អាល្លឺម៉ង់បារម្ភចំពោះផែនការរបស់អាមេរិកដែលចង់កាត់បន្ថយចំនួនកងទ័ពពីទឹកដីអាល្លឺម៉ង់
ប្រទេសអាល្លឺម៉ង់ នៅថ្ងៃអាទិត្យ ៧ មិថុនា បានសម្តែងការព្រួយបារម្ភ ចំពោះរបាយការណ៍ដែលថាលោកប្រធានាធិបតីអាមេរិក ដូណាល់ ត្រាំ គ្រោងនឹងកាត់បន្ថយចំនួនកងទ័ពអាមេរិកដែលឈរជើងនៅក្នុងទឹកដីអាល្លឺម៉ង់។ មន្ត្រីរដ្ឋាភិបាលអាល្លឺម៉ង់ភ័យខ្លាចថាផែនការរបស់អាមេរិកនេះ អាចនឹងធ្វើឱ្យកម្លាំងការពាររបស់អូតង់ធ្លាក់ចុះខ្សោយនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០២:៣៦
ផែនការរបស់លោកដូណាល់ ត្រាំ ក្នុងការកាត់បន្ថយកម្លាំងទ័ពអាមេរិកបានធ្វើឲ្យអាល្លឺម៉ង់ភ្ញាក់ផ្អើលនិងស្រឡាំងកាំងជាខ្លាំង។ សម្រាប់ទីក្រុងប៊ែកឡាំង ផែនការរបស់អាមេរិកនឹងធ្វើឲ្យប៉ះពាល់ដល់ចំណងមិត្តភាពរវាងប្រទេសទាំងពីរ និងបង្កជាហានិភ័យផ្នែកសន្តិសុខនៅក្នុងតំបន់អឺរ៉ុប។
“កិច្ចសហប្រតិបត្តិការល្អរវាងអាល្លឺម៉ង់ជាមួយនឹងកងទ័ពអាមេរិកមានរយៈពេលជាច្រើនទសវត្សរ៍កន្លងមកហើយ ហើយយើងគឺជាដៃគូជិតស្និទ្ធនៅក្នុងសម្ព័ន្ធអាត្លង់ទិកខាងជើង”។ នេះ គឺជាប្រសាសន៍របស់រដ្ឋមន្ត្រីការបរទេសអាល្លឺម៉ង់លោក Heiko Maas ដោយថែមទទួលស្គាល់ថា ទំនាក់ទំនងរវាងប្រទេសអាល្លឺម៉ង់ហើយនិងសហរដ្ឋអាមេរិក បានចាប់ផ្តើមប្រែទៅជាតានតឹងក្រោមការគ្រប់គ្រងរបស់លោកដូណាល់ ត្រាំ។
គួរបញ្ជាក់ជូនថា កាលពីថ្ងៃសុក្រ ទី៥ មិថុនា សារព័ត៌មាន Wall Street Journal និងប្រព័ន្ធផ្សព្វផ្សាយជាច្រើនទៀតបានរាយការណ៍ថា លោកត្រាំ បានចេញបញ្ជាឲ្យមន្ទីរបញ្ចកោណកាត់បន្ថយចំនួនកងទ័ពអាមេរិកដែលឈរជើងនៅក្នុងប្រទេសអាល្លឺម៉ង់។ តាមការចុះផ្សាយ លោក ដូណាល់ ត្រាំ ចង់កាត់បន្ថយចំនួនទ័ពអាមេរិកដែលសព្វថ្ងៃមាន ៣៤ ៥០០ នាក់ ឲ្យចុះមកត្រឹម ២៥ ០០០នាក់វិញ។
ចំណាត់ការបែបនេះ ហាក់បញ្ជាក់ប្រាប់ថាអាមេរិករបស់លោកត្រាំចង់កាត់បន្ថយការចូលរួមក្នុងកិច្ចការពារជាតិអឺរ៉ុបក្រោមឆត្ររបស់សម្ព័ន្ធអូតង់ និងហាក់ដូចជាធ្វើឲ្យក្រុងប៊ែរឡាំងធ្លាក់ចូលក្នុងស្ថានភាពដ៏លំបាកមួយ។
រដ្ឋមន្ត្រីការបរទេសអាល្លឺម៉ង់បានលើកឡើងថា ផែនការចុងក្រោយរបស់អាមេរិកនេះធ្លាក់មក បន្ទាប់ពីអាល្លឺម៉ង់នៅតែប្រកាន់ជំហរបន្តគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់ និងបន្ទាប់ពីអាល្លឺម៉ង់បានចាប់ដៃជាមួយប្រទេសរុស្សីក្នុងគម្រោងសង់បំពង់បង្ហូរឧស្ម័ន Nord Stream2។
យ៉ាងណាក៏ដោយ គេនៅមិនឃើញមានការបញ្ជាក់ណាមួយភ្លាមៗ ពីមន្ត្រីរដ្ឋាភិបាលអាមេរិកនោះទេ ជុំវិញគម្រោងកាត់បន្ថយកងទ័ពនៅអាល្លឺម៉ង់។ ក៏ប៉ុន្តែ ការរិះគន់ទិតៀននៅគ្រាកន្លងមករបស់លោកដូណាល់ ត្រាំ ទៅលើសមាជិកអូតង់មួយចំនួនដែលក្នុងនោះក៏មានអាល្លឺម៉ង់មួយដែរ បំផុសឲ្យមានការព្រួយបារម្ភពីសន្តិសុខនៅក្នុងតំបន់អឺរ៉ុប។ មេដឹកនាំអាមេរិករូបនេះ បានដំឡើងសំឡេងយ៉ាងខ្លាំងដាក់ប្រទេសអាល្លឺម៉ង់នៅប៉ុន្មានឆ្នាំថ្មីៗនេះ និងបានទាមទារផងដែរឲ្យអាល្លឺម៉ង់បង់វិភាគទានឲ្យអូតង់ក្នុងចំនួនច្រើនជាងមុន។
លោក Johann Wadephul សមាជិកជាន់ខ្ពស់ម្នាក់របស់គណបក្សកាន់អំណាចអាល្លឺម៉ង់បាននិយាយថាផែនការកាត់បន្ថយកងទ័ពរបស់អាមេរិកគឺជាចលករដ៏សំខាន់មួយទៀតជួយដាស់ស្មារតីប្រទេសអឺរ៉ុបឲ្យងាកមកគិតគូរអំពីកិច្ចការពារខ្លួនដោយខ្លួនឯងផ្ទាល់ និងមិនចាំបាច់ពឹងពាក់អាមេរិកតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ