អ៊ីរ៉ង់ព្រមានភាគីអឺរ៉ុប ដែលកំពុងដាក់គំនាបឲ្យអ៊ីរ៉ង់ត្រូវគោរពតាមកិច្ចព្រមព្រៀងនុយក្លេអ៊ែរ
ភាគី អឺរ៉ុប និងអ៊ីរ៉ង់បានប៉ះទង្គិចសំដីគ្នាសាជាថ្មី កាលពីថ្ងៃ បន្ទាប់ពី ប្រទេសនៅអឺរ៉ុប ដូចជា បារាំង អាល្លឺម៉ង់ និងអង់គ្លេសដែលសុទ្ធជាហត្ថលេខី នៃកិច្ចព្រមព្រៀងនុយក្លេអ៊ែរ អ៊ីរ៉ង់ បានចាប់អនុវត្តជាផ្លូវការ យន្តការ ដោះស្រាយវិវាទ ជាមួយ អ៊ីរ៉ង់ ដែលមានចែងនៅក្នុងកិច្ចព្រមព្រៀងនុយក្លេអ៊ែរឆ្នាំ ២០១៥។ ពោល គឺ អ៊ីរ៉ង់នឹងអាចត្រលប់ទៅជាប់ទណ្ឌកម្មសេដ្ឋកិច្ច សាជាថ្មី របស់អង្គការសហប្រជាជាតិ បើសិនភាគីជម្លោះ មិនអាចចរចា ចុះសម្រុងគ្នាទេនោះ។ ក្រសួងការបរទេសអ៊ីរ៉ង់ បានរិះគន់ និងព្រមានភាគីអឺរ៉ុប ពីផលវិបាក ធ្ងន់ធ្ងរ។
ចុះផ្សាយនៅថ្ងៃ៖
បារាំង អាល្លឺម៉ង់ និងអង់គ្លេស ដែលជាភាគីហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់ បានសម្រេច បើកជាផ្លូវការយន្តការដោះស្រាយវិវាទ ក្នុងករណីមានការរំលោភកិច្ចព្រមព្រៀងពីភាគីអ៊ីរ៉ង់។ នៅក្នុងសេចក្តីថ្លែងការណ៍រួម កាលពីថ្ងៃអង្គារ រដ្ឋមន្រ្តីការបរទេសបារាំង អង់គ្លេស និងអាល្លឺម៉ង់បានប្រកាសថា យោងទៅតាមវិធានការចុងក្រោយរបស់អ៊ីរ៉ង់ ភាគីហត្ថលេខីអឺរ៉ុប គ្មានជម្រើសអ្វីផ្សេងទៀតនោះទេ។
កាលពីថ្ងៃទី ៥ មករាកន្លងទៅ ពោល គឺនៅមួយថ្ងៃ យន្តហោះដ្រូនអាមេរិក បាញ់សម្លាប់មេទ័ពអ៊ីរ៉ង់ លោកកាសេម សូឡីម៉ានី នៅទឹកដីអ៊ីរ៉ាក់ រដ្ឋាភិបាលអ៊ីរ៉ង់បានប្រកាសលែងគោរពកិច្ចសន្យាមួយកម្រិតទៀត ដែលមានចែងនៅក្នុងកិច្ចព្រមព្រៀងនុយក្លេអ៊ែរ ដើម្បី ជាការសងសឹកនឹងអាមេរិក ដែលបានដកខ្លួនពីកិច្ចព្រមព្រៀងជាឯកតោភាគី និងត្រលប់ដាក់ទណ្ឌកម្ម ច្របាច់ក សេដ្ឋកិច្ចអ៊ីរ៉ង់។
អ៊ីរ៉ង់ដែលធ្លាប់ចោទប្រកាន់ភាគីអឺរ៉ុប ថា អសមត្ថភាព មិនអាចជួយអ៊ីរ៉ង់ ពីការដាក់ទណ្ឌកម្មសេដ្ឋកិច្ចរបស់អាមេរិក បានក្រឡាស់ ដោះដៃបន្តិចម្តងៗពីកិច្ចសន្យា នៅក្នុងកិច្ចព្រមព្រៀង។ នៅដើមខែ មករា អ៊ីរ៉ង់បានសម្រេច ឈប់កំណត់ចំនួន ម៉ាស៊ីនចម្រើនសារធាតុអ៊ុយរ៉ាញ៉ូម ទៅតាមកិច្ចព្រមព្រៀង។ ការណ៍នេះបានធ្វើឲ្យភាគីអឺរ៉ុប ប្រតិកម្មរិះគន់ និងបានគំរាមរួចហើយ ពីការអនុវត្តយន្តការដោះស្រាយវិវាទជាមួយ អ៊ីរ៉ង់។ កាលពីខែធ្នូ កន្លងទៅ នៅលិខិតផ្ញើទៅកាន់អគ្គលេខាធិការអង្គការសហប្រជាជាតិ ភាគីអឺរ៉ុបធ្លាប់ចោទប្រកាន់អ៊ីរ៉ង់ថា បានអភិវឌ្ឍមីស៊ីល ដែលមានសមត្ថភាព ពាំនាំក្បាលគ្រាប់នុយក្លេអ៊ែរ។
នៅក្នុងសេចក្តីថ្លែងការណ៍រួមកាលពីថ្ងៃអង្គារ ភាគីអឺរ៉ុបបញ្ជាក់ថា ខ្លួនចាប់បើកយន្តការដោះស្រាយវិវាទ ជាមួយ អ៊ីរ៉ង់ ក្នុងក្តីសង្ឃឹម ចង់ឲ្យអ៊ីរ៉ង់ ឲ្យត្រលប់មកគោរពកិច្ចព្រមព្រៀង ពោលគឺគ្មានចេតនាចង់សម្លាប់កិច្ចព្រមព្រៀង ឆ្នាំ ២០១៥នោះទេ។ ភាគីអឺរ៉ុបបញ្ជាក់ដែរថា ដោយអនុវត្តយន្តការដោះស្រាយវិវាទ ជាមួយអ៊ីរ៉ង់ គេគ្មានចេតនាចង់ចូលរួមក្នុងយុទ្ធនាការដាក់សម្ពាធខ្លាំងៗលើអ៊ីរ៉ង់ ជាពិសេស នៅក្នុងកាលៈទេសៈ ដែលអ៊ីរ៉ង់កំពុងជួបវិបត្តិសេដ្ឋកិច្ច និងបាតុកម្មរបស់មហាជន នៅក្រោយហេតុការណ៍បាញ់ទម្លាក់យន្តហោះអ៊ុយក្រែន។
នៅត្រង់ចំណុចនេះ ភាគីអឺរ៉ុបចង់បង្ហាញថា ខ្លួន នឹងមិនធ្វើតាមការទាមទាររបស់អាមេរិក ដែលចង់ឲ្យភាគីអឺរ៉ុបដើរចេញ ពីកិច្ចព្រមព្រៀង និងត្រលប់ទៅដាក់ទណ្ឌកម្មសេដ្ឋកិច្ចដូចអាមេរិក។
ក្រសួងការបរទេសអ៊ីរ៉ង់បានចេញមុខព្រមានភាគីអឺរ៉ុបពីផលវិបាក នៅក្រោយការសម្រេចចិត្ត កាលពីថ្ងៃអង្គារ។ ភាគីអឺរ៉ុបវាយតម្លៃថា ការដាក់អនុវត្តយន្តការដោះស្រាយវិវាទ មានគោលដៅ បញ្ចុះបញ្ចូលអ៊ីរ៉ង់ ឲ្យត្រលប់មកគោរពកិច្ចព្រមព្រៀង។ ប៉ុន្តែ ទៅតាមកិច្ចព្រមព្រៀង ឆ្នាំ ២០១៥ ក្នុងករណី ភាគីអឺរ៉ុប មិនអាចដោះស្រាយ បញ្ចប់វិវាទជាមួយ អ៊ីរ៉ង់ នៅក្នុងរយៈពេលចរចា ដ៏យូរមួយ នោះនៅទីបំផុត អង្គការសហប្រជាជាតិ នឹងអាចត្រលប់ទៅដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់ បូកបន្ថែមពីលើទណ្ឌកម្មសេដ្ឋកិច្ចដែលមានស្រាប់ របស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ