ស្ថានភាពកូវីដ១៩បន្តធ្ងន់ធ្ងរនៅអាមេរិកឡាទីន សហភាពអឺរ៉ុបត្រៀមបើកព្រំដែននៅខែកក្កដា
កូវីដ១៩ បាននិងកំពុងបន្តការរាតត្បាតនៅទ្វីបអាមេរិក។ មានស្លាប់ជាង៧ម៉ឺននាក់នៅទ្វីបអាមេរិកឡាទីននិងតំបន់ប្រជុំកោះការ៉ាអ៊ីប។ គិតត្រឹមយប់ថ្ងៃពុធឆ្លងមកថ្ងៃព្រហស្បតិ៍ សហរដ្ឋអាមេរិករាប់ឃើញមានឆ្លងមេរោគកូរ៉ូណាថ្មី ឡើងដល់ជាងពីរលាននាក់។ តែនៅខាងទ្វីបអឺរ៉ុបវិញ អង់គ្លេសចាប់បន្ធូរបន្ថយវិធានការបិទខ្ទប់ សហភាពអឺរ៉ុបកំពុងពិចារណាបើកព្រំប្រទល់ឡើងវិញនៅខែកក្កដា។
ចុះផ្សាយនៅថ្ងៃ៖
ស្តាប់ - ០២:០១
កូវីដ១៩បានសម្លាប់ជីវិតអស់ជាង ៤១៤០០០នាក់ និងបានចម្លងលើមនុស្សជាង៧លានបីសែននាក់ នៅទូទាំងពិភពលោក។ តែទ្វីបអាមេរិកបន្តស្ថិតក្នុងស្ថានភាពធ្ងន់ធ្ងរជាងគេ។ រាប់ពីប្រទេសម៉ិចស៊ិកចុះទៅ តំបន់អាមេរិកឡាទីន និងតំបន់ប្រជុំកោះការ៉ាអ៊ីប មានអ្នកឆ្លងកូវីដសរុបឡើងដល់ជិត១លាននាក់កន្លះ មានអ្នកស្លាប់សរុបជាង ៧ម៉ឺន១ពាន់១រយនាក់។ ប្រេស៊ីលបានក្លាយជាប្រទេសរងគ្រោះខ្លាំងមានមនុស្សស្លាប់ច្រើនជាងគេ ជាប់លំដាប់ទីបីពិភពលោក (ជិតបួនម៉ឺននាក់ស្លាប់) បន្ទាប់មកគឺម៉ិចស៊ិក (ជាង១៥០០០នាក់ស្លាប់ និងអ្នកឆ្លងជាង១២ម៉ឺននាក់) ប៉េរ៉ូមានជាង២០ម៉ឺនករណី ប៉ាណាម៉ាមាន១៧៨៨៤ករណី។
នៅសហរដ្ឋអាមេរិក ចំនួនមនុស្សស្លាប់បានឡើងដល់ជាង១១២៩០០នាក់ ករណីឆ្លងកូវីដបានឡើងដល់ជាងពីរលាននាក់ ជាមួយនឹងកំណើនអ្នកឆ្លងថ្មីប្រមាណ២ម៉ឺននាក់ក្នុងមួយថ្ងៃៗ។
ប៉ុន្តែមិនថាអាមេរិកនិងប្រេស៊ីលឬម៉ិចស៊ិកទេ ទោះបីមានតួលេខអ្នកស្លាប់និងឆ្លងថ្មីនៅតែច្រើនក្តី ក៏ប្រទេសចាប់បើកដំណើរការសេដ្ឋកិច្ចឡើងវិញជាបណ្តើរៗ និងជួនដោយគ្មានវិធានការត្រឹមត្រូវអមជាមួយទេ។
ផ្ទុយទៅវិញ នៅអឺរ៉ុប ស្ថានភាពកាន់តែធូរស្បើយជាលំដាប់ ចំនួនអ្នកចូលព្យាបាលកូវីដនិងស្លាប់ បានធ្លាក់ចុះជាគំហុក។ ជាមួយនឹងការបន្តលើកវិធានការបិទខ្ទប់ នៅចុងសប្តាហ៍នេះ គណៈកម្មការអឺរ៉ុប ត្រូវបង្ហាញអំពី អំពីគោលការណ៍និងលក្ខខណ្ឌរួម នៃដំណើរការបើកព្រំដែន (ព្រំដែនសហភាពអឺរ៉ុប) ដែលត្រូវធ្វើ ដោយសន្សឹមៗ បន្តិចម្តងៗ និងជាដោយផ្នែកៗ ចាប់ពីថ្ងៃទី១កក្កដា។ គឺជាការបើកព្រំដែនជាមួយប្រទេសដទៃខ្លះដែលមិនមែនជាស្ថិតក្នុងសហភាពអឺរ៉ុប និងដែលប្រទេសសមាជិកនីមួយៗជាអ្នកសម្រេចរៀងខ្លួនៗក្នុងស្មារតីសហការគ្នាជាមួយសមាជិកអឺរ៉ុបដូចគ្នា។ ក្រិកបានបង្ហើបថានឹងបើកព្រំដែនទទួលទេសចរចិន អូស្ត្រាលីនិងកូរ៉េខាងត្បូង។
អង់គ្លេសដែលជាប្រទេសរងគ្រោះស្លាប់ច្រើនជាងគេលំដាប់ពីរពិភពលោក កំពុងចាប់ពិចារណាផ្តើមបន្ធូរបន្ថយវិធានការបិទខ្ទប់ដែរ។ នាយករដ្ឋមន្ត្រី បានប្រកាសកាលពីម្សិលមិញលើកសរសើរសេវាសុខភិបាលប្រទេសដែលអាចគ្រប់គ្រងកូវីដបាននៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ