អ្នកតំណាងរាស្រ្តអង់គ្លេសសំដែងទុក្ខសោក នៅថ្ងៃចុងក្រោយនៅសភាអឺរ៉ុប
ថ្ងៃសុក្រ ទី ៣១មករា ២០២០ ជាថ្ងៃចុងក្រោយដែលអ្នកតំណាងរាស្រ្តអង់គ្លេស មានវត្តមាន ធ្វើការ នៅ សភាអឺរ៉ុប ដែលមានទីស្នាក់ការនៅទីក្រុងព្រុចសែល ប្រទេសបែលហ្សិក។ សូមបញ្ជាក់ថា កាលពី២ថ្ងៃមុននេះ សភាអឺរ៉ុបបានបោះឆ្នោត ជាឯកច្ឆន្ទ ផ្តល់សច្ចាប័នលើសន្ធិសញ្ញាស្តីពីការដកខ្លួនរបស់អង់គ្លេសពីរង្វង់សហភាពអឺរ៉ុប។ នៅក្នុងអង្គប្រជុំរបស់សភា អ្នកតំណាងរាស្រ្តអឺរ៉ុបបានសំដែងថា វាគ្រាន់តែជាការបែកគ្នាមួយរយៈ ប៉ុន្តែ មិនលាគ្នារហូតនោះទេ។ សម្រាប់អ្នកតំណាងរាស្រ្តអង់គ្លេស ដែលគាំទ្រ ចង់ឲ្យអង់គ្លេសជាសមាជិកអឺរ៉ុប វាជាការឈឺចាប់ ដែលអង់គ្លេស លែងមានសំឡេងតទៅទៀត នៅក្នុងរង្វង់សហភាពអឺរ៉ុប។ យើងស្តាប់លោកស្រីCaroline Voaden សមាជិកក្រុមសេរី ប្រជាធិបតេយ្យ ថ្មី នៅក្នុងសភាអឺរ៉ុប ដែលបានផ្តល់បទសម្ភាសន៍ដល់វិទ្យុបារាំងអន្តរជាតិ RFI
ចុះផ្សាយនៅថ្ងៃ៖
ស្តាប់ - ០១:០៩
“សម្រាប់ពួកយើង វាជាទុក្ខព្រួយដ៏ជ្រាលជ្រៅ។ ប៉ុន្តែ ពេលដឹងថា ចាកចេញពីសភាអឺរ៉ុប នឹងធ្វើឲ្យអង់គ្លេសលែងមានសំឡេង នៅក្នុងសហភាពអឺរ៉ុប តទៅទៀត នោះ គឺរឹតតែជាទុក្ខសោក ក្នុងកម្រិតមួយទៀត ដែលមិនអាចរៀបរាប់បាន។ វាជារឿងកំសត់មួយ សម្រាប់ប្រទេសរបស់ខ្ញុំ។ ខ្ញុំគិតថា វាជាកំហុសដ៏ធ្ងន់ធ្ងរមួយ។ គេមិនគួរ រៀបចំ ការបោះឆ្នោតប្រជាមតិ កាលពីឆ្នាំ ២០១៦ទេ។ ប្រាកដណាស់ នឹងមានការងារដ៏ពិបាក នៅចំពោះមុខយើង។ ជាឆ្នាំ ដែលស្មុគស្មាញ។ វាមិនងាយស្រួលដូចគេនិយាយទេ ដែលថា គេអាចដកខ្លួនចេញពីសហភាពអឺរ៉ុប ហើយភ្លាមៗ អាចទទួលបានឯករាជ្យម្ចាស់ការនោះ។
ខ្ញុំគិតថា អង់គ្លេសនិងសហភាពអឺរ៉ុប មានទំនាក់ទំនងជិតស្និទ្ធនឹងគ្នាណាស់។ ទំនាក់ទំនងនេះ មានប្រវត្តិតាំង ពី ៤០ឆ្នាំមកហើយ។ យើងនឹងត្រូវធ្វើការជាមួយគ្នា។ គេត្រូវធ្វើការជាមួយគ្នា នៅក្នុងសំណុំរឿងអាកាសធាតុ ពន្ធដា ភេរវកម្ម អន្តោប្រវេសន៍ជាដើម។ រឿងទាំងអស់នេះ អង់គ្លេសមិនអាចធ្វើតែម្នាក់បានទេ។ គេត្រូវបន្ត សហប្រតិបត្តិការបែបនេះ បន្តទៅទៀត។”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ