កូវីដ១៩៖ អង់គ្លេសបន្តបិទខ្ទប់ប្រទេសទាំងស្រុង ដល់ដើមខែមិថុនា
ខណៈដែលប្រទេសមួយចំនួននៅអឺរ៉ុប មានបារាំង អេស្ប៉ាញ អ៊ីតាលី អាល្លឺម៉ង់ ជាដើម បាននាំគ្នាចាប់ផ្តើម បើកបប្រទេសឡើងវិញដោយសន្សឹមៗ ប្រទេសអង់គ្លេសឯណោះ បានសម្រេច ថានឹងបន្តការបិទខ្ទប់ប្រទេសទាំងស្រុងនេះ រហូតដល់ដើមខែមិថុនា។ លោកបូរីស ចនសុន នាយករដ្ឋមន្ត្រីអង់គ្លេស បានប្រកាសនៅថ្ងៃទី១០ឧសភាថា បើសិនជាស្ថានភាពឆ្លងរាលដាល នូវជម្ងឺកូវីដ១៩ បានប្រសើរឡើង នោះលោកនឹងសម្រេចបើកប្រទេសឡើងវិញជាដំណាក់ៗ ចាប់ពីខែមិថុនាទៅ។
ចុះផ្សាយនៅថ្ងៃ៖
ស្តាប់ - ០២:៣៦
នៅក្នុងសន្ទរកថា ទៅកាន់ប្រជាជនអង់គ្លេស កាលពីយប់ថ្ងៃអាទិត្យទី១០ឧសភា លោកបូរីស ចនសុន បានប្រកាសថា៖ ថ្វីបើកន្លងមកនេះ ប្រជាជនអង់គ្លេសគ្រប់គ្នា បានប្រឹងប្រែងគោរពបទបញ្ជា សំងំក្នុងផ្ទះ រក្សាចម្ងា យពីគ្នា បានល្អក្តី ក៏ប៉ុន្តែការប្រឹងប្រែងនេះ មិនអាចបញ្ឈប់វានៅពេលនេះបានទេ។ ការបិទខ្ទប់ប្រទេសទាំងស្រុង នឹងបន្តអនុវត្តរហូត ដល់ដើមខែមិថុនា។ ប៉ុន្តែចាប់ពីថ្ងៃពុធទី១៣ឧសភាទៅ ប្រជាជនអាចចេញដើរក្រៅផ្ទះ ដើម្បីឲ្យធូរសរសៃ ស្រូបខ្យល់អាកាស ជាមួយនឹងសមាជិកក្រុមគ្រួសារខ្លួន។
លោកនាយករដ្ឋមន្ត្រីអង់គ្លេសបន្តថា លោកសង្ឃឹមយ៉ាងមុតមាំថា នៅរវាងដើមខែមិថុនា បើសិនជាស្ថានការណ៍បានប្រសើរ លោកនឹងសម្រេចបើកសាលារៀន ចាប់ពីថ្នាក់មត្តេយ្យដល់ថ្នាក់អនុវិទ្យាល័យឡើងវិញ ហើយនឹងអាចបើក ឲ្យសកម្មភាពសេដ្ឋកិច្ចអាចដំណើរការឡើងវិញបានដូច បើកហាងទំនិញ និងក្រុមហ៊ុនសហគ្រាសផ្សេងៗ។ ដោយឡែក ចំពោះភោជនីយដ្ឋាន បារ ហាងកាហ្វេ និងទីតាំងសាធារណៈផ្សេងទៀត អាចត្រូវបើកដំណើរការឡើងវិញបាន នៅដើមខែកក្កដា បើសិនជាស្ថានការណ៍បានប្រសើរឡើង។ រដ្ឋាភិបាលអង់គ្លេស មានកម្មវត្ថុ ធ្វើតេស្តស្វែងរកមេរោគ ឲ្យបានចំនួន២សែនតេស្ត ក្នុងមួយថ្ងៃចាប់ពីចុងខែឧសភាទៅ។
ទាក់ទិននឹងការមកដល់របស់អ្នកដំណើរចូលអង់គ្លេស តាមផ្លូវអាកាស លោកបូរីស ចនសុន បានបញ្ជាក់ថា រដ្ឋាភិបាលកំពុងពិចារណា ចង់ដាក់អ្នកដំណើរទាំងអស់ ដែលមកដល់តាមយន្តហោះ ឲ្យនៅដាច់ដោយឡែក រយៈពេល១៤ថ្ងៃ។ ដោយឡែក អ្នកដំណើរ ដែលទៅដល់ពីបារាំង និងពីអៀរឡើង គឺមិនជាប់ក្នុងវិធានការនេះទេ។ បើទោះបីលោកបូរីស ចនសុន មិនបានបញ្ជាក់លំអិត អំពីវិធានការនេះ ព្រមទាំងកាលបរិច្ឆេទចូលជាធរមានក៏ដោយ តែដំណឹងនេះ បានធ្វើឲ្យក្រុមហ៊ុនអាកាសចរណ៍ មានការបារម្ភរួចទៅហើយ។
លោកបូរីស ចនសុន បានអំពាវនាវ ឲ្យបុគ្គលិកទាំងអស់ បើអាចធ្វើទៅបាន គឺត្រូវបន្តធ្វើការងារពីផ្ទះ។ តែប្រសិនបើចាំបាច់ត្រូវទៅដល់កន្លែងធ្វើការ លោកចនសុន បានអំពាវនាវ ឲ្យចៀសវៀងប្រើប្រាស់ បណ្តាញដឹកជញ្ជូនសាធារណៈតាមតែអាចធ្វើទៅបាន និងត្រូវរក្សាចំងាយយ៉ាងហោច១ម៉ែត្រពីគ្នា។
គួរកត់សំគាល់ថា ការប្រកាសរបស់លោកបូរីស ចនសុននេះ ត្រូវបានអ្នកនយោបាយបក្សប្រឆាំងអង់គ្លេសមួយចំនួនប រិះគន់ថាគ្មានភាពច្បាស់លាស់។ ប្រមុខរដ្ឋាភិបាលតំបន់ស្កុតលែន បានលើកឡើងថា ពាក្យអំពាវនាវរបស់លោកចនសុន ឲ្យប្រជាជនសំងំក្នុងផ្ទះ ហើយព្រមជាមួយគ្នានេះ ឲ្យប្រុងប្រយ័ត្នពេលចេញទៅក្រៅ គឺវាហាក់ដូចជាទូលំទូលាយពេក គ្មានការកំណត់ឲ្យច្បាស់ប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ