បារាំងព្រមានវាយតបវិញ បើសិនមានការវាយប្រហារលើប្រជាជន ផលប្រយោជន៍បារាំងនៅនីហ្សេ
ប្រទេសនីហ្សេ ៤ថ្ងៃក្រោយរដ្ឋប្រហារយោធា មនុស្សរាប់ម៉ឺននាក់បានលើកគ្នាធ្វើបាតុកម្មតវ៉ា នៅមុខស្ថានទូតបារាំង ក្នុងរដ្ឋធានី នីអាម៉េ កាលពីថ្ងៃអាទិត្យ។ ក្រោមការអំពាវនាវរបស់ចលនាស៊ីវិលM៦២ ដែលធ្លាប់ចេញមុខប្រឆាំងបេសកកម្មយោធា របស់បារាំងឈ្មោះ បាកាន នៅតំបន់សាហែល បាតុករនីហ្សេ ស្រែកទាមទារឲ្យបារាំងចាកចេញពីប្រទេសនីហ្សេ ចំណែកមួយចំនួនទៀតដណ្តើមគ្នាដកស្លាកឈ្មោះស្ថានទូត ដើម្បីជំនួសវិញ ដោយទង់ជាតិរុស្ស៊ី។ នៅថ្ងៃអាទិត្យ វិមានប្រធានាធិបតីបារាំងព្រមានចាត់វិធានការឆ្លើយតបភ្លាមៗ មិនអាចប្រកែកបាន ក្នុងករណីដែលមានការវាយប្រហារលើជនជាតិបារាំងនៅនីហ្សេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
នៅមុខស្ថានទូតបារាំង ស្ថិតនៅចំកណ្តាលរដ្ឋធានីនីអាម៉េ បាតុករនីហ្សេរាប់ម៉ឺននាក់បានប្រមូលផ្តុំគ្នាធ្វើបាតុកម្ម លើកបដា ស្រែកតវ៉ា ទាមទារឲ្យកម្លាំងទ័ពលោកខាងលិចចាកចេញពីប្រទេសនីហ្សេ។ បាតុករមួយចំនួនព្យាយាមផ្លោះរបងចូលស្ថានទូត ចំណែក មនុស្សមួយក្រុមប្រើកម្លាំងដកស្លាកឈ្មោះស្ថានទូតបារាំង យកទៅជាន់ឈ្លីលើថ្នល់ មុននឹងដាក់ជំនួសដោយទង់ជាតិរុស្ស៊ី។ បាតុករខ្លះទៀត គប់ដុំថ្មសំដៅអគារស្ថានទូតបារាំងមុននឹងត្រូវឆ្មាំការពារជាតិនីហ្សេបាញ់ផ្សែងបង្ហូរទឹកភ្នែក បំបែកក្រុមបាតុកម្ម។
សម្រាប់ប្រជាជននីហ្សេ ដែលចេញធ្វើបាតុកម្មទៅតាមការអំពាវនាវរបស់ចលនាស៊ីវិល M៦២ ដែលជាចលនាប្រឆាំងបេសកកម្មយោធារបស់បារាំង នៅនីហ្សេ ដែលជាផ្នែកមួយនៃតំបន់សាហែល គេប្រឆាំងដាច់ខាត ការលូកដៃរបស់បារាំង នៅក្នុងកិច្ចការផ្ទៃក្នុងនីហ្សេ។
ប្រតិកម្មទៅនឹងការធ្វើបាតុកម្ម នៅមុខស្ថានទូតនៅរដ្ឋធានី នីអាម៉េ វិមានអេលីហ្សេ កាលពីថ្ងៃអាទិត្យចេញសេចក្តីថ្លែងការណ៍ ដែលនៅក្នុងនោះ ប្រធានាធិបតីបារាំង លោកម៉ាក្រុងអះអាងថា នឹងមិនអត់ឱនឲ្យដាច់ខាតរាល់ការវាយប្រហារលើផលប្រយោជន៍របស់បារាំង នៅនីហ្សេ។ តាមវិមានប្រធានាធិបតីបារាំង បារាំងនឹងចាត់វិធានការតបភ្លាមៗ ដាច់ខាត ក្នុងករណីមានការវាយប្រហារទៅលើប្រជាជន កងទ័ព និងក្រុមហ៊ុនបារាំង ក្នុងប្រទេសនីហ្សេ។
នៅនីហ្សេ អតីតប្រទេសក្រោមអាណានិគម និងជាប្រទេសសម្ព័ន្ធមិត្តអាហ្រ្វិកចុងក្រោយ របស់បារាំង សម្រាប់បេសកកម្មយោធាប្រយុទ្ធប្រឆាំងនឹងក្រុមភេរវនិយម នៅតំបន់សាហែល បារាំងមានប្រជាជនរបស់ខ្លួន ពី ៥០០ ទៅ ៦០០នាក់ និងមានទាហានប្រចាំការ ១៥០០នាក់។ ដូចអាមេរិក និងសហភាពអឺរ៉ុប បារាំងប្រកាសកាលពីថ្ងៃសៅរ៍ ផ្អាកជំនួយសម្រាប់នីហ្សេ នៅក្រោយរដ្ឋប្រហារយោធាផ្តួលរដ្ឋាភិបាលស៊ីវិល កាលពីយប់ថ្ងៃពុធទី ២៦កក្កដា។
៤ថ្ងៃក្រោយធ្វើរដ្ឋប្រហារទម្លាក់រដ្ឋាភិបាលស៊ីវិល របស់លោកប្រធានាធិបតីបាហ្ស៊ូម របបសឹកនីហ្សេ ដឹកនាំដោយអតីតប្រធានអង្គរក្សប្រធានាធិបតី គំរាមថា ខ្លួនប្រឆាំងដាច់ខាតនឹងការធ្វើអន្តរាគមន៍យោធាពីខាងក្រៅ។ ថ្កោលទោសការធ្វើរដ្ឋប្រហារយោធានៅនីហ្សេ ក្រុមប្រទេសអាហ្វ្រិកខាងលិច បានបើកជំនួបកំពូលបន្ទាន់ នៅប្រទេសនីហ្សេរីយ៉ា មុននឹងចេញសេចក្តីសម្រេចរួម ទាមទារឲ្យកងទ័ពដោះលែងប្រធានាធិបតី និងស្តាររដ្ឋាភិបាលស៊ិវិលឡើងវិញ។ នៅក្នុងសេចក្តីថ្លែងការណ៍ កាលពីថ្ងៃអាទិត្យ មេដឹកនាំរបស់សហគមន៍សេដ្ឋកិច្ចអាហ្វ្រិកខាងលិច ចំនួន ១៥ប្រទេស ដែលមាននីហ្សេ ជាសមាជិក ហៅកាត់ជាភាសាបារាំង Cedeao បានដាក់កំហិត ៧ថ្ងៃឲ្យយោធា ប្រគល់អំណាច ទៅឲ្យលោកប្រធានាធិបតី បាហ្ស៊ូម បើសិនមិនចង់រងការដាក់ទណ្ឌកម្មសេដ្ឋកិច្ច និងការចាត់វិធានការខ្លាំង ដែលនៅក្នុងនោះ មានផងដែរ ការប្រើកម្លាំងយោធា។ សេចក្តីសម្រេចរបស់Cedeao ចែងផងដែរពីការផ្អាកការដោះដូរពាណិជ្ជកម្ម និងហិរញ្ញវត្ថុ រវាងប្រទេសសមាជិកជាមួយប្រទេសនីហ្សេ និងការផ្អឹបរាល់ទ្រព្យសម្បត្តិរបស់ពួកយោធាដែលចូលរួមធ្វើរដ្ឋប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ