ប្រធានាធិបតីតួកគីគំរាមជាថ្មីថា នឹងមានជនអន្តោប្រវេសន៍រាប់លាននាក់ សំដៅទឹកដីអឺរ៉ុប
ប្រមុខការបរទេសអឺរ៉ុប លោកJosep Borrell ធ្វើដំណើរ ទៅទីក្រុងអង់ការ៉ា នៅថ្ងៃអង្គារ ទី ៣មីនាដើម្បី ពិភាក្សាជាមួយរដ្ឋាភិបាលតួកគី ពីវិបត្តិនៅទឹកដីភាគខាងជើងស៊ីរី ជាទី ដែលកងទ័ពតួកគី កំពុងមានវត្តមាន និងកំពុងប្រយុទ្ធតទល់នឹងកងទ័ពរដ្ឋាភិបាលស៊ីរី។ វត្តមានរបស់ប្រមុខការបរទេសអឺរ៉ុប នៅតួកគី ធ្វើឡើង នៅប៉ុន្មានថ្ងៃក្រោយ ដែលប្រធានាធិបតី តួកគី បានប្រកាសបើកភ្លើងខៀវ បញ្ចេញជនភៀសខ្លួន និងជនអន្តោរប្រវេសន៍ សំដៅ ទឹកដីអឺរ៉ុប។
ចុះផ្សាយនៅថ្ងៃ៖
ស្តាប់ - ០២:១៧
តាមសេចក្តីថ្លែងការណ៍របស់សហភាពអឺរ៉ុប ប្រមុខការបរទេសអឺរ៉ុប លោកJoseph Borrell នឹងជួបពិភាក្សាជាមួយអ្នកទទួលខុសត្រូវជាន់ខ្ពស់របស់តួកគី ពីផលវិបាកមនុស្សធម៌ ដោយសារការប្រយុទ្ធគ្នា នៅខេត្តអ៊ីដឡិប ទឹកដីភាគខាងជើងស៊ីរី ហើយនិងស្ថានភាពជាទូទៅរបស់ជនភៀសខ្លួនស៊ីរី ក្នុងទឹកដីតួកគី។
នៅថ្ងៃចន្ទម្សិលមិញ ប្រធានាធិបតី តួកគីបានគំរាម សាជាថ្មី សហភាពអឺរ៉ុបពីលំហូរជនភៀសខ្លួន ជនអន្តោប្រវេសន៍ រាប់លាននាក់សំដៅទឹកដីអឺរ៉ុប។ កាលពី ថ្ងៃសុក្រ ប្រមុខរដ្ឋាភិបាលតួកគី ដែលបានចោទប្រកាន់អឺរ៉ុបថា មិនបានគោរពតាមការសន្យា ឆ្នាំ ២០១៦ បានប្រកាសបើកភ្លើងខៀវ អនុញ្ញាតឲ្យជនភៀសខ្លួន ស៊ីរី អាហ្វហ្កានីស្ថាន និងអ៊ីរ៉ាក់ ធ្វើដំណើរសំដៅទឹកដី អឺរ៉ុប។ តាំងពីថ្ងៃសុក្រ ជនភៀសខ្លួន រាប់ពាន់នាក់បានសម្រុកធ្វើដំណើរទៅដល់ព្រំដែនតួកគី ក្រិក ជាទីដែលទាហានក្រិកត្រូវបានដាក់ពង្រាយ ដើម្បី ទប់ស្កាត់ កុំឲ្យជនអន្តោប្រវេសន៍ ឆ្លងចូលក្នុងទឹកដីក្រិក។
ទៅតាមកិច្ចព្រមព្រៀង ឆ្នាំ ២០១៦ អឺរ៉ុបបានសន្យាផ្តល់ថវិកា ៦ពាន់លានអឺរ៉ូ ទៅឲ្យរដ្ឋាភិបាលតួកគី ក្នុងការខិតខំប្រឹងប្រែងទប់កុំឲ្យជនភៀសខ្លួន ធ្វើដំណើរបន្តចូលទឹកដីអឺរ៉ុប។ ប៉ុន្តែ តួកគី ដែលទទួលឲ្យតាំងមានជំរំដាក់ជនភៀសខ្លួន ជាង ៤លាននាក់ ដែលភាគច្រើន ជាជនជាតិស៊ីរី បានចោទប្រកាន់អឺរ៉ុប ថា មិនបានផ្តល់ថវិកាគ្រប់ចំនួន តាមការសន្យា។ ការចោទប្រកាន់ដែលភាគីអឺរ៉ុបបានបដិសេធទាត់ចោល។
នៅក្នុងសន្និសីទកាសែត កាលពីថ្ងៃចន្ទ ប្រធានាធិបតី តួកគី លោករេស៊ីប អ៊ែរដូហ្កាន បានលើកឡើងដែរថា តួកគីបានបដិសេធមិនទទួលយក ប្រាក់១ពាន់លានអឺរ៉ូ ដែលអឺរ៉ុប បានសន្យាផ្តល់បន្ថែមពីលើកិច្ចព្រមព្រៀង។
សម្រាប់ប្រធានាធិបតី តួកគី តួកគី លែងចង់បានប្រាក់ពីអឺរ៉ុបទៀតហើយ។ គេវាយតម្លៃថា រដ្ឋាភិបាលតួកគី សម្រេចបើករ៉ូប៊ីនេ បញ្ចេញជនភៀសខ្លួន សំដៅទឹកដីអឺរ៉ុប ក្នុងគោលដៅ ទាមទារចង់បានជំនួយគាំទ្រពីប្រទេសលោកខាងលិច សហភាពអឺរ៉ុប សម្រាប់ប្រតិបត្តិការយោធារបស់តួកគី នៅទឹកដីស៊ីរី។
ប៉ុន្តែ នៅថ្ងៃចន្ទ ម្សិលមិញ នាយករដ្ឋមន្រ្តីអាល្លឺម៉ង់ លោកស្រី អង់ហ្គេឡា មេរកិល បាននិយាយរិះគន់ ជំហររបស់តួកគី ដែលកេងចំណេញ យកបញ្ហាជនភៀសខ្លួន ទៅដាក់សម្ពាធលើសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ