សហភាពអឺរ៉ុបចង់ចរចា ដោះស្រាយវិវាទជាមួយសម្ព័ន្ធមិត្ត អាមេរិក
នៅថ្ងៃ ចន្ទ និងថ្ងៃព្រហស្បតិ៍សប្តាហ៍នេះ ជាពេលវេលាដែលអឺរ៉ុបត្រូវជួបរដ្ឋមន្រ្តីការបរទេស និងរដ្ឋមន្រ្តីការពារអាមេរិក ដើម្បី ពិភាក្សាពីវិវាទរវាងភាគីសម្ព័ន្ធមិត្តទាំងពីរ។ ជម្លោះអាមេរិក ចិន ការប្រកាសដកកងទ័ពអាមេរិកពីប្រទេសអាល្លឺម៉ង់ ការផ្តាច់ជំនួយសម្រាប់អង្គការសុខភាពពិភពលោក ឬការគាំទ្ររបស់អាមេរិកសម្រាប់អ៊ីស្រាអែល ក្នុងរឿងកាត់យកដីរបស់ប្រជាជនប៉ាឡេស្ទីន។ ទាំងនេះសុទ្ធជាសំណុំរឿង ដែលភាគីអឺរ៉ុបចង់បានការបកស្រាយពីអាមេរិក របស់លោកដូណាល់ ត្រាំ។
ចុះផ្សាយនៅថ្ងៃ៖
ស្តាប់ - ០២:៣៣
នៅថ្ងៃចន្ទ កិច្ចប្រជុំតាមសន្និសីទវីដេអូ រវាងរដ្ឋមន្រ្តីការបរទេសអឺរ៉ុបនិង រដ្ឋមន្រ្តីការបរទេសអាមេរិក លោកMike Pompéo នឹងជាឱកាសឲ្យ អាមេរិក និងអឺរ៉ុបអាចពិនិត្យមើលឡើងពីទិសដៅរួម និងជំហរខ្វែងគំនិតគ្នារវាងភាគីទាំងពីរ។ អឺរ៉ុប ចង់បានការបកស្រាយពីអាមេរិកក្នុងរឿង ដែលអាមេរិកចាប់ឈ្លោះសាជាថ្មីជាមួយមហាអំណាចចិន និងរឿងដែលអាមេរិកចាត់វិធានការ ប្រឆាំងតុលាការព្រហ្មទណ្ឌអន្តរជាតិ ជាដើម។ តុលាការព្រហ្មទណ្ឌអន្តរជាតិ ដែលប្រកាសបើកការស៊ើបអង្កេតបឋមលើករណី ឧក្រិដ្ឋកម្មសង្រ្គាម របស់ទាហានអាមេរិកាំង នៅអាហ្វហ្កានីស្ថាន។
ការដកខ្លួនរបស់អាមេរិកពីស្ថាប័នអន្តរជាតិ ដូចជា អង្គការសុខភាពពិភពលោក នៅក្នុងកាលៈទេសៈ កើតជំងឺកូវីដ១៩ ក៏ដូចជាការដកកងទ័ពអាមេរិកចេញពីទឹកដីអាល្លឺម៉ង់។ ជំហរផ្ទុយស្រឡះ របស់ប្រធានាធិបតីអាមេរិក លោកដូណាល់ ត្រាំ នៅមួយរយៈកាលចុងក្រោយនេះបានធ្វើឲ្យអឺរ៉ុបរងរញ្ជួយ និងត្រូវពិចារណាយុទ្ធសាស្រ្តរបស់ខ្លួនឡើងវិញ។ នៅក្រោយលោកដូណាល់ ត្រាំ ប្រកាសដកកងទ័ពមួយចំនួនចេញពីប្រទេសអាល្លឺម៉ង់ អេស្ប៉ាញ និងអាល្លឺម៉ង់ចាប់ចោទសួរពីជំនឿទុកចិត្តលើសម្ព័ន្ធមិត្តអាមេរិក នៅក្នុងកិច្ចការពារ អឺរ៉ុប នៅចំពោះមុខការគំរាមកំហែងរបស់រុស្ស៊ី
ក្នុងជំនួបវីដេអូ នៅថ្ងៃព្រហស្បតិ៍ រដ្ឋមន្រ្តីការពារជាតិអាមេរិក ត្រូវអះអាងធានា រដ្ឋមន្រ្តីការពារជាតិរបស់អង្គការអូតង់ឲ្យបានធូរស្រាលចិត្ត។
សម្រាប់មន្រ្តីការទូតអឺរ៉ុបម្នាក់ដែលសុំមិនបញ្ចេញឈ្មោះ ការប្រកាសដកកងទ័ពអាមេរិក របស់លោកដូណាល់ ត្រាំ មិនមែនជារឿងគួរឲ្យភ្ញាក់ផ្អើលនោះទេ។ លោកដូណាល់ ត្រាំ ដែលគិតគូរតែពីការកាត់បន្ថយខ្ទង់ចំណាយ បានប្រកាសដកកងទ័ពអាមេរិកពីគ្រប់កន្លែង មិនថា នៅអាល្លឺម៉ង់ អ៊ីរ៉ាក់ អាហ្វហ្កានីស្ថាន។ ដោយផ្ទេរបន្ទុកទៅឲ្យអង្គការអូតង់ ប្រធានាធិបតី អាមេរិកបានទាមទារឲ្យប្រទេសនៅអឺរ៉ុប បង្កើនវិភាគទានសម្រាប់អូតង់ ដើម្បីសម្រាលបន្ទុករបស់អាមេរិក។ អាល្លឺម៉ង់បានយល់ព្រមបង្កើនប្រាក់វិភាគទានរបស់ខ្លួន ប៉ុន្តែ បដិសេធមិនជំនួស តួនាទី ការងាររបស់កងទ័ពអាមេរិកនោះទេ។
ទោះអឺរ៉ុប មិនសប្បាយចិត្តនឹងជំហរសោះអង្គើយ របស់សម្ព័ន្ធមិត្តអាមេរិក ប៉ុន្តែ អឺរ៉ុបមិនចង់ឈ្លោះ ដំឡើងសំឡេងជាមួយអាមេរិកដែរ។ អឺរ៉ុបនៅតែត្រូវការកម្លាំងយោធារបស់អាមេរិកដើម្បីជួយការពារ អឺរ៉ុបពីការគំរាមកំហែងរបស់រុស្ស៊ី។ អាមេរិកនៅតែមានឥទ្ធិពលលើតួកគី ដែលកំពុងដាក់ខ្លួនឈ្លោះជាមួយ ដណ្តើមផលប្រយោជន៍របស់អឺរ៉ុប នៅលីប៊ី និងនៅសមុទ្រមេឌីទែរ៉ាណេ។ ម្យ៉ាងទៀត ឈ្លោះប្រកែកគ្នាជាមួយអាមេរិកនឹងអាចធ្វើឲ្យអឺរ៉ុប ចាញ់ប្រៀប ស្ថិតក្រោមសម្ពាធរបស់មហាអំណាចចិន ដែលកំពុងពង្រីកឥទ្ធិពលរបស់ខ្លួន កាន់តែខ្លាំង នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ