ប្រជាជនស្វ៊ីសបោះឆ្នោត « យល់ព្រម » ធ្វើច្បាប់ប្រឆាំងការរើសអើងទៅលើអ្នកស្រលាញ់ភេទដូចគ្នា
កាលពីថ្ងៃអាទិត្យ ទី៩កុម្ភៈ ប្រជាជនស្វ៊ីសបានចូលរួមបោះឆ្នោតប្រជាមតិ ដើម្បីធ្វើច្បាប់ថ្មីមួយ សំដៅផ្តន្ទាទោសរាល់ទំរង់នៃការរើសអើងទៅលើអ្នកស្រលាញ់ភេទដូចគ្នា។ លទ្ធផលបង្ហាញថា ប្រជាជនស្វ៊ីស ចំនួន៦៣% បានបោះឆ្នោតយល់ព្រម។ នេះគឺជាការបោះជំហានថ្មីមួយ សម្រាប់ប្រទេសអឺរ៉ុបមួយនេះ ដែលកន្លងមកមានការយឺតយ៉ាវ ក្នុងការរៀបចំបទដ្ឋានច្បាប់ ការពារដល់អ្នកស្រលាញ់ភេទដូចគ្នា បើប្រៀបធៀប ទៅនឹងប្រទេសផ្សេងទៀត ក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ប្រជាជនស្វ៊ីសចំនួន៦៣% បានបោះឆ្នោតយល់ព្រម ក្នុងការធ្វើកំណែទម្រង់ លើក្រមព្រហ្មទណ្ឌ ដោយបានបន្ថែម ការពិន័យផ្តន្ទាទោសចំពោះទង្វើរើសអើង ជេរប្រមាថមើលងាយ ទៅលើអ្នកស្រលាញ់ភេទដូចគ្នា។ ចាប់ពីពេលនេះទៅ ការរើសអើងទៅលើអ្នកស្រលាញ់ភេទដូចគ្នា នឹងត្រូវផ្តន្ទាទោសដោយច្បាប់ ដូចទៅនឹងការរើសអើងផ្លូវភេទ ឬការរើសអើងសាសនា និងការប្រកាន់ពូជសាសន៍ជាដើម។
នៅតាមទីក្រុងធំៗខ្លះ ដូចជាទីក្រុងហ្សឺណែវ សម្លេងឆ្នោតគាំទ្រ ច្បាប់ប្រឆាំងនឹងការរើសអើងអ្នកស្រលាញ់ភេទដូចគ្នានេះ មានដល់ទៅជាង៧០%។ សមាគមការពារសិទ្ធិអ្នកស្រលាញ់ភេទដូចគ្នា នៅស្វ៊ីស បានសំដែងការអបអរ ចំពោះការបោះជំហានថ្មីនេះ ដោយមានការប្រឹងប្រែង ពីសំណាក់អ្នកនយោបាយ សាមជិកសភា មកពីបក្សសង្គមនិយមស្វ៊ីស។
ក្រៅពីផ្តន្ទាទោសពន្ធនាគារ ឬពិន័យជាប្រាក់ ចំពោះការជេរប្រមាថ ការមាក់ងាយ ឬរើសអើងលើអ្នកស្រលាញ់ភេទដូចគ្នា ច្បាប់ថ្មី ក៏អាចអនុវត្តបានដែរ ចំពោះការនិយាយ ឬការសរសេរ នៅលើបណ្តាញសង្គម ដូចជា Facebook Twitter Youtubeជាដើម។
សកម្មជនម្នាក់ បានលើកឡើងថា លោកមិនសង្ឃឹមថា ច្បាប់នេះ នឹងធ្វើឲ្យមនុស្សកែប្រែ ឈប់រើសអើងលើអ្នកស្រលាញ់ភេទដូចគ្នា ភ្លាមៗនោះទេ។ តែលោកជឿថា វានឹងធ្វើឲ្យមនុស្ស មានការពិចារណាច្រើនជាងមុន មុននឹងហារស្តី សរសេរ ឬនិយាយបន្តុះបង្ហាប់លេងសើច បែបមើលងាយចំអក ទៅលើអ្នកស្រលាញ់ភេទដូចគ្នា។
គួរកត់សំគាល់ថា ជាទូទៅ យុវជនក្មេងៗ ដែលជាអ្នកស្រលាញ់ភេទដូចគ្នា គឺជាអ្នករងសំពាធផ្នែកសតិអារម្មណ៍ខ្លាំងបំផុត ដោយសារតែការប្រមាថមើលងាយ ឬការសើចចំអក។ កម្រិតនៃការធ្វើអត្តឃាតរបស់មនុស្សស្រលាញ់ភេទដូចគ្នានៅស្វ៊ីស មានលើសអ្នកផ្សេង ដល់ចន្លោះពី ២ទៅ៥ដង។ បើប្រៀបធៀបទៅនឹងប្រទេសអឺរ៉ុបផ្សេងទៀត ស្វ៊ីសក៏មានការយឺតយ៉ាវដែរ ក្នុងការរៀបចំបទដ្ឋានច្បាប់ការពារសិទ្ធិអ្នកភេទទី៣។ ក្រុមប្រឹក្សានៃទ្វីបអឺរ៉ុប ព្រមទាំងអង្គការសហប្រជាជាតិ ធ្លាប់បានក្រើនរំលឹក ឲ្យស្វ៊ីស ត្រូវរៀបចំការការពារសិទ្ធិពលរដ្ឋខ្លួន ឲ្យបានស្មើភាពគ្នា ជាពិសេស ចំពោះអ្នកដែលងាយរងគ្រោះ ដូចជាអ្នកស្រលាញ់ភេទដូចគ្នាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ