តុលាការហូឡង់ផ្តើមជំនំជម្រះលើជនសង្ស័យ ៤នាក់ក្នុងរឿងបាញ់ទម្លាក់យន្តហោះម៉ាឡេស៊ី M១៧ ក្នុងឆ្នាំ ២០១៤
ចាប់ពីថ្ងៃចន្ទ ទី៩ មីនា តុលាការក្នុងទីក្រុងអាំស្ទែដាំ ប្រទេសហូឡង់ផ្តើមសវនាការកាត់ទោសលើជនសង្ស័យចំនួន ៤នាក់ក្នុងរឿងផ្ទុះធ្លាក់យន្តហោះម៉ាឡេស៊ីដែលមានជើងហោះហើរលេខ MH១៧ នៅប៉ែកខាងកើត ប្រទេសអ៊ុយក្រែនកាលពីខែកក្កដា ឆ្នាំ ២០១៤។ គ្រោះថ្នាក់កាលណោះបានបណ្តាលឲ្យស្លាប់អ្នកជិះក្នុងយន្តហោះទាំង ២៩៨នាក់ដែលភាគច្រើនជាជនជាតិហូឡង់។ ក្នុងចំណោមជនសង្ស័យទាំង ៤នាក់ មាន ៣នាក់ជាជនជាតិរុស្ស៊ី និងម្នាក់ជាជនជាតិអ៊ុយក្រែន។ តែគ្មានជនសង្ស័យណាម្នាក់បង្ហាញមុខនៅក្នុងសវនាការពេលនេះទេ។
ចុះផ្សាយនៅថ្ងៃ៖
ស្តាប់ - ០២:២៦
អ្វីៗបានកើតមានឡើងនៅក្នុងខែកក្កដា ឆ្នាំ ២០១៤ ដែលកាលណោះ យន្តហោះម៉ាឡេស៊ីដែលមានជើងហោះហើរលេខ MH១៧ បានហោះចេញពីទីក្រុងអាំស្ទែដាំ ប្រទេសហូឡង់ទៅកាន់ទីក្រុងគូឡាឡាំពួរ ប្រទេសម៉ាឡេស៊ី។ តែបានរងការបាញ់កម្ទេចនៅពីលើអាកាសស្ថិតប៉ែកខាងកើត ប្រទេសអ៊ុយក្រែនដែលជាតំបន់របស់ក្រុមបះបោរគាំទ្ររុស្ស៊ី។ អ្នកដំណើរទាំង ២៩៨នាក់ ក្នុងនោះមានជនជាតិហូឡង់ចំនួន ១៩៦នាក់បានស្លាប់ទាំងអស់គ្មានសល់ម្នាក់។ រដ្ឋាភិបាលរុស្ស៊ីបានចេញមុខបញ្ជាក់ថា ខ្លួនមិនមានជាប់ពាក់ព័ន្ធនឹងគ្រោះថ្នាក់នោះទេ។ តាំងពីពេលនោះមក និងក្រោយពីរុស្ស៊ីបានរាំរាំងមិនឲ្យបង្កើតតុលាការអន្តរជាតិដើម្បីស៊ើបអង្កេតមក ប្រទេសអ៊ុយក្រែន អូស្រា្តលី ម៉ាឡេស៊ី បែលហ្ស៊ិក និងហូឡង់បានរួមគ្នាបើកការស៊ើបអង្កេតដោយឯកភាពយកច្បាប់ហូឡង់ធ្វើជាមូលដ្ឋាន។
ក្រុមអ្នកស៊ើបអង្កេតដែលដឹកនាំដោយហូឡង់បានចំណាយពេលស៊ើបអង្កេតជាច្រើនឆ្នាំ មុននឹងចេញដីកាឃាត់ខ្លួនជនសង្ស័យជនជាតិរុស្ស៊ី ៣នាក់ និងអ៊ុយក្រែនម្នាក់។ ជនសង្ស័យទាំង ៤នាក់ត្រូវបានក្រុមព្រះរាជអាជ្ញាហូឡង់ចោទពីបទបាននាំគ្រាប់មីស៊ីលពីរុស្ស៊ីទៅកាន់តំបន់បះបោរគាំទ្ររុស្ស៊ីស្ថិតប៉ែកខាងកើតអ៊ុយក្រែន ហើយគ្រាប់មីស៊ីលនោះត្រូវបានប្រើដើម្បីបាញ់ទៅលើយន្តហោះម៉ាឡេស៊ី MH១៧។ តែជនសង្ស័យទាំង ៤នាក់នឹងគ្មានវត្តមាននៅក្នុងដំណើរការកាត់ទោសពេលនេះទេ ព្រោះរុស្ស៊ីបានបដិសេធមិនបញ្ជូនជនជាតិរុស្ស៊ីជាប់ចោទទាំង ៣នាក់ ហើយជនជាតិអ៊ុយក្រែនម្នាក់ក៏មិនមានវត្តមានដែរ។ ទោះជាយ៉ាងនេះក្តី ជនជាប់ចោទទាំង ៤នាក់នឹងកាត់ទោសក្នុងបទឃាតកម្មសម្លាប់មនុស្សដែលអាចជាប់ក្នុងពន្ធនាគារអស់មួយជីវិត។
ក្រៅពីជនជាប់ចោទទាំង ៤នាក់ដែលជាអ្នកនាំគ្រាប់មីស៊ីលពីរុស្ស៊ីទៅកាន់តំបន់បះបោរគាំទ្ររុស្ស៊ីនៅប៉ែកខាងកើត ប្រទេសអ៊ុយក្រែន ក្រុមអ្នកស៊ើបអង្កេតក៏កំពុងបន្តស្វែងវែកមុខជនដែលបានបាញ់គ្រាប់មីស៊ីលទៅលើយន្តហោះម៉ាឡេស៊ី MH១៧។ ក្រុមអ្នកស៊ើបអង្កេតយល់ថា អ្នកដែលបានអនុវត្តផែនការផ្ទាល់ដៃជាក្រុមទាហានដែលមានបទពិសោធន៍ធ្លាប់បាញ់គ្រាប់មីស៊ីល។ គេត្រូវរង់ចាំជាង ៥ឆ្នាំទើបមានសវនាការមួយអាចចាប់ផ្តើមបានដើម្បីស្វែងរកយុត្តិធម៌ជូនជនរងគ្រោះទាំង ២៩៨នាក់។ តែសវនាការមួយនេះអាចនឹងប្រើពេលយូរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ