អង្គការសុខភាពពិភពលោក៖ ចំនួនអ្នកកើតជំងឺមហារីកនឹងកើនឡើង ៨១% ក្នុងប្រទេសក្រីក្រ
ថ្ងៃអង្គារទី ៤កុម្ភៈ នេះជាថ្ងៃទិវាពិភពលោកប្រយុទ្ធប្រឆាំងជំងឺមហារីក។ នៅក្នុងឱកាសនេះ អង្គការសុខភាពពិភពលោក និងមជ្ឈមណ្ឌលអន្តរជាតិនៃការស្រាវជ្រាវជំងឺមហារីក បានចេញរបាយការណ៍រួមគ្នាពីរ ដែលនៅក្នុងនោះគេបានទាញសញ្ញាអាសន្នពីលទ្ធភាព កើនឡើងនៃចំនួនអ្នកកើតជំងឺមហារីក ដល់ទៅ ៦០% នៅក្នុងពិភពលោក និងអាចដល់ ៨១% នៅក្នុងបណ្តាប្រទេសក្រីក្រ ពីពេលនេះ រហូតដល់ឆ្នាំ ២០៤០។ ជំងឺមហារីកកើនឡើង ក្នុងពិភពលោក ប៉ុន្តែ វិធានការដ៏មានប្រសិទ្ធិភាព និងការបង្ការទាន់ពេលវេលានឹងអាចជួយសង្រ្គោះ ជីវិតមនុស្សរាប់លាននាក់ នៅក្នុងមួយឆ្នាំ។ នេះបើតាមការវាយតម្លៃរបស់អង្គការសុខភាពពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
នៅក្នុងរបាយការណ៍ចេញផ្សាយ នៅថ្ងៃអង្គារនេះ អ្នកជំនាញរបស់អង្គការសុខភាពពិភពលោករាប់រកឃើញ ករណីជំងឺមហារីកថ្មី នៅក្នុងពិភពលោក ប្រមាណ ១៨,១លាននាក់ នៅឆ្នាំ ២០១៨។ បើសិន ជំងឺមហារីកនៅតែបន្តកើនឡើង នៅក្នុងល្បឿន សព្វថ្ងៃនេះ អង្គការសុខភាពពិភពលោកព្រមានថា ករណីជំងឺមហារីកថ្មី នឹងកើនឡើង ប្រមាណ ៦០% នៅទូទាំងពិភពលោក ពីពេលនេះ ដល់ឆ្នាំ ២០៤០។ តាមអង្គការសុខភាពពិភពលោក ពីពេលនេះតទៅ មនុស្សម្នាក់ ក្នុងចំណោម ៥នាក់ នៅក្នុងពិភពលោក នឹងអាចកើតជំងឺមហារីក នៅមុនអាយុ ៧៥ឆ្នាំ។ របាយការណ៍របស់មជ្ឈមណ្ឌលអន្តរជាតិសម្រាប់ការស្រាវជ្រាវជំងឺមហារីក ជំងឺមហារីក ជាមូលហេតុ ទី ១ ឬ ទី២ ដែលធ្វើឲ្យមនុស្សស្លាប់មុនអាយុ ពោលគឺក្នុងចន្លោះ ពី ៣០ ទៅ ៦៩ឆ្នាំ នៅក្នុងប្រទេស ១៣៤ នៅក្នុងពិភពលោក។
អ្វីដែលគួរឲ្យកត់សំគាល់ គឺចំនួនអ្នកកើតជំងឺមហារីកថ្មី នឹងអាចកើនឡើង ខ្ពស់ រហូត ៨១ភាគរយ ក្នុងបណ្តាប្រទេសក្រីក្រ និងប្រទេសកំពុងអភិវឌ្ឍ ក្នុងរង្វង់ ពី ២៩លាន ទៅ ៣៧លាននាក់ ពីពេលនេះ ដល់ឆ្នាំ ២០៤០។
តាមការពន្យល់របស់អ្នកជំនាញ របស់អង្គការសុខភាពពិភពលោក ករណីអ្នកកើតជម្ងឺមហារីក ថ្មី កើនឡើង នៅក្នុងបណ្តាប្រទេសដែលមានប្រាក់ចំណូលទាប ដោយសារថា រដ្ឋាភិបាលរបស់ប្រទេសទាំងនោះ បានចំណាយធនធាន តិចតួច ទៅលើសុខភាពសាធារណៈ ឬដើម្បីប្រយុទ្ធប្រឆាំងនឹងជំងឺឆ្លង។ មួយវិញទៀត សេវាសុខភាពរបស់ប្រទេសទាំងនោះ នៅមិនទាន់មានបំពាក់ឧបករណ៍ សម្រាប់បង្ការ កំណត់រោគសញ្ញា និងព្យាបាលជំងឺមហារីក។
តាមរបាយការណ៍របស់អង្គការសុខភាពពិភពលោក នៅក្នុងបណ្តាប្រទេសដែលមានប្រាក់ចំណូលខ្ពស់ កម្មវិធីបង្កា កំណត់រោគសញ្ញាទាន់ពេលវេលា ហើយនិងការព្យាបាលជំងឺមហារីក នៅក្នុងដំណាក់កាលដំបូង បានជួយឲ្យគេកាត់បន្ថយ អត្រាស្លាប់ ដល់ទៅ ២០ភាគរយ ចំណែកនៅប្រទេសក្រីក្រ ឬប្រទេសកំពុងអភិវឌ្ឍ គេអាចកាត់បន្ថយ អត្រាមរណភាពដោយសារជំងឺមហារីក បានតែ ៥%ប៉ុណ្ណោះ។
សហការគ្នា ដើម្បីលុបបំបាត់ចោល អសមភាពរវាងប្រទេសអ្នកមាន និងប្រទេសអ្នកក្រ នៅក្នុងយុទ្ធនាការប្រយុទ្ធប្រឆាំងនឹងជំងឺមហារីក។ នេះ ជាការអំពាវនាវចង់របស់អគ្គនាយកអង្គការសុខភាពពិភពលោក ដែលវាយតម្លៃថា បើសិនគ្រប់ប្រទេសក្នុងពិភពលោកធ្វើការរួមដៃ ទាំងអស់គ្នា នោះ គេនឹងអាចជួយសង្រ្គោះជីវិតមនុស្ស ប្រមាណ ៧លាននាក់ នៅក្នុងរយៈពេល ១០ឆ្នាំខាងមុខ។ សម្រាប់ឆ្នាំ ២០១៨ ជំងឺមហារីកបានសម្លាប់មនុស្ស ប្រមាណ ៩,៦លាននាក់ នៅក្នុងពិភពលោក។
អង្គការសុខភាព ពិភពលោកបានលើកឡើងពីអន្តរាគមនានា ដែលជួយ ឲ្យគេអាចបង្ការកុំឲ្យមានករណីជំងឺមហារីកថ្មី ដូចជា ការប្រយុទ្ធប្រឆាំងនឹងការប្រើថ្នាំជក់ ការចាក់វាក់សាំង ប្រឆាំងHépatite B ដើម្បី បង្ការជំងឺមហារីកថ្លើម ឬវាក់សាំង ដើម្បីបង្ការជំងឺមហារីកស្បូនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ