តើនរណានឹងក្លាយជាប្រមុខអង្គការពាណិជ្ជកម្មពិភពលោកថ្មី ? ជនជាតិអឺរ៉ុបឬអាហ្វ្រិក ?
អង្គការពាណិជ្ជកម្មពិភពលោក (WTO) បានចាប់ផ្តើមដំណើរការជ្រើសរើសអគ្គនាយកអង្គការថ្មី នៅថ្ងៃចន្ទទី ៨មិថុនា២០២០ សម្រាប់មកជំនួសអគ្គនាយកចាស់។ អគ្គនាយកកំពុងកាន់តំណែងលោក រ៉ូប៊ែរតូ អាហ្សេវេដូ Roberto Azevedoជាតិប្រេស៊ីល បានសុំលាលែងចេញពីតំណែងចាប់ពីចុងខែសីហាទៅ ពោលគឺមួយឆ្នាំគត់មុនចប់អាណត្តិ។ បេក្ខជនអាចមកដាក់ពាក្យចាប់ពីថ្ងៃចន្ទទី ៨ មិថុនារហូតដល់ថ្ងៃទី ៧កក្កដា ២០២០។ ប្រភពសារព័ត៌មានលើកនិយាយច្រើនអំពីបេក្ខជនមកពី អាហ្វ្រិកនិងអឺរ៉ុប។
ចុះផ្សាយនៅថ្ងៃ៖
ស្តាប់ - ០២:០៣
បើទោះបីការជ្រើសរើសប្រមុខដឹកនាំអង្គការពាណិជ្ជកម្មពិភពលោក មិនរំពឹងលើប្រព័ន្ធឆ្លាស់វេន វិលម្តងឱ្យបេក្ខជនមកពីទ្វីបនេះ ម្តងឱ្យទ្វីបនោះធ្វើជាប្រធានក៏ដោយ ក៏ទ្វីបអាហ្វ្រិកហាក់មានសង្ឃឹមថាបេក្ខជនខ្លួននឹងបានឡើងកាន់តួនាទីនេះជាលើកទីមួយ។ គ្រាន់តែថាពេលនេះអាហ្វ្រិកពុំទាន់សម្រេចព្រមព្រៀងគ្នា រកឃើញបេក្ខជនតែម្នាក់គត់សម្រាប់តំណាងទ្វីបនៅឡើយទេ។
អាហ្វ្រិកកំពុងរារែកលើបេក្ខជនបេក្ខនារីជាច្រើនរូប មានអាទិ៍ អតីតប្រមុខការទូតអេហ្ស៊ីប លោក អាមីដ មាំដូ Hamid Mamdouh ដែលធ្លាប់ធ្វើការក្នុងអង្គការតាំងពីយូរ ឬក៏រូបលោក អេឡ័រ ឡាអ៊ូរ៉ូ Eloi Laourou ជាតិបេណាំង ជាឯកអគ្គរដ្ឋទូតបេណាំងប្រចាំអង្គការសហប្រជាជាតិ ឬលោកស្រី អាមីណា ម៉ូហាម៉េដ Amina Mohamed ជាតិកេនយ៉ា ដែលធ្លាប់ប្រជែងនឹងលោកអាហ្សេវេដូ កាលពីឆ្នាំ២០១៣។ ចំណែកនីហ្សេរីយ៉ាវិញ បែរជាស្នើបេក្ខជនម្នាក់ផ្សេងទៀត ដោយឈប់គាំទ្របេក្ខភាពលោកស្រី យូណូវ ហ្វ្រេដេរិក អាហ្កះ Yonov Frederick Agah ដែលជាអគ្គនាយករងអង្គការពាណិជ្ជកម្មពិភពលោកស្រាប់ទៅវិញ។ សហភាពអាហ្វ្រិកសង្ឃឹមថានឹងអាចសម្រេចកំណត់បេក្ខជនរបស់ទ្វីបបាននៅមុខខែកក្កដា។
អាហ្វ្រិកមិនដែលធ្លាប់បានតួនាទីជាមេដឹកនាំអង្គការពាណិជ្ជកម្មពិភពលោកសោះ ប៉ុន្តែសំឡេងជាច្រើនស្រែកទាមទារចង់បានប្រមុខដឹកនាំមកពីប្រទេសអភិវឌ្ឍន៍ជាង ដើម្បីឱ្យជាការផ្លាស់ប្តូរពិតៗឆ្លាស់ជាមួយនឹងចាកចេញរបស់ប្រេស៊ីល។
ក្នុងន័យនេះមានបេក្ខភាពមកពីអឺរ៉ុបច្រើនកំពុងរសាត់ក្នុងប្រព័ន្ធឃោសនា ដូចជា ឈ្មោះលោក ហ្វីល ហូហ្កង់ Phil Hogan ឧត្តមស្នងការពាណិជ្ជកម្មអឺរ៉ុបជាតិអៀរឡង់ រដ្ឋមន្ត្រីក្រសួងពាណិជ្ជកម្មហូឡង់ លោក Sigrid Kaag រដ្ឋមន្ត្រីក្រសួងការបរទេសអេស្ប៉ាញលោកស្រី Arancha Gonzalez។ សហភាពអឺរ៉ុបនឹងសម្រេចនៅថ្ងៃអង្គារថាគួរមានបេក្ខជនតែម្នាក់តំណាងអឺរ៉ុបយ៉ាងណា។
សូមបញ្ជាក់ថា អគ្គនាយកអង្គការពាណិជ្ជកម្មពិភពលោកទី៦ លោក រ៉ូប៊ែរតូ អាហ្សេវេដូ បានប្រកាសលាលែងចេញពីតំណែង មុនអាណត្តិ និងក្នុងពេលពិភពលោកកំពុងលង់ក្នុងវិបត្តិកូរ៉ូណាវីរុស ក្រោមហេតុផលគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ