អង់គ្លេសប្តេជ្ញាយកឈ្នះសង្រ្គាមប្រឆាំង Covid-១៩ ដែលនឹងអាចសម្លាប់មនុស្សរាប់ពាន់នាក់
នៅក្នុងប្រទេសអង់គ្លេស លោកនាយករដ្ឋមន្រ្តីបូរីស ចនសុនបានប្រកាសនៅក្នុងកិច្ចប្រជុំគណៈរដ្ឋមន្រ្តីនាថ្ងៃអង្គារ ទី១៧ មីនាថា អង់គ្លេសកំពុងធ្វើសង្រ្គាមប្រឆាំងនឹងជំងឺ Covid-១៩ ហើយអង់គ្លេសត្រូវតែឈ្នះសង្រ្គាមមួយនេះ។ ការប្រកាសរបស់លោកចនសុនបានធ្វើឡើង បន្ទាប់ពីលោកប៉ាទ្រីក វ៉ាឡង់ដែលជាទីប្រឹក្សាវិទ្យាសាស្រ្តរបស់លោកបានថ្លែងថា មានប្រជាជនអង់គ្លេសជាច្រើនពាន់នាក់នឹងត្រូវស្លាប់ដោយជំងឺ Covid-១៩។ គួរបញ្ជាក់ថាគិតត្រឹមថ្ងៃអង្គារ ទី១៧ មីនា អង់គ្លេសមានមនុស្សស្លាប់ដោយជំងឺ Covid-១៩ ចំនួន ៥៥នាក់ និងអ្នកឈឺចំនួន ១ ៩៥០នាក់។
ចុះផ្សាយនៅថ្ងៃ៖
ស្តាប់ - ០២:៣៤
លោកប៉ាទ្រីក វ៉ាឡង់មិនបានបញ្ជាក់ពីចំនួនពិតប្រាកដនៃអ្នកត្រូវស្លាប់ដោយជំងឺ Covid-១៩ ទេ តែគ្រាន់បញ្ជាក់ថា រដ្ឋអំណាចអង់គ្លេសសង្ឃឹមអាចទប់មិនឲ្យមានអ្នកស្លាប់លើសពី ២០ ០០០នាក់។ « បើយើងអាចរក្សាទប់ចំនួនអ្នកស្លាប់នៅក្រោម ២០ ០០០នាក់ គឺពិតជាលទ្ធផលពេញចិត្តដូចដែលយើងសង្ឃឹមទុក។ ទោះជាយ៉ាងនេះក្តី ពិតជារន្ធត់ខ្លាំងណាស់ ព្រោះជាតួលេខដ៏សម្បើម និងជាការដាក់សម្ពាធបន្ថែមទៀតលើសេវាសុខភាពរបស់យើង » នេះជាចម្លើយរបស់លោកប៉ាទ្រីក វ៉ាឡង់ទៅកាន់គណៈកម្មការសភាដែលសួរលោកជុំវិញចំនួនមនុស្សស្លាប់ជាយថាហេតុដោយ Covid-១៩។
ពិតណាស់គិតត្រឹមថ្ងៃអង្គារ ទី១៧ មីនា អង់គ្លេសទើបមានអ្នកស្លាប់ដោយជំងឺ Covid-១៩ ចំនួន ៥៥នាក់ និងអ្នកឈឺចំនួន ១ ៩៥០នាក់ តែបើតាមរបៀបគន់គូរតាមបែបវិទ្យាសាស្រ្តរបស់លោកប៉ាទ្រីក វ៉ាឡង់ ចំនួនករណីឆ្លងពិតប្រាកដមានជិត ៥៥ ០០០នាក់។ ដោយឡែក បើផ្អែកតាមរបាយការណ៍របស់ Imperial College of Londres ចេញផ្សាយជាសាធារណៈកាលពីយប់ថ្ងៃចន្ទ ទី១៦ មីនា ចំនួនមនុស្សស្លាប់ដោយ Covid-១៩ នៅអង់គ្លេសអាចមានដល់ទៅ ៥១០ ០០០នាក់ និងមានអ្នកឆ្លងចំនួន ៨១% នៃចំនួនប្រជាពលរដ្ឋសរុប បើរដ្ឋាភិបាលគ្មានវិធានការទប់ស្កាត់អ្វីទេ។ តែបើរដ្ឋាភិបាលចាត់វិធានការស្រាលៗដូចពេលនេះ ចំនួនមនុស្សស្លាប់អាចធ្លាក់មកនៅត្រឹម ២៦០ ០០០នាក់។
គឺនៅក្នុងបរិបទនេះហើយដែលនាយករដ្ឋមន្រ្តីលោកបូរីស ចនសុនបានថ្លែងទៅកាន់រដ្ឋមន្រ្តីរបស់លោកថា អង់គ្លេសកំពុងស្ថិតក្នុងសង្រ្គាមប្រឆាំងនឹង Covid-១៩ ហើយអង់គ្លេសនឹងត្រូវតែឈ្នះសង្រ្គាមមួយនេះ។ តាមអ្នកនាំពាក្យរដ្ឋាភិបាល រដ្ឋាភិបាលនឹងជួយទ្រទ្រង់សេដ្ឋកិច្ច ពិសេសគាំទ្ររោងចក្រ សហគ្រាសនៅក្នុងគ្រាដ៏លំបាកដោយ Covid-១៩ ហើយវិធានការលំអិតនឹងត្រូវប្រកាសនៅសប្តាហ៍ក្រោយ។ គួររម្លឹកថានៅក្នុងសន្និសីទកាសែតនាថ្ងៃចន្ទ ទី១៦ មីនា លោកចនសុនបានត្រឹមអំពាវនាវឲ្យគ្រប់គ្នាផ្អាកការទាក់ទងមិនសំខាន់ជាមួយអ្នកផ្សេង លើកពេលប្រារព្ធពិធីផ្សេងៗ ឬមួយក៏ផ្អាកការដើរហើរមិនចាំបាច់។ តែនៅមិនទាន់ចាត់វិធានការចាស់ដៃដូចប្រទេសអឺរ៉ុបផ្សេងនៅឡើយទេ ដូចយ៉ាងបិទសាលារៀន ឬបិទហាងលក់ទំនិញមិនចាំបាច់ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ