះ បានចាប់ខ្លួនសិស្សនិងនិស្សិត ជាង១០០នាក់ ទៅជាមួយផង។
នេះបើតាមព័ត៌មាន ពី អាជ្ញាធរអ៊ូហ្កង់ដា។ អ៊ូហ្កង់ ដើម្បីទប់ទល់នឹងពួកឧទ្ទាមប្រដាប់អាវុធនេះ ក៏បានសហការជាមួយ កុងហ្កោ តាំងពីឆ្នាំ២០២១មក ក្នុងការបញ្ជូនកងទ័ពទៅព្រំដែន តាមកម្ទេចពួកឧទ្ទាម។
ដោយឡែក សហរដ្ឋអាមេរិក បានប្រកាសនៅដើមខែមីនា កន្លងទៅ ថានឹងផ្តល់រង្វាន់ រហូតដល់ ៥ លានដុល្លារ ចំពោះបុគ្គលណាដែលផ្តល់ព័ត៌មាន ឈានទៅចាប់ឃាត់ខ្លួន មេក្រុមឧទ្ទាមអ៊ូហ្កង់ដា ឈ្មោះ Musa Baluku៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ