ការឆ្លងរីករាលដាល កូវីដ-១៩៖ អឺរ៉ុបប្រកាសបិទព្រំដែនរយៈពេល៣០ថ្ងៃ
សហភាពអឺរ៉ុបប្រកាសបិទព្រំដែនរយៈពេល៣០ថ្ងៃ ដើម្បី ទប់ស្កាត់ការឆ្លងរីករាលដាលមេរោគកូរ៉ូណា ដែលរហូតមកដល់ពេលនេះ បានសម្លាប់មនុស្ស ជាង ៦ពាន់នាក់ ក្នុងទូទាំងពិភពលោក។ សម្រាប់ប្រធានក្រុមប្រឹក្សាអឺរ៉ុប វិធានការបិទព្រំដែនរង្វង់សហភាពអឺរ៉ុប ចាប់ពីថ្ងៃអង្គារ ទី ១៧មីនា មានគោលដៅផងដែរ ដើម្បីសម្រាលបន្ទុក ប្រព័ន្ធសុខាភិបាលរបស់បណ្តាប្រទេសអឺរ៉ុប។
ចុះផ្សាយនៅថ្ងៃ៖
ស្តាប់ - ០២:៣៩
សហភាពអឺរ៉ុប ដែលមានសមាជិក ២៨ប្រទេស ដោយរាប់ទាំងអង់គ្លេសផង នឹងបិទព្រំដែនរបស់ខ្លួន ជាលើកទី១ ក្នុងប្រវត្តិសាស្រ្តរបស់ខ្លួន ដើម្បីទប់ស្កាត់ការឆ្លងរីករាលដាលកូរ៉ូណាវីរុស។ នៅក្នុងសន្និសីទកាសែត កាលពីថ្ងៃចន្ទ នៅទីក្រុងព្រុចស៊ែល ប្រធានគណៈកម្មការអឺរ៉ុប បាននិយាយថា សហភាពអឺរ៉ុប នឹងបិទព្រំដែនជាណ្តោះអាសន្នរយៈពេល ៣០ថ្ងៃ និងអាចពន្យារពេលបន្ថែមទៀត បើសិនចាំបាច់។
តាម ប្រធានគណៈកម្មការអឺរ៉ុប វិធានការបិទព្រំដែន នឹងអនុវត្តទៅលើប្រជាជនដែលធ្វើដំណើរមកពីប្រទេស ក្រៅរង្វង់ សហភាពអឺរ៉ុប ចំណែក មន្រ្តីទូត បុគ្គលិកសុខាភិបាល ដូចជាគ្រូពេទ្យ និងការដឹកជញ្ជូន ទំនិញ ថ្នាំពេទ្យ នៅតែអាចបន្តចរាចរដូចធម្មតា។
នៅក្នុងសុន្ទរកថាថ្លែងទៅកាន់ប្រជាជនបារាំង កាលពីយប់ថ្ងៃចន្ទម្សិលមិញ ប្រធានាធិបតី បារាំង ដែលជាអ្នកជំរុញឲ្យមានការបិទព្រំដែនសហភាពអឺរ៉ុប បានលម្អិតថា ព្រំដែនរបស់សហភាពអឺរ៉ុបទាំងមូល នឹងត្រូវបិទ ចាប់បិទពីម៉ោង ១២ថ្ងៃត្រង់ នៅថ្ងៃអង្គារនេះ ប៉ុន្តែ ព្រំដែននៅតែបើកជាពិសេស សម្រាប់ទទួលជនជាតិបារាំង ក៏ដូចជាប្រជាជនរបស់ប្រទេសសមាជិកសហភាពអឺរ៉ុបផ្សេងទៀត ដែលប្រាថ្នាចង់ត្រលប់ចូលប្រទេស វិញ។
ដោយប្រកាសបិទព្រំដែនសហភាពអឺរ៉ុប ចាប់ពីថ្ងៃអង្គារនេះតទៅ គណៈកម្មការអឺរ៉ុបកំពុងស្តារមុខមាត់របស់ខ្លួនមកវិញ បន្ទាប់ពីរងការរិះគន់ ថា យឺតយ៉ាវ មិនព្រមចាត់វិធានការ ទប់ស្កាត់ការរីករាតត្បាតមេរោគកូរ៉ូណា។ នៅមុនវិធានការបិទព្រំដែនសហភាពអឺរ៉ុបទាំងមូល ប្រទេសសមាជិក អឺរ៉ុបមួយចំនួនបានចាត់វិធានការដាច់ដោយឡែក រៀងៗខ្លួន ដូចជាប្រទេសអូទ្រីសដែលបានបិទព្រំដែនមិនអនុញ្ញាតឲ្យអ្នកដែលធ្វើដំណើរមកពីប្រទេសអ៊ីតាលី ចូលទឹកដីរបស់ខ្លួន។ អាល្លឺម៉ង់ នៅដើមសប្តាហ៍នេះ ក៏ទើបបានប្រកាសរឹតបន្តឹង ត្រួតពិនិត្យ នៅតាមព្រំដែនរបស់ខ្លួន ជាមួយប្រទេសជិតខាងរបស់ខ្លួនផងដែរ។
សូមរំលឹកជូនថា វិធានការបិទព្រំដែន របស់សហភាពអឺរ៉ុប ធ្វើឡើង បន្ទាប់ពីអង្គការសុខភាពពិភពលោកបានចាត់ទុក អឺរ៉ុប ថា ជាកន្លែងរីករាលដាលកូរ៉ូណាវីរុស ថ្មី នៅក្រៅប្រទេសចិន។ អ៊ីតាលី បានក្លាយជាប្រទេសធំទី២ បន្ទាប់ពីប្រទេសចិន ដេលមានករណីឆ្លងមេរោគកូរ៉ូណាកើនឡើងខ្លាំង ដល់ ជាង ២៨ ០០០នាក់ និងមនុស្សស្លាប់ជាង ២ពាន់នាក់។ អេស្ប៉ាញ បានក្លាយជាប្រទេសសំខាន់ទី២ នៅអឺរ៉ុប បន្ទាប់ពីអ៊ីតាលី ជាមួយនឹងករណីឆ្លង ជាង ៩ពាន់ករណី ដែលក្នុងនោះមនុស្ស ចំនួន ៣០៩នាក់ បានស្លាប់ដោយសារកូរ៉ូណាវីរុស។ នៅអេស្ប៉ាញ ករណីមនុស្សឆ្លងមេរោគ កូវីដ ១៩មានចំនួនដល់ទៅ ១៥០០នាក់ ក្នុងរយៈពេល ២ថ្ងៃ។ នៅប្រទេសបារាំង អាជ្ញាធរបានលើកឡើងពីស្ថានភាពឆ្លងរីករាលដាលកូរ៉ូណាវីរុស ដ៏លឿន និងគួរព្រួយបារម្ភ ព្រោះថា បារាំងពេលនេះ មានអ្នកស្លាប់ដោយសារកូរ៉ូណាវីរុស ដល់ ១៤៨នាក់ និងមនុស្សជិត ៦ពាន់នាក់ ឆ្លងមេរោគកូរ៉ូណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ