បារាំងប្រឈមនឹងការវិលត្រលប់របស់ជនជាតិខ្លួន ជាង ១សែននាក់ ដែលជាប់គាំងនៅបរទេសដោយសារកូវីដ១៩
ប្រជាជនបារាំង ប្រមាណ ១សែន ៣ម៉ឺននាក់ កំពុងជាប់គាំងនៅបរទេស ដោយសារវិធានការបិទព្រំដែន បិទទីក្រុង ដែលបណ្តាលមកពីជំងឺរាតត្បាតកូវីដ ១៩។ កាលពីថ្ងៃសុក្រម្សិលមិញ រដ្ឋមន្រ្តីក្រសួងការបរទេសបារាំងបានអះអាងថា រដ្ឋាភិបាលកំពុងធ្វើការ យ៉ាងមមាញឹកដើម្បីសម្រួលដំណើរវិលត្រលប់ចូលប្រទេស របស់ជនជាតិបារាំង ទាំងនោះ ប៉ុន្តែ លោកបានស្នើសុំឲ្យពួកគេរង់ចាំ និងអត់ធ្មត់។
ចុះផ្សាយនៅថ្ងៃ៖
ស្តាប់ - ០២:៣០
អាជ្ញាធរបារាំងកំពុងព្យាយាម សម្រួលដំណើរវិលត្រលប់របស់ប្រជាជន បារាំង ជាង ១សែននាក់ ដែលកំពុងជាប់គាំង នៅបរទេស ដោយសារវិធានការបិទព្រំដែន ក្នុងកាលៈទេសៈទប់ស្កាត់ការឆ្លងរីករាលដាលមេរោគ កូវីដ ១៩។ តាមរដ្ឋមន្រ្តីការបរទេសបារាំង លោកហ្សង់អ៊ីវ លឺ ឌ្រីយ៉ង់ ជនជាតិបារាំង ដែលរដ្ឋាភិបាលកំពុងរិះរកមធ្យោបាយឲ្យអាចធ្វើដំណើរចូលប្រទេសវិញ ភាគច្រើន ជាអ្នកដែលទៅធ្វើដំណើរកំសាន្ត ទៅបរទេស។
ជាក់ស្តែង នៅពេលប្រទេសជាច្រើន បានផ្អាក ការហោះហើរ សំដៅបារាំង ដែលជាប្រទេសអឺរ៉ុបមួយ កំពុងមានការឆ្លងរីករាតត្បាតខ្លាំង របស់មេរោគកូរ៉ូណា រដ្ឋាភិបាលបារាំងកំពុងចរចា ជាមួយអាជ្ញាធររបស់ប្រទេសទាំងនោះ ឲ្យជួយសម្រួល ដល់ការចាកចេញរបស់ពលរដ្ឋបារាំងដែលជាប់គាំងក្នុងទឹកដីពួកគេ។ តាម រដ្ឋមន្រ្តីការបរទេសបារាំង រាល់ការចំណាយ លើការធ្វើដំណើរជាបន្ទុករបស់អ្នកធ្វើដំណើរបារាំង ចំណែក ក្រុមហ៊ុនហោះហើរ Air France នឹងជួយទៅដឹកជញ្ជូន ជនជាតិបារាំងពីបរទេស។
សូមបញ្ជាក់ថា តាំងពីថ្ងៃសុក្រ អាជ្ញាធរបារាំង បានអន្តរាគមន៍ ឲ្យមានការដឹកជញ្ជូនជនជាតិបារាំង ជាង ១៧០០នាក់ ក្នុងចំណោម២ពាន់នាក់ ដែលនៅជាប់គាំងនៅប្រទេសម៉ារ៉ុក។ ប្រមុខការបរទេសបារាំងបញ្ជាក់ដែរថា ការដាក់ឃាំង ជនជាតិបារាំងដែលធ្វើដំណើរត្រលប់ពីបរទេស ឲ្យនៅដាច់ដោយឡែក រយៈពេល ២សប្តាហ៍ នឹងត្រូវសម្រេចទៅតាមករណីមួយៗ គឺមិនស្វ័យប្រវត្តិនោះទេ។
នៅពេលបារាំង ត្រៀមទទួលយក ពលរដ្ឋខ្លួនពីបរទេស ប្រមុខការបរទេសបារាំង នៅតែអំពាវនាវឲ្យពលរដ្ឋបារាំង ដែលធ្វើការ និងស្នាក់នៅបរទេស នៅបន្ត នៅបរទេសតទៅទៀត។ សព្វថ្ងៃនេះ មានប្រជាជនបារាំង ប្រមាណ ជិត ៣លាននាក់ ធ្វើការ រស់នៅទឹកដីបរទេស។ សម្រាប់លោកហ្សង់អ៊ីវ លឺ ឌ្រីយ៉ង់ ក្នុងបរិបទនៃការឆ្លងរាតត្បាតមេរោគកូវីដ ១៩ ពលរដ្ឋបារាំង គួរតែនៅក្នុងផ្ទះ មិនថា នៅប្រទេសបារាំង ឬនៅទីកន្លែងផ្សេង នៅប្រទេសផ្សេងនោះទេ។
យុទ្ធនាការការទូតដើម្បីដឹកប្រជាជនបារាំង ចូលប្រទេសវិញ ធ្វើឡើងនៅក្នុងកាលៈទេសៈ ដែលរដ្ឋាភិបាលបារាំងកំពុងអនុវត្តវិធានការដាក់ក្រុងមនុស្សក្នុងផ្ទះ។ កាសែតក្នុងស្រុកបារាំង មួយចំនួនបានលើកឡើងពីលទ្ធភាព ពន្យារ វិធានការដាក់មនុស្សក្នុងផ្ទះ រហូតដល់ខែ មេសា នៅពេលវិធានការហាមមនុស្សមិនឲ្យចេញក្រៅផ្ទះ ២សប្តាហ៍ របស់លោកប្រធានាធិបតី ម៉ាក្រុង ត្រូវចប់នៅចុងខែមីនានេះ។ ការរំលោភបម្រាម ដោយនៅតែដើរចេញទៅក្រៅផ្ទះ របស់ប្រជាជនបារាំង ហើយនិងចំនួន ចេះតែកើនឡើងនៃករណីឆ្លង និងស្លាប់របស់អ្នកជំងឺដោយសារកូវីដ ១៩ ជាហេតុផលសំខាន់ដែលអាចតម្រូវឲ្យរដ្ឋាភិបាល ពន្យារពេល នៃការដាក់ឃាំងមនុស្សឲ្យនៅក្នុងផ្ទះ ក្នុងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ