អង្គការសហប្រជាជាតិ៖ កូវីដ ១៩ធ្វើឲ្យជនអន្តោប្រវេសន៍រាប់ម៉ឺននាក់នៅជាប់គាំងនៅព្រំដែន
ជំងឺរាតត្បាតកូវីដ ១៩ធ្វើឲ្យមនុស្សពិបាកគ្រប់គ្នា ជាពិសេស អ្នកដែលរស់នៅក្នុងស្ថានភាពមិនច្បាស់លាស់ ដូចជាជនភៀសខ្លួន និងជនអន្តោប្រវេសន៍ជាដើម។ តាមអង្គការអន្តរជាតិ ទេសន្តរប្រវេសន៍ ដោយសារវិបត្តិកូវីដ ដែលជំរុញឲ្យមានវិធានការការបិទព្រំដែន ជនអន្តោប្រវេសន៍ រាប់ម៉ឺននាក់កំពុងត្រូវគេទុកចោលឲ្យនៅជាប់គាំង នៅតាមព្រំដែន។ បន្ថែមពីនេះ ពួកគេត្រូវប្រឈមនឹងគ្រោះថ្នាក់ ឆ្លងមេរោគកូវីដ ដោយសារបញ្ហាខ្វះ អនាម័យ និងការរស់នៅប្រជ្រៀតគ្នា នៅក្នុងជំរំប្រមូលផ្តុំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ទៅមុខមិនរួច ចង់ត្រលប់ទៅក្រោយក៏មិនរួច។ នេះជាស្ថានភាពរបស់ជនអន្តោប្រវេសន៍រាប់ម៉ឺន រាប់សែននាក់ ដែលកំពុងជាប់គាំងនៅព្រំដែន ឬនៅលើផ្លូវចំណាកស្រុក បន្ទាប់ពីរដ្ឋាភិបាលប្រទេសជាច្រើនបានចាត់វិធានការបិទព្រំដែន បិទទីក្រុង ដោយសារកូវីដ ១៩។ តាម អង្គការIOM (អង្គការអន្តរជាតិ ទេសន្តរប្រវេសន៍) ទទួលបន្ទុកជនអន្តោប្រវេសន៍ របស់អង្គការសហប្រជាជាតិ ជនអន្តោប្រវេសន៍ ជាច្រើន នៅតំបន់អាស៊ីអាគ្នេយ៍ អាហ្រ្វិកខាងកើត និងនៅអាមេរិកឡាទីន បានព្យាយាមចង់ត្រលប់ទៅប្រទេសកំណើតវិញ ប៉ុន្តែ ពួកគេមិនអាចធ្វើបាន ដោយសារវិធានការបិទព្រំដែន។
លោក Antonio Vitorino អគ្គនាយករបស់អង្គការIOM បាននិយាយថា ជនអន្តោប្រវេសន៍ ភាគច្រើនចង់ត្រលប់ទៅប្រទេសកំណើតវិញ ដោយសារខ្លាចឆ្លងកូវីដ នៅកន្លែងដែលពួកគេកំពុងស្ថិតនៅ។ តាមអគ្គនាយករបស់IOM ជំរំដាក់ជនអន្តោប្រវេសន៍ ជាកន្លែងដែលជំងឺកូវីដ ងាយនឹងរាតត្បាតលឿន ដោយសារ តែជំរំ សំបូរដោយមនុស្សនៅកកកុញ ជិតគ្នា គ្មានការរក្សាគម្លាតសង្គម ហើយនិងមានបញ្ហាខ្វះខាតទឹក និងអនាម័យ។
អង្គការIOM គ្រប់គ្រងជំរំជនអន្តោប្រវេសន៍ប្រមាណ ១១០០កន្លែង នៅក្នុងពិភពលោក និងផ្តល់ជំនួយដល់មនុស្សជាង ២,៤លាននាក់ដែលបានផ្លាស់ទី នៅឆ្នាំ២០១៩។
“ជនអន្តោប្រវេសន៍ ដែលនៅជាប់គាំង នៅព្រំដែន កំពុងរស់នៅក្នុងស្ថានភាពលំបាក ខ្វះខាតសព្វគ្រប់ និងមិនបានទទួលសេវាពេទ្យ ឬការត្រួតពិនិត្យសុខភាព នោះទេ។ តាមសេចក្តីរាយការណ៍ គេបានរកឃើញករណីឆ្លងកូវីដ ចំនួន ១១០ករណីនៅក្នុងជំរំជនអន្តោប្រវេសន៍ នៅក្នុងប្រទេសក្រិក។ នៅពេល ពួកគេទាំងនោះ បានទទួលការព្យាបាលនៅមន្ទីរពេទ្យ ក្រិក IOMកំពុងបារម្ភ ខ្លាំង ពីការផ្ទុះជំងឺ កូវីដ នៅក្នុងជំរំជនភៀសខ្លួន រ៉ូហ៊ីងយ៉ា នៅក្នុងទឹកដីបង់ក្លាដែស។ នៅទីនោះ មនុស្សជាង១លាននាក់ ដែលបានរត់គេចខ្លួនពីអំពើហិង្សា នៅរដ្ឋរ៉ាឃីន ប្រទេសភូមា កំពុងរស់នៅ កកផ្តុំគ្នា និងមិនអាចគោរពគោលការណ៍ រក្សាគម្លាតសង្គម ដើម្បីទប់ស្កាត់ការឆ្លងមេរោគកូរ៉ូណានោះទេ។
តាមអគ្គនាយករបស់IOM បច្ចុប្បន្ននេះ អង្គការកំពុងស្នើសុំឲ្យរដ្ឋាភិបាល ម្ចាស់ស្រុកអនុញ្ញាតឲ្យបុគ្គលិកផ្តល់ជំនួយ អាចចូលទៅធ្វើការជាមួយក្រុមមនុស្សដែលនៅកកស្ទះ នៅតាមព្រំដែន។ អង្គការបានអំពាវនាវផងដែរ ឲ្យជនអន្តោប្រវេសន៍ អាច ទទួលបានសេវាព្យាបាល ជាតិរបស់ប្រទេស ដែលពួកគេស្ថិតនៅ ដើម្បីជៀសវាង ការឆ្លងរីករាលដាលរបស់កូវីដ ដូចជាករណីរបស់សិង្ហបុរី ដែលនៅទីនោះ ជោគជ័យរបស់រដ្ឋាភិបាលក្នុងការប្រយុទ្ធទប់ទល់នឹងកូវីដ ត្រូវបានរលាយបាត់ទៅវិញ ដោយសារ ជំងឺកូវីដ បានឆ្លងរាតត្បាតក្នុងចំណោម ពលករអន្តោប្រវេសន៍ ដែលគ្មានក្នុងបញ្ជីតាមដានសុខភាព របស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ