ក្រុមហ៊ុនផលិតឱសថ ថា គេនឹងអាចរកឃើញ វ៉ាក់សាំងប្រឆាំងកូវីដ ឲ្យបានមុនដំណាច់ឆ្នាំនេះ
ក្រុមហ៊ុនផលិតឱសថអន្តរជាតិធំៗដែលបានជួបប្រជុំគ្នាតាមវីដេអូconference នៅទីក្រុងហ្សឺណែវ កាលពីថ្ងៃព្រហស្បតិ៍ម្សិលមិញនេះ បានអះអាងថា គេនឹងអាចរកឃើញ វ៉ាក់សាំងប្រឆាំងកូវីដ ១៩ នៅមុនឆ្នាំ២០២១។ ប៉ុន្តែ យ៉ាងណាក៏ដោយ គេបានព្រមានពីបញ្ហាប្រឈម ជាច្រើន ជាពិសេសនៅពេលគេត្រូវការផលិតវ៉ាក់សាំង ដល់ទៅជាង ១៥ពាន់លានដូស ដើម្បីអាចបញ្ឈប់ ទប់ស្កាត់ជំងឺរាតត្បាតកូវីដ ១៩។
ចុះផ្សាយនៅថ្ងៃ៖
ស្តាប់ - ០២:២៥
តាមអង្គការសុខភាពពិភពលោក មានប្រទេស និងក្រុមហ៊ុនផលិតឱសថ ជាង ១០០ដែលកំពុងសិក្សា ស្រាវជ្រាវរកវ៉ាក់សាំងប្រឆាំងជំងឺកូវីដ នៅក្នុងពិភពលោក ដែល នៅក្នុងនោះ វ៉ាក់សាំងជាង១០មុខ ត្រូវបានគេចាប់សាកល្បងវេជ្ជសាស្រ្ត។
នៅក្នុងសន្និសីទវីដេអូ នៅទីក្រុងហ្សឺណែវ ដែលរៀបចំឡើងដោយ សមាគម និងសហព័ន្ធ ក្រុមហ៊ុនផលិតឱសថអន្តរជាតិ ប្រធានក្រុមហ៊ុនផលិតឧសថAstra Zeneca ដែលចាប់ដៃជាមួយសកលវិទ្យាល័យ Oxford ដើម្បីអភិវឌ្ឍ និងសាកល្បងវ៉ាក់សាំងនៅប្រទេសអង់គ្លេស បានអះអាងថា ជាមួយក្តីសង្ឃឹម គេនឹងរកបានវ៉ាក់សាំង មួយ និងច្រើនជាងនេះ សម្រាប់ប្រឆាំងនឹងជំងឺកូវីដ នៅដំណាច់ឆ្នាំនេះ។
ប្រធានក្រុមហ៊ុន ផលិតឱសថអាមេរិកាំង ដ៏ធំ Pfizer វិញ បាននិយាយថា ក្រុមហ៊ុនរបស់លោកដែលកំពុងសិក្សាជាមួយភាគីអាល្លឺម៉ង់ ដើម្បី សាកល្បងវ៉ាក់សាំងនៅអឺរ៉ុប នឹងអាចរកឃើញវ៉ាក់សាំង បានក្នុងអំឡុង ខែតុលាខាងមុខ។ ជាទូទៅ គេត្រូវការពេលវេលាយូរឆ្នាំដើម្បីស្វែងរកវ៉ាក់សាំង និងការផ្តល់អាជ្ញាប័ណ្ណ សម្រាប់វ៉ាក់សាំងនីមួយៗ។ ប៉ុន្តែ ប្រឈមនឹងជំងឺ កូវីដដែលកំពុងរាតត្បាតខ្លាំងក្នុងពិភពលោក គេនឹងផ្តល់អាជ្ញាប័ណ្ណបន្ទាន់សម្រាប់ ការប្រើប្រាស់ វ៉ាក់សាំង ដែលការសិក្សាសាកល្បងកន្លងមក បានបង្ហាញថា មានសុវត្ថិភាព និងប្រសិទ្ធិភាព។
សម្រាប់សមាគមនិងសហព័ន្ធក្រុមហ៊ុនផលិតឱសថ គេត្រូវការវ៉ាក់សាំង ដល់ទៅ ១៥ពាន់លានដូស សម្រាប់ទប់ស្កាត់ការឆ្លងរាតត្បាតរបស់ជំងឺកូវីដ១៩ នាពេលបច្ចុប្បន្ននេះ។ ដើម្បីអាចផលិតវ៉ាក់សាំង ក្នុងចំនួន ដូស ដ៏ច្រើនបែបនេះ គឺគេត្រូវប្រឈមនឹងបញ្ហាគួរឲ្យបារម្ភជាច្រើន។ ទី១ ការធ្លាក់ចុះនៃអត្រាអ្នកឆ្លងនៅទឹកដីអឺរ៉ុបអាចជះឥទ្ធិពលទៅលើប្រសិទ្ធិភាពនៃការធ្វើតេស្តសាកល្បងវ៉ាក់សាំង ដែលកំពុងដំណើរការនៅអឺរ៉ុប។ ម្យ៉ាងទៀត ដើម្បីអាចផលិតវ៉ាក់សាំង ដល់ទៅ ១៥ពាន់លានដូស ដើម្បីចែកចាយ ដោយយុត្តិធម៌ និងស្មើភាព សម្រាប់មនុស្សនៅលើផែនដី គេត្រូវការ ហេដ្ឋារចនាសម្ព័ន្ធ និងមធ្យោបាយដ៏ធំសម្បើមមួយ។
តាមប្រធានក្រុមហ៊ុនផលិតឱសថAstraZeneca បញ្ហាប្រឈម របស់ក្រុមហ៊ុន គឺការស្តុកដូសវ៉ាក់សាំង ព្រោះថា គេមិនអាចរកឲ្យបានដប សម្រាប់វ៉ាក់សាំង ដល់ទៅ ១៥ពាន់លានដូសនោះទេ។ ដើម្បី ផលិតឲ្យបានវ៉ាក់សាំង ដល់ទៅ ១៥ពាន់លានដូស គេត្រូវការ វ៉ាក់សាំង ប្រឆាំងកូវីដ ផ្សេងៗគ្នា ដើម្បីសម្របទៅតាមតម្រូវការ នៅហ្នឹងកន្លែង។ តាមប្រធានក្រុមហ៊ុន AstraZeneca នៅក្នុងចំណោមវ៉ាក់សាំង ទាំង១០០មុខ ដែលគេកំពុងស្រាវជ្រាវរក មានប្រមាណតែ ពី៥ ទៅ១០ ដែលគេត្រូវការសម្រាប់ការប្រើប្រាស់ក្នុងពិភពលោកទាំងមូល។
នៅពេលគេទាមទារឲ្យមានការចែកចាយ ដោយសមភាព និងយុត្តិធម៌ វ៉ាក់សាំងនៅក្នុងពិភពលោក ដោយមិនប្រកាន់រើសអើង ប្រទេសក្រីក្រ ឬប្រទេសអ្នកមាន ក្រុមហ៊ុនផលិតឱសថ បានបញ្ជាក់រួចហើយថា គេនឹងនៅតែរក្សា កម្មសិទ្ធិបញ្ញា សម្រាប់វ៉ាក់សាំង ដែលគេរកឃើញ ព្រោះថា នេះ ជាមូលដ្ឋានគ្រឹះ សម្រាប់ ការងារស្រាវជ្រាវ ទៅមុខ របស់ឧស្សាហកម្មផលិតឧសថ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ