ស៊ូដង់៖អង្គការសហប្រជាជាតិអំពាវនាវឲ្យចាត់វិធានការបញ្ឈប់ការសម្លាប់មនុស្សនៅតំបន់ដារហ្វួរ
នៅថ្ងៃសៅរ៍ ទី២៤ មិថុនា ឧត្តមស្នងការដ្ឋានសិទ្ធិមនុស្សអង្គការសហប្រជាជាតិបានស្នើឲ្យចាត់វិធានការភ្លាមជាបន្ទាន់ដើម្បីបិទបញ្ចប់ការសម្លាប់មនុស្សដែលភៀសខ្លួនចេញពីតំបន់ដារហ្វួរខាងកើតក្នុងប្រទេសស៊ូដង់។ តាមឧត្តមស្នងការដ្ឋានសិទ្ធិមនុស្សអន្តរជាតិ ការសម្លាប់មនុស្សនេះជាស្នាដៃរបស់កម្លាំងស្វាយត្រានអារ៉ាប់ដែលបានជួយកម្លាំងរបស់មេបញ្ជាការកងអាវុធហត្ថប្រតិបត្តិការរហ័សលោកហាំដាន ដាហ្កាឡូ។ គួរបញ្ជាក់ថា ជាង ២ខែដែលស៊ូដង់បានធ្លាក់ក្នុងជម្លោះរវាងឧត្តមសេនីយហាំដាន ដាហ្កាឡូ និងឧត្តមសេនីយហ្វាតា អាល់ បួរ៉ានដែលជាអគ្គមេបញ្ជាការកងទ័ពជាតិស៊ូដង់។
ចុះផ្សាយនៅថ្ងៃ៖
ស្តាប់ - ០២:១៩
ឧត្តមស្នងការដ្ឋានសិទ្ធិមនុស្សអន្តរជាតិបានបញ្ជាក់នៅក្នុងសេចក្តីប្រកាសព័ត៌មានដោយសម្តែងក្តីបារម្ភជាពន់ពេកចំពោះព្រឹត្តិការណ៍ដែលកំពុងបន្តកើតមាននៅក្នុងទីក្រុង El-Geneina របស់រដ្ឋនៃតំបន់ដារហ្វួរខាងលិចក្នុងប្រទេសស៊ូដង់។ ព្រឹត្តិការណ៍ដែលឧត្តមស្នងការដ្ឋានសិទ្ធិមនុស្សអន្តរជាតិចង់និយាយ គឺការសម្លាប់មនុស្ស ពិសេសសម្លាប់បុរសជាកុលសម្ព័ន្ធ Masalit ដែលបានភៀសខ្លួនចេញពីទីក្រុង El-Geneina និងពីតំបន់ទៅកាន់ប្រទេសឆាដក្បែរខាង។ ឧត្តមស្នងការដ្ឋានសិទ្ធិមនុស្សអន្តរជាតិបានទទួលព័ត៌មាននេះនៅក្រោយការសាកសួរជនភៀសខ្លួនចំនួន ១៦នាក់ដែលបានរត់ទៅជ្រកកោនក្នុងប្រទេសឆាដ។
ចំណែកជនជនដៃដល់ គឺពួកស្វាយត្រានអារ៉ាប់ដែលបានជួយគាំទ្រកម្លាំងរបស់មេបញ្ជាការកងអាវុធហត្ថប្រតិបត្តិការរហ័សលោកហាំដាន ដាហ្កាឡូ។ នៅក្នុងន័យនេះ ឧត្តមស្នងការដ្ឋានសិទ្ធិមនុស្សអន្តរជាតិបានអំពាវនាវឲ្យចាត់វិធានការភា្លមៗដើម្បីបិទបញ្ចប់ទង្វើរបស់ពួកស្វាយត្រានអារ៉ាប់ និងបានស្នើឲ្យមានការធានាចំពោះអ្នកដែលចង់ភៀសខ្លួន និងការបើកផ្លូវឲ្យទីភ្នាក់ងារមនុស្សធម៌អាចចូលទៅកាន់តំបន់ជម្លោះដើម្បីប្រមូលសាកសព។ គួរបញ្ជាក់ថា តាំងពីថ្ងៃទី១៥ មេសាដែលស៊ូដង់បានធ្លាក់ក្នុងជម្លោះរវាងឧត្តមសេនីយពីររូប គឺលោកហ្វាតា អាល់ បួរ៉ានដែលជាអគ្គមេបញ្ជាការកងទ័ពជាតិ និងលោកហាំដាន ដាហ្កាឡូដែលជាមេបញ្ជាការកងអាវុធហត្ថប្រតិបត្តិការរហ័ស។
ជម្លោះរវាងឧត្តមសេនីយជើងខ្លាំងទាំងពីរបានបណ្តាលឲ្យមានមនុស្សស្លាប់ជាង ២ ០០០នាក់ និងមានអ្នកបម្លាស់ទីក្នុងស្រុក និងអ្នកភៀសខ្លួនចេញពីស្រុកកំណើតសរុបជាង ២លាន ២សែននាក់។ គ្រាន់នៅក្នុងទីក្រុង El-Geneina តែមួយ និងបើគិតតាំងពីដើមសប្តាហ៍ មានមនុស្សចំនួន ១ ១០០នាក់ត្រូវបានសម្លាប់។ ក្រៅពីឃាតកម្មសម្លាប់ និងការប្រើអំពើហិង្សាផ្សេងៗក៏មានការប្រើភាសាឲ្យមានការស្អប់ខ្ពើមទៅលើអ្នកភៀសខ្លួនចេញពីទីក្រុង El-Geneina ដែរ។ ប្រឈមនឹងព្រឹត្តិការណ៍នៅទីក្រុង El-Geneina មួយនេះ ឧត្តមស្នងការដ្ឋានសិទ្ធិមនុស្សអន្តរជាតិបានអំពាវនាវដល់ថ្នាក់ដឹកនាំកងអាវុធហត្ថប្រតិបត្តិការរហ័សឲ្យចូលអន្តរាគមន៍បិទបញ្ចប់ជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ