អង់គ្លេស៖សភាបានបោះឆ្នោតគាំទ្រកិច្ចព្រមព្រៀង Brexit ដែលលោកបូរីស ចនសុនបានចរចាជាមួយអឺរ៉ុប
នៅក្នុងប្រទេសអង់គ្លេស សភាបានបោះឆ្នោតគាំទ្រកិច្ចព្រមព្រៀង Brexit ដែលនាយករដ្ឋមន្រ្តីលោកបូរីស ចនសុនបានចរចាជាមួយអឺរ៉ុបកាលពីរដូវស្លឹកឈើជ្រុះកន្លងមក។ ជាមួយនឹងការផ្តល់ភ្លើងខៀវពីសភាពេលនេះ អង់គ្លេសនឹងអាចចាកចេញពីអឺរ៉ុបជាផ្លូវការនៅថ្ងៃទី៣១ មករាខាងមុខ។ តែមុនឈានដល់គោលដៅមួយនេះ កិច្ចព្រមព្រៀដដែលនេះត្រូវទទួលបានការយល់ព្រមពីព្រឹទ្ធសភា និងការប្រកាសដាក់ឲ្យអនុវត្តន៍ពីព្រះមហាក្សត្រិយានីជាមុនសិន។ បន្ទាប់មក ជាតួនាទីរបស់សភាអឺរ៉ុបដែលត្រូវឲ្យសច្ចាប័នលើកិច្ចព្រមព្រៀងមួយនេះ។
ចុះផ្សាយនៅថ្ងៃ៖
ស្តាប់ - ០២:៤១
បន្ទាប់ពីមានភាពសម្រូងចម្រាសអស់រយៈពេល ៣ឆ្នាំកន្លះមក សំណុំរឿង Brexit រវាងប្រទេសអង់គ្លេស និងសហភាពអឺរ៉ុបហាក់បានឈានដល់គោលដៅរបស់វាហើយ។ កិច្ចព្រមព្រៀង Brexit កម្រាស់ ៥៣៥ទំព័រដែលនាយករដ្ឋមន្រ្តីអង់គ្លេសលោកបូរីស ចនសុនបានចរចាជាមួយអឺរ៉ុបក្នុងរដូវស្លឹកឈើជ្រុះកន្លងមកទទួលបានសម្លេងគាំទ្រលើសលប់ពីសភាជាមួយនឹងសម្លេងគាំទ្រចំនួន ៣៣០សម្លេងទល់នឹងសម្លេងប្រឆាំងចំនួន ២៣១សម្លេង។ បន្ទាប់ពីសភា កិច្ចព្រមព្រៀងដដែលនេះក៏ត្រូវមានការយល់ព្រមពីព្រឹទ្ធសភា និងការប្រកាសដាក់ឲ្យប្រើប្រាស់ពីព្រះមហាក្សត្រិយានីដែរ។ តែនេះគ្រាន់ជានីតិវិធីផ្លូវការប៉ុណ្ណោះ។ បន្ទាប់មកទៀត ជាតួនាទីរបស់សភាអឺរ៉ុបដែលត្រូវឲ្យសច្ចាប័ន។
បើអ្វីៗមានដំណើរដោយរលូន អង់គ្លេសនឹងត្រូវចេញពីអឺរ៉ុបជាផ្លូវការនៅថ្ងៃទី៣១ មករា។ « វាដល់ពេលដែលត្រូវបោះជំហានទៅមុខ » នេះជាការបញ្ជាក់របស់រដ្ឋមន្រ្តីអង់គ្លេសទទួលបន្ទុកសំណុំរឿង Brexit លោក Steve Barclay។ តាមលោក Steve កិច្ចព្រមព្រៀងមួយនេះនឹងធានាការចាកចេញរបស់អង់គ្លេសពីអឺរ៉ុប ផ្តល់ភាពច្បាស់លាស់ដល់សហគ្រាស និងការពារសិទ្ធិរបស់ពលរដ្ឋអង់គ្លេស ព្រមទាំងធានាថា អង់គ្លេសនឹងយកលុយ ព្រំដែន ច្បាប់ និងនយោបាយពាណិជ្ជកម្មរបស់ខ្លួនមកគ្រប់គ្រងក្នុងដៃវិញ។ គួររម្លឹកថា តាំងពីឆ្នាំ ២០១៦ ដែលពលរដ្ឋអង់គ្លេសបានបោះឆ្នោតឲ្យអង់គ្លេសលែងលះពីអឺរ៉ុប។ តែនីតិវិធីលែងលះមួយនេះបានប្រទាញប្រទង់ និងអូសបន្លាយមកដល់សព្វថ្ងៃ។
៣ឆ្នាំកន្លះក្រោយមក Brexit ហាក់សម្លឹងឃើញផ្លូវចាកចេញជាផ្លូវការរបស់ខ្លួនហើយ តែនេះមិនមែនមានន័យថា អ្វីៗនឹងត្រូវចប់ត្រឹមថ្ងៃទី៣១ មករានៅម៉ោង ១១យប់ខាងមុខទេ។ នៅក្រោយថ្ងៃទី៣១ មករា កិច្ចព្រមព្រៀងបានគ្រោងរយៈពេលអន្តរកាលមួយរហូតដល់ថ្ងៃទី៣១ ធ្នូ ឆ្នាំ ២០២០។ ក្នុងរយៈពេលនេះ អង់គ្លេសបន្តអនុវត្តន៍ច្បាប់ និងទទួលប្រយោជន៍របស់សហភាពអឺរ៉ុប រួមទាំងបន្តផ្តល់វិភាគឲ្យសហភាពអឺរ៉ុប។ តែមិនអាចបន្តមានអសនៈនៅសភាអឺរ៉ុប និងការចូលរួមបោះឆ្នោតអ្វីទេ។ ក្នុងរយៈពេលអន្តរកាលដដែលនេះ អង់គ្លេស និងអឺរ៉ុបនឹងបន្តជជែកគ្នាដើម្បីស្វែងរកកិច្ចព្រមព្រៀងស្តីពីសន្តិសុខ ស្តីពីការដោះដូរសេរី ឬស្តីពីទំនាក់ទំនងអនាគតរវាងគ្នា។ តាមធម្មតា រយៈពេលអន្តរកាលនេះអាចពន្យារបានមួយដងគត់។ តែលោកបូរីស ចនស៊ុនបានបញ្ជាក់ពីការមិនពន្យារពេលលើសពីថ្ងៃទី៣១ ធ្នូ ឆ្នាំ ២០២០ នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ