ក្រុមជនភៀសខ្លួនកំពុងសម្រុកចេញពីតួកគីទៅកាន់ព្រំដែនក្រិកក្នុងគោលដៅចូលអឺរ៉ុប
នៅថ្ងៃអាទិត្យ ទី១ មីនា មានជនភៀសខ្លួនយ៉ាងតិច ២ ០០០នាក់ថែមទៀតបានទៅដល់ព្រំដែននៃប្រទេសក្រិកដើម្បីព្យាយាមចូលក្នុងទឹកដីអឺរ៉ុប។ ព្រឹត្តិការណ៍មួយនេះបានកើតមានឡើង បន្ទាប់ពីប្រធានាធិបតីតួកគីលោកអ៊ែរដូហ្កានប្រកាសបើកទ្វារជំរំជនភៀសខ្លួននៅតួកគី។ មូលហេតុដែលបានជំរុញឲ្យមនុស្សខ្លាំងតួកគីឲ្យធ្វើដូចនេះ មកពីលោកអ៊ែរដូហ្កានមិនសប្បាយចិត្តនឹងអឺរ៉ុបដែលមិនបានគាំទ្រចំណាត់ការរបស់លោកនៅក្នុងប្រទេសស៊ីរី។
ចុះផ្សាយនៅថ្ងៃ៖
ស្តាប់ - ០២:១០
គឺជាឱកាសមួយដែលជនភៀសខ្លួនស្ថិតក្នុងជំរំតួកគីបានរង់ចាំជាយូរមកហើយ មិនថាជាជនជាតិស៊ីរី អាហ្វហ្កានីស្ថាន ឬអ៊ីរ៉ាក់ទេ។ ក្នុងចំណោមជនភៀសខ្លួនដែលកំពុងបន្តសម្រុកទៅកាន់ព្រំដែនរវាងតួកគី និងក្រិកមានប្រុស ស្រី និងកូនក្មេង។ គ្រាន់តែនៅថ្ងៃអាទិត្យ ទី១ មីនា មានជនភៀសខ្លួនចំនួន ២ ០០០នាក់ថែមទៀតបានទៅដល់ព្រំដែនប្រទេសក្រិក។ តាមអង្គការអន្តោប្រវេសន៍អន្តរជាតិ មានជនភៀសខ្លួនសរុបប្រមាណ ១៥ ០០០នាក់កំពុងប្រមូលផ្តុំគ្នានៅតាមបណ្តោយព្រំដែនតួកគី ក្រិកពេលនេះ។ បើតាមរដ្ឋាភិបាលទីក្រុងអាថែន មានជនភៀសខ្លួនប្រមាណ ១០ ០០០នាក់ក្នុងចំណោម ១៥ ០០០នាក់ត្រូវបានរារាំងមិនឲ្យចូលទឹកដីក្រិកទេ។
តាំងពីថ្ងៃសៅរ៍ឆ្លងចូលថ្ងៃអាទិត្យ ទី១ មីនា អង្គការអន្តោប្រវេសន៍អន្តរជាតិបានតាមមើលដំណើរចាកចេញរបស់ជនភៀសខ្លួនពីតួកគីទៅកាន់ព្រំដែនក្រិក និងបានចែកចាយជំនួយជាចំណី អាហារ រួមទាំងផលិតផលចាំបាច់មួយចំនួនដល់ពួកគេ។ អ្វីដែលអង្គការអន្តោប្រវេសន៍អន្តរជាតិកំពុងបារម្ភពេលនេះ គឺភាពងាយរងគ្រោះរបស់ជនភៀសខ្លួនមួយចំនួននៅចំពោះសីតុណ្ហភាពត្រជាក់ខ្លាំងពេលនេះ។ គួររម្លឹកថា ប្រធានាធិបតីតួកគីលោកអ៊ែរដូហ្កានបានសម្រេចបើកទ្វារជំរំជនភៀសខ្លួនជាមួយអឺរ៉ុបនាថ្ងៃសុក្រ ទី២៨ កុម្ភៈ។ ការសម្រេចចិត្តយ៉ាងដូចនេះរបស់លោកអ៊ែរដូហ្កានដោយសារតែលោកមិនសប្បាយចិត្តនឹងអឺរ៉ុបដែលមិនបានជួយគាំទ្រវិធានការរបស់តួកគីនៅស៊ីរី។
ខណៈនេះ សហភាពអឺរ៉ុបបានត្រឹមសម្តែងក្តីកង្វល់ និងបញ្ជាក់ពីការត្រៀមខ្លួនផ្តល់ជំនួយបន្ថែមឲ្យប្រទេសក្រិក និងប៊ុលហ្ការីដែលមានព្រំដែនជាប់ប្រទេសតួកគី។ គួររម្លឹកថាក្នុងឆ្នាំ ២០១៥ ក្រិកបានក្លាយជាច្រកចូលអឺរ៉ុបសំខាន់របស់ជនអន្តោប្រវេសន៍ជាច្រើនពាន់នាក់ ពិសេសជនជាតិស៊ីរីដែលរត់គេចពីសង្រ្គាមស៊ីវិល។ បន្ទាប់មកក្នុងឆ្នាំ ២០១៦ សហភាពអឺរ៉ុប និងតួកគីបានចុះហត្ថលេខាលើកិច្ចព្រមព្រៀងមួយដោយតួកគីសន្យាទប់ស្កាត់នឹងលំហូរអន្តោប្រវេសន៍ខុសច្បាប់ចូលអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ