សហភាពអឺរ៉ុប ថាមេដឹកនាំអឺរ៉ុប មើលស្រាលស្ថានការណ៍ ជំងឺកូវីដ១៩
លោកស្រីប្រធានគណៈកម្មការសហភាពអឺរ៉ុប អួរស៊ូឡា វ៉ុនឌែរ ឡេយែន (Ursula von der Leyen) បានទទួលស្គាល់នៅថ្ងៃពុធទី ១៨ មីនានេះ ថាពីដំបូងឡើយ អ្នកទទួលខុសត្រូវនយោបាយអឺរ៉ុបទាំងអស់ សុទ្ធបានមើលស្រាលអំពីទំហំនៃគ្រោះថ្នាក់ បង្កឡើងដោយជំងឺកូវីដ១៩។ នេះជាប្រសាសន៍របស់លោកស្រីនៅក្នុងបទសម្ភាសន៍ជាមួយនឹងសារព័ត៌មានអាល្លឺម៉ង់ Bild ។
ចុះផ្សាយនៅថ្ងៃ៖
ស្តាប់ - ០១:៣៦
“ខ្ញុំគិតថា យើងទាំងអស់គ្នា ដែលមិនមែនជាអ្នកជំនាញសុខាភិបាល ពីដំបូង បានមើលស្រាល កូវីដ១៩។ តែក្រោយមកទើបដឹងច្បាស់ថាយើងត្រូវប្រឈមនឹងមេរោគនេះយូរ”។ នេះជាប្រសាសន៍របស់លោកស្រីប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែន ទៅកាន់សារព័ត៌មានអាល្លឺម៉ង់ Bild ដោយអះអាងបន្ថែមទៀតថា “វិធានការដែលគេយល់ថាខ្លាំងជ្រុលកាលពីពីរបីសប្តាហ៍មុន ក្លាយជាចំណាត់ការដ៏ចាំបាច់ត្រូវប្រកាន់យកនៅពេលនេះ ព្រោះអឺរ៉ុបបានក្លាយជាចំណុចផ្ទុះកូរ៉ូណាវីរុសថ្មីខ្លាំងជាងគេនៅលើពិភពលោកទៅហើយ”។
បារាំងតាមរយៈសំដីរបស់រដ្ឋមន្ត្រីទទួលបន្ទុកថវិកាជាតិ ហ្សេរ៉ាល ដាម៉ាណាំង Gérald Darmanin ក៏ទទួលស្គាល់ថា មកទល់ខែកុម្ភៈ បារាំងក៏មិននឹងស្មានថាស្ថានភាពអាចធ្លាក់ដល់កំរិតបច្ចុប្បន្ននេះទេ។ ប៉ុន្តែផ្ទុយពីបារាំង លោកស្រីប្រមុខដឹកនាំសហភាពអឺរ៉ុប បានបដិសេធ មិនប្រើពាក្យថា ធ្វើ « សង្គ្រាម” ប្រឆាំងនឹងកូរ៉ូណាវីរុសថ្មី ដូចអ្វីដែលលោកប្រធានាធិបតីបារាំងម៉ាក្រុងបានប្រើទេ។ លោកស្រីបានអះអាងថា « បើក្នុងនាមលោកស្រីផ្ទាល់ខ្លួន លោកស្រី មិនប្រើពាក្យ សង្គ្រាមទេ តែលោកស្រីយល់អំពីមូលហេតុដែលជំរុញឱ្យលោកប្រធានាធិបតីបារាំងប្រើពាក្យនេះ ដើម្បីសំដៅថា កូរ៉ូណាវីរុសថ្មីជាសត្រូវគួរឱ្យព្រួយបារម្ភ”។
សម្រាប់រដ្ឋមន្ត្រីក្រសួងសេដ្ឋកិច្ចអាល្លឺម៉ង់ លោក Peter Altmaier វិញ លោកយល់ថា ពីដំបូងមក សហរដ្ឋអាមេរិករបស់លោក ដូណាល់ ត្រាំ កាន់តែមើលស្រាលជំងឺកូវីដ១៩ ជាងបណ្តាប្រទេសមួយចំនួននៅអឺរ៉ុទៀត។ យើងសង្ឃឹមថាសហរដ្ឋអាមេរិកអាចគ្រប់គ្រងស្ថានការណ៍បាន ដើម្បីប្រយោជន៍ទាំងអស់គ្នា ព្រោះគ្មាននរណាម្នាក់ចង់ឃើញសេដ្ឋកិច្ចពិភពលោកធ្លាក់ក្នុងវិបត្តិសេដ្ឋកិច្ចដើរថយក្រោយគ្រប់គ្រងលែងកើតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ