វិបត្តិកូវីដ ទម្លាយឱ្យឃើញអំពីភាពក្រីក្រនៅក្នុងប្រទេសស្វីស
ស្វីសជាប្រទេសអ្នកមានជាងគេបំផុតមួយនៅអឺរ៉ុប និងនៅលើពិភពលោក។ ហ្សឺណែវជាទីក្រុងដែលថ្លៃជាងគេបំផុតមួយនៅលើពិភពលោក ល្បីខាងមានធនាគារឯកជនធំៗផ្តុំនៅច្រើន ហាងនាឡិកាថ្លៃៗ ទំនិញប្រណិតៗ ប៉ុន្តែគេពិតជាភ្ញាក់ផ្អើលខ្លាំងនៅពេលឃើញមានប្រជាជនរស់នៅក្នុងប្រទេសនេះ មកឈរតម្រង់ជួរយ៉ាងវែង ជាងមួយគីឡូម៉ែត្រ និងត្រូវរង់ចាំដល់ទៅ៤-៥ម៉ោង ដើម្បីសុំជំនួយស្បៀងអាហារ។ នេះជាផលវិបាកមួយដែលបង្កឡើងដោយវិបត្តិកូរ៉ូណាវីរុសថ្មី។
ចុះផ្សាយនៅថ្ងៃ៖
ស្តាប់ - ០២:០៤
បើតាមអ្នករៀបចំកម្មវិធី មានប្រជាជនកាន់តែច្រើនឡើងៗ បានមកសុំជំនួយ ជាស្បៀងអាហារចាំបាច់ដូចជា អង្ករ គ្រាប់ធញ្ញជាតិ កាហ្វេ ...។ នៅក្នុងការចែកចាយស្បៀងអាហារលើកដំបូង គេរាប់ឃើញមានអ្នកមកសុំតែប្រមាណ៥០០នាក់ និងដល់ជាង២០០០នាក់ នៅថ្ងៃសៅរ៍ទី ៩ ឧសភាម្សិលមិញ ហើយអាចនឹងមានច្រើនថែមទៀត នៅលើកក្រោយ។
ប្រឈមនឹងការរាតត្បាតនៃជំងឺកូវីដ១៩ ដែលបានសម្លាប់ពលរដ្ឋស្វីសអស់ជាង ១៥០០នាក់ ស្វីសបានចាត់វិធានការអាសន្នសុខាភិបាល បិទហាងទំនិញ បិទភោជនីដ្ឋាន តាំងពីពាក់កណ្តាលខែមីនាមក។ ស្វីសចាប់លើកវិធានការទាំងនោះចេញវិញហើយ ប៉ុន្តែ ការបិទខ្ទប់សេដ្ឋកិច្ច ក្នុងរយៈពេលជិតពីរខែកន្លងមកនេះ បានបន្សល់ទុក្ខនូវផលវិបាកយ៉ាងធ្ងន់ធ្ងរ ចំពោះពលករបរទេសគ្មានលិខិតស្នាម (អន្តោប្រវេសន៍ខុសច្បាប់) និងចំពោះប្រជាពលរដ្ឋក្រីក្រស្វីសជាទូទៅ។
បើតាមការិយាល័យស្ថិតិសហព័ន្ធ មានប្រជាពលរដ្ឋស្វីសប្រមាណ ៨% ត្រូវជាប្រមាណជិត ៦៦ម៉ឺននាក់ រស់ក្នុងភាពក្រីក្រ គ្មានការធានារ៉ាប់រងសុខភាព និងជាប្រមាណ១លាននាក់ រស់ក្នុងស្ថានភាពជីវភាពទន់ខ្សោយ។ មានឈ្មោះជាប្រទេសអ្នកមាន មិនមែនមានន័យថាប្រទេសគ្មានអ្នកក្រីក្រទេ ប៉ុន្តែអ្វីដែលគួរឱ្យភ្ញាក់ផ្អើលខ្លាំង គឺ ចំនួនអ្នកងាយរងគ្រោះ និងភាពងាយរងគ្រោះ របស់ពលរដ្ឋក្នុងពេលមានវិបត្តិកូវីដ។ នេះបើតាមអ្នកទទួលខុសត្រូវផ្នែកសម្របសម្រួលជំនួយពេលមានវិបត្តិប្រចាំក្រុងហ្សឺណែវ។
នៅក្នុងចំណោមអ្នកមកសុំជំនួយ ៥៥០នាក់ ដែលក្រុមអ្នកអង្កេតបានសិក្សា ពាក់កណ្តាលជាជនអន្តោប្រវេសន៍គ្មានលិខិតស្នាម តែធ្លាប់មានការងារធ្វើ មួយភាគីបីជាពលករបរទេសមានបណ្ណស្នាក់នៅ និង៤%ជាពលរដ្ឋសញ្ជាតិស្វីស។ ពលរដ្ឋស្រទាប់នេះ ងាយឆ្លងកូវីដ១៩ ដល់ទៅបីដងលើសប្រជាពលរដ្ឋស្វីសជាទូទៅ។ សម្រាប់អង្គការគ្រូពេទ្យគ្មានព្រំដែន ដែលសហការរៀបចំកម្មវិធីចែកចាយជំនួយស្បៀង កូវីដបានវែកឱ្យឃើញពីភាពក្រីក្រនៅ នៅហ្សឺណែវ ដែលត្រូវបានបិទបាំងដោយភាពមានបាន ពីមុនមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ