អឺរ៉ុបពង្រឹងព្រំដែន និងបរិហារតួកគីដែលយកជនភៀសខ្លួនមកធ្វើជាថ្នូរនយោបាយ
ចុះផ្សាយនៅថ្ងៃ៖
ស្តាប់ - ០៥:៤១
ប្រធានាធិបតីតួកគី លោក អ៊ែរដូហ្កាន បានអះអាងនៅថ្ងៃពុធទី ៤មីនាថា វិបត្តិជនភៀសខ្លួន អាចមានដំណោះស្រាយដរាបណាតែសហភាពអឺរ៉ុបព្រមគាំទ្រនយោបាយរបស់តួកគី នៅស៊ីរី។ តែអឺរ៉ុបបានឆ្លើយបដិសេធ យ៉ាងដាច់អហង្កាចំពោះសំណើបែបដោះដូរនយោបាយនេះ។ ទន្ទឹមនឹងការដំឡើងសរសៃកដាក់គ្នារវាងអឺរ៉ុបនិងតួកគី លោកអ៊ែរដូហ្កាន ត្រូវមានជំនួបជាមួយប្រធានាធិបតីរុស្ស៊ី លោក ពូទីន នៅថ្ងៃព្រហស្បតិ៍ទី៥មីនា នៅទីក្រុងម៉ូស្គូ ដើម្បីជជែកអំពីវិបត្តិស៊ីរីតែមួយដដែលនេះ។
ប្រឈមនឹងវិបត្តិអន្តោប្រវេសន៍ដែលកំពុងសម្រុកចូលអឺរ៉ុបតាមច្រកប្រទេសក្រិក ក្រោយពី តួកគីបានបើកទ្វារឱ្យជនភៀសខ្លួនស៊ីរីរត់ទៅអឺរ៉ុប រដ្ឋមន្ត្រីក្រសួងមហាផ្ទៃសហភាពអឺរ៉ុប ទាំង២៧ប្រទេសជាសមាជិក បានជួបប្រជុំគ្នាជាបន្ទាន់នៅល្ងាចថ្ងៃពុធទី ៤មីនាម្សិលមិញ ដោយផ្តល់អាទិភាពចំបងទៅការការពារសន្តិសុខព្រំដែនអឺរ៉ុប មុនការគិតគូរអំពីជីវិតរបស់ជនអន្តោប្រវេសន៍ផ្ទាល់។ នៅក្នុងសេចក្តីថ្លែងការណ៍រួម រដ្ឋមន្ត្រីក្រសួងមហាផ្ទៃអឺរ៉ុប បានព្រមានថា អឺរ៉ុបនឹងមិនអនុគ្រោះដល់ជនណាដែលហ៊ានឆ្លងព្រំដែនដោយខុសច្បាប់ទេ។
ទាំង២៧ប្រទេស បានប្រកាសត្រៀមពង្រឹងជំនួយការពារព្រំដែននៅក្រិក ក្នុងក្របខ័ណ្ឌអន្តរាគមន៍រហ័ស Frontex។ គណៈកម្មការអឺរ៉ុបបានសន្យាទម្លាយថវិកា៧០០លានអឺរ៉ូ សម្រាប់ចាត់ចែងវិបត្តិអន្តោប្រវេសន៍ ដើម្បីកុំឱ្យអឺរ៉ុបជួបវិបត្តិដូចឆ្នាំ២០១៥ទៀត។
ថ្វីបើអឺរ៉ុបទាំង២៧គាំទ្រទាំងស្រុងសេចក្តីសម្រេចរបស់រដ្ឋាភិបាលក្រិកផ្អាកទទួលពាក្យសុំសិទ្ធជ្រកកោនមួយខែមែន តែសហភាពអឺរ៉ុបមិនសូវត្រូវគ្នាទេ អំពីការទទួលយកជនអន្តោប្រវេសន៍លើកោះក្រិក ជាពិសេសក្មេងនិងកុមារគ្មានអាណាព្យាបាល។ លុចសំបួព្រមទទួលយក១០នាក់ បារាំងថាខ្លួនធ្លាប់បានសន្យាទទួលយក៤០០នាក់រួចហើយ។ ស្វ៊ីសនិងអាល្លឺម៉ង់ មិនបដិសេធនឹងទទួលយកក្មេងខ្លះដែរ។ ហ្វាំងឡង់១៧៥នាក់ អូទ្រិសច្រានចោលដាច់ខាតគំនិតចង់ទទួលជនភៀសខ្លួនថ្មី។
ចំពោះទំនាក់ទំនងជាមួយតួកគី អឺរ៉ុបទទួលស្គាល់ថាទង្វើល្អរបស់តួកគីដែលព្រមទទួលឃុំគ្រងជនភៀសខ្លួនស៊ីរី នៅលើទឹកដីតួកគីស្របតាមកិច្ចព្រមព្រៀងអឺរ៉ុប-តួកគីកាលពីឆ្នាំ២០១៦ តែទង្វើរបស់តួកគី ដែលពន្យុះឱ្យជនភៀសខ្លួនរត់ចូលអឺរ៉ុបតាំងពីថ្ងៃទី ២៧កុម្ភៈមក គឺជាការយកជនអន្តោប្រវេសន៍មកធ្វើថ្នូរដើម្បីប្រយោជន៍នយោបាយ ដែលសហភាពអឺរ៉ុប មិនអាចទទួលយកបានទេ។
តើសហភាពអឺរ៉ុបមានដាក់សម្ពាធលើតួកគី ឱ្យគោរពតាមកិច្ចព្រមព្រៀងបានដែរឬទេ ?
ដោយជាក់ស្តែងទៅ អឺរ៉ុបគ្មានមធ្យោបាយអ្វីច្រើនសម្រាប់ដាក់សម្ពាធលើតួកគីទេ។ អឺរ៉ុបក៏មិនអាចបិទព្រំដែន ដោយសង់ជញ្ជាំងព័ទ្ធជុំវិញអឺរ៉ុបកម្ពស់៥ម៉ែត្រដូចអ្វីដែលលោកត្រាំចង់ធ្វើជាមួយម៉ិចស៊ិកទេ។ ពេលនេះក្រិកប្រឹងទប់អន្តោប្រវេសន៍តាមគ្រប់មធ្យោបាយដែលមាន។ ឯអន្តោប្រវេសន៍ដែលអស់ក្តីសង្ឃឹម ដែលចង់គេចពីសង្គ្រាម ពីភាពវេទនា គង់នឹងរកមធ្យោបាយឆ្លងចូលអឺរ៉ុបតាមវិធីផ្សេង។ បើមិនបានថ្ងៃនេះ គេនឹងសាកល្បងនៅថ្ងៃស្អែក ... ដូច្នេះអឺរ៉ុបត្រូវសម្តែងសាមគ្គីភាព ហិរញ្ញវត្ថុ និងនយោបាយជាមួយ បណ្តាប្រទេសជាព្រំដែនអឺរ៉ុប ក្រិកនិងប៊ុលហ្ការី និងត្រូវរៀបចំចែងលំហូរអន្តោប្រវេសន៍ ហើយដើម្បីចាត់ចែងនិងគ្រប់គ្រងអន្តោប្រវេសន៍ គឺមានតែការចរចា
តួកគី យកជនភៀសខ្លួនមកដាក់សម្ពាធលើអឺរ៉ុប
តួកគីពិតជាបានរំលោភកិច្ចព្រមព្រៀងជាមួយអឺរ៉ុប និងយកជនភៀសខ្លួនមកធ្វើជាចំណាប់ថ្នូរនយោបាយ សម្រាប់ដាក់សម្ពាធលើអឺរ៉ុប។ ទង្វើបែបនេះ អាក្រក់មើល និងអសីលធម៌ណាស់។ នៅថ្ងៃនេះ ក្រោយពីសហភាពអឺរ៉ុបបានបង្ហាញសាមគ្គីភាពការពារព្រំដែន តួកគីបានបញ្ជូនប៉ូលិសទៅព្រំដែន ដើម្បីចាំរុញជនភៀសខ្លួនដែលអឺរ៉ុបច្រានចេញទៀត។ ប៉ុន្តែ បញ្ហានៅត្រង់ថាលោក អ៊ែរដូហ្កាន ទោះបីជាអាក្រក់យ៉ាងណាក្តី ក៏ជាប្រមុខដឹកនាំប្រទេសមួយ ដែលមានប្រវត្តិនិងភូមិសាស្ត្រ មិនអាចកាត់ផ្តាច់បានពីអឺរ៉ុប។ ចង់ឬមិនចង់ តួកគីត្រូវជាដៃគូនយោបាយរបស់អឺរ៉ុប។
ជំនួបអ៊ែរដូហ្កាន-ពូទីន
ជំនួបជាមួយលោកពូទីន ជាលំហាត់ដ៏ស្មុគស្មាញនិង មិនស្រួលឡើយ ព្រោះម្ខាង តួកគីចង់ឱ្យរុស្ស៊ីជួយបញ្ឈប់សកម្មភាពរបស់កងទ័ពស៊ីរី របស់លោកបាស្ហារ អាល់ អាសាដ នៅខេត្តអ៊ីដឡិប ក្រោយពីបាក់មុខ កងទ័ពខ្លួន៣៣នាក់បានស្លាប់នៅក្នុងខេត្តនេះ។ តែ រុស្ស៊ីដ៏ខ្លាំងក្លា គ្មានចេតនាឈប់គាំទ្រសម្ព័ន្ធមិត្តបាស្ហារអាល់អាសាដឡើយ។
កម្មវត្ថុទីមួយរបស់តួកគីគឺធ្វើយ៉ាងណាបញ្ចៀសការប្រឈមមុខដោយផ្ទាល់រវាងកងទ័ពតួកគីនិងកងទ័ពរុស្ស៊ី នៅស៊ីរី។ កម្មវត្ថុមួយទៀត របស់លោកអ៊ែដូហ្កាន គឺធ្វើឱ្យមានបទឈប់បាញ់ និងចុងក្រោយប្រធានាធិបតីតួកគីចង់មានសំណើមួយទៀត គឺការបង្កើតតំបន់សន្តិសុខនៅភាគខាងជើងខេត្តអ៊ីដឡិប ដែលស្ថិតក្រោមការត្បាតរួមជាមួយទាហានតួកគី ដើម្បីយកតំបន់នេះមកទទួលជនភៀសខ្លួន។ តើតួកគីនិងរុស្ស៊ីអាចនឹងសម្រេចកិច្ចព្រមព្រៀងនឹងគ្នាបានដែរឬយ៉ាងណា ? យើងនឹងដឹងលទ្ធផលនៅពេលបន្តិចទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ