ការសិក្សាអង់គ្លេស ៖ ថ្នាំ Dexamethasone អាចកាត់បន្ថយគ្រោះមរណៈរបស់អ្នកជំងឺកូវីដធ្ងន់ធ្ងរ
ចាប់ពីថ្ងៃអង្គារទី ១៦ មិថុនា២០២០ ទៅ ភ្នាក់ងារសុខាភិបាលអង់គ្លេស នឹងប្រើថ្នាំ dexamethasone ដេចហ្សាមេតាហ្សូន ក្នុងការព្យាបាលអ្នកជំងឺកូវីដ១៩ធ្ងន់ធ្ងរ។ លទ្ធផលនៃការសិក្សាដ៏ធំមួយបានបង្ហាញឱ្យឃើញថា ថ្នាំនេះមានប្រសិទ្ធភាពអាចកាត់បន្ថយអត្រាមរណៈរបស់អ្នកកើតជំងឺកូរ៉ូណាវីរុសថ្មី បានដល់ទៅមួយភាគបី។
ចុះផ្សាយនៅថ្ងៃ៖
ស្តាប់ - ០១:៥៥
Dexamethasone ដែលស្ថិតនៅក្នុងចង្កោមគ្រួសារថ្នាំSteroïde គឺជាថ្នាំទីមួយ ដែលជួយអ្នកជំងឺឱ្យបានរួចពីស្លាប់ដោយជំងឺកូវីដ១៩។ នេះបើតាមសេចក្តីថ្លែងការណ៍របស់អ្នកទទួលខុសត្រូវការសិក្សាសាកល្បងថ្នាំព្យាបាលកូវីដ១៩អង់គ្លេសRecovery លោកសាស្ត្រាចារ្យវេជ្ជបណ្ឌិត Stephen Powis ដែលបានសម្តែងក្តីរីករាយថា ពេលនេះពិភពលោកមានវិធីសាស្ត្រថ្មីក្នុងការព្យាបាលជំងឺកូវីដ។
បើតាមក្រុមអ្នកស្រាវជ្រាវនេះ អ្នកជំងឺធ្លាក់ខ្លួនឈឺធ្ងន់ ដល់ដំណាក់កាលដាក់ម៉ាស៊ីនជំនួយដង្ហើមម្នាក់ ក្នុងចំណោម៨នាក់បានរួចពីស្លាប់ ដោយសារបានទទួលថ្នាំ ដេចហ្សាមេតាហ្សូន។ តាមរយៈការព្យាបាលដោយថ្នាំ ដេចហ្សាមេតាហ្សូន ជាមូលដ្ឋាន អ្នកជំងឺដែលលែងមានសមត្ថភាពដកដង្ហើមដោយខ្លួនឯង មានឱកាសច្រើននឹងបានរស់រានជីវិត។
នៅក្នុងការសិក្សាសាកល្បង អត្រាមរណៈរបស់ក្រុមអ្នកជំងឺ (២១០៤នាក់) ដែលបានទទួលថ្នាំចាក់ឬថ្នាំលេបរយៈពេល១០ថ្ងៃ បានថយចុះអស់មួយភាគបី (ឬ៣៣%) បើប្រៀបទៅនឹងក្រុមអ្នកជំងឺ (៤៣២១នាក់) ដែលមិនបានទទួលថ្នាំដេសស្ហាមេតាហ្សូន។ ឯ អត្រាមរណៈរបស់អ្នកមានស្ថានភាពជំងឺមិនសូវធ្ងន់ បានថយចុះមួយភាគប្រាំ។ ប៉ុន្តែថ្នាំពុំហុចផលល្អចំពោះអ្នកជំងឺកូវីដ ដែលមិនត្រូវការជំនួយដង្ហើមទេ។
Dexamethasone ជាថ្នាំដែលមានតម្លៃសថោក មានលក់ទីផ្សារស្រាប់ និងអាចយកមកប្រើប្រាស់សម្រាប់ព្យាបាលជំងឺកូវីដបានភ្លាម សម្រាប់សង្គ្រោះជីវីតមនុស្សនៅលើផែនដី។ ពិភពអ្នកវេជ្ជសាស្ត្រស្គាល់ថ្នាំនេះច្បាស់ និងប្រើប្រាស់យ៉ាងទូលំទូលាយសម្រាប់ព្យាបាលអាការៈជារោគជាច្រើនព្រោះជាថ្នាំមានប្រសិទ្ធភាពខ្លាំងប្រឆាំងនឹងការរលាក។ ថ្នាំនេះក៏ត្រូវបានគ្រូពេទ្យខ្លះយកទៅប្រើប្រាស់ចំពោះអ្នកជំងឺមហារីក ដែលកំពុងទទួលការព្យាបាលដោយថ្នាំគីមី។
គ្រាន់តែលទ្ធផលនៃការសិក្សាចេញភ្លាម អង់គ្លេសបានប្រកាសចាត់ទុកថ្នាំដេចហ្សាមេតាហ្សូននេះ ជាថ្នាំស្តង់ដារសម្រាប់ព្យាបាលអ្នកជំងឺកូវីដ។ អង់គ្លេសមានថ្នាំនេះក្នុងស្តុក តាំងពីខែមីនា អាចប្រើភ្លាមសម្រាប់ព្យាបាលជំងឺចំនួន២០ម៉ឺនករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ