កូវីដ១៩ ៖ ធនាគារកណ្តាលអឺរ៉ុបទម្លាយកញ្ចប់ថវិកា ៧៥០ពាន់លានអឺរ៉ូ ជួយសេដ្ឋកិច្ចអឺរ៉ុប
ដើម្បីទ្រទ្រង់សេដ្ឋកិច្ច ដែលរងផលវិបាលពីការរាតត្បាតរបស់កូវីដ១៩តែធ្ងន់ធ្ងរឡើងៗ នៅថ្ងៃពុធទី ១៨ មីនាម្សិលមិញ ធនាគារកណ្តាលអឺរ៉ុប បានប្រកាសបង្ហាញផែនការសង្គ្រោះបន្ទាន់ ដែលមានតម្លៃដល់ទៅ ៧៥០ពាន់លានអឺរ៉ូ។ សមាជិកសហភាពអឺរ៉ុបបានសម្តែងការអបអរ ចំពោះចំណាត់ការរបស់ធនាគារកណ្តាលអឺរ៉ុប។ សេចក្តីប្រកាសនេះ បានធ្វើឱ្យ ទីផ្សារភាគហ៊ុនអឺរ៉ុប អាស៊ី និងតម្លៃប្រេងឆៅស្ទុះឡើងបន្តិចវិញ។
ចុះផ្សាយនៅថ្ងៃ៖
ស្តាប់ - ០១:៥៨
“វិបត្តិធ្ងន់ធ្ងរខុសប្រក្រតី ចំណាត់ការរបស់ធនាគារកណ្តាលអឺរ៉ុបក៏ត្រូវតែខ្លាំងខុសប្រក្រតីដែរ” នេះជាប្រសាសន៍លោកស្រី គ្រីស្ទីន ឡាហ្កាដ Christine Lagarde ប្រធានធនាគារកណ្តាលអឺរ៉ុប។ តាមរយៈផែនការដ៏មហាសាល តម្លៃ៧៥០ពាន់លានអឺរ៉ូ ធនាគារកណ្តាលអឺរ៉ុបនឹងចាប់ទិញបំណុលរដ្ឋនិងបំណុលឯកជន ពីពេលនេះរហូតដល់ចប់វិបត្តិកូវីដ១៩រលត់ តែយ៉ាងយូរបំផុតត្រឹមដំណាច់ឆ្នាំ២០២០។ នេះបើតាមសេចក្តីថ្លែងការណ៍របស់ធនាគារកណ្តាលអឺរ៉ុប ក្រោយជំនួបក្រុមប្រឹក្សាអភិបាលតាមទូរស័ព្ទ។
ធនាគារកណ្តាលអឺរ៉ុបសង្ឃឹមថា ការទិញបំណុលជាតិនិងឯកជនទ្រង់ទ្រាយធំ នឹងអាចជួយធនាគារប្រទេសនីមួយៗឱ្យរក្សានិងបង្កើនលទ្ធភាពផ្តល់ប្រាក់កម្ចីដល់ពលរដ្ឋទូទៅ និងក្រុមហ៊ុន ពោលគឺដើម្បីទ្រទ្រង់ផលិតកម្មនិងការងារ។ ផែនការសង្គ្រោះរបស់ធនាគារកណ្តាលអឺរ៉ុបក៏ជាការផ្តល់សន្ទុះដល់ប្រព័ន្ធសេដ្ឋកិច្ច បន្ទាប់ពីផ្អាកសកម្មភាពដោយបង្ខំដើម្បីប្រឈមទប់ទល់នឹងកូរ៉ូណាវីរុសថ្មី។
ជាសរុប និងដោយបូកបញ្ចូលជាមួយនឹងផែនការសង្គ្រោះទីមួយប្រកាសកាលពីថ្ងៃទី ១២មីនាទៅ ក្នុងរយៈពេល៩ខែទៅមុខ ធនាគារកណ្តាលអឺរ៉ុបនឹងចំណាយ ក្នុងមួយខែៗជិត ១១៧ពាន់លានអឺរ៉ូ សម្រាប់ជួយអឺរ៉ុប។
ធនាគារកណ្តាលចង់រៀបចំប្រមូលទិញបំណុល ទៅតាមស្ថានការណ៍ ប្រទេសណាជួបការលំបាកខ្លាំងជាងគេជួយប្រទេសនោះមុន។ ក្នុងន័យនេះ អ៊ីតាលីដែលចំនួនជនរងគ្រោះឆ្លងកូវីដ១៩ និងស្លាប់កើនឡើងយ៉ាងខ្លាំងជាងគេនៅអឺរ៉ុប ទំនងត្រូវបានទទួលជំនួយសង្រ្គោះមុនគេ។
សូមបញ្ជាក់ថាផែនការសង្គ្រោះអឺរ៉ុប ប្រកាសនៅល្ងាចថ្ងៃពុធទី ១៨មីនា មានទំហំធំជាងវិធានការរបស់ធនាគារកណ្តាលសហរដ្ឋអាមេរិកដែលប្រកាសកាលពីថ្ងៃចន្ទទី ១៦មីនាទៅទៀត។ ហេតុដូច្នេះហើយបានជាសមាជិកសហភាពអឺរ៉ុប ជាពិសេសបារាំងបានបញ្ចេញប្រតិកម្មអបអរមុនគេ ដោយប្រកាសថាវិធានការរបស់ធនាគារកណ្តាលអឺរ៉ុបពិតជាមហាសាលដូចការរំពឹងទុកនិងស្របទៅនឹងទំហំនៃវិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ