បារាំង៖លោកម៉ាក្រុងប្រារព្ធខួប ៨០ឆ្នាំនៃការអំពាវនាវរបស់ឧត្តមសេនីយដឺហ្គោប្រឆាំងនឹងអាល្លឺម៉ង់ណាហ្ស៊ី
នៅក្នុងប្រទេសបារាំង ថ្ងៃទី១៨ មិថុនា ឆ្នាំ ២០២០ ជាខួបគម្រប់ ៨០ឆ្នាំនៃការអំពាវនាវរបស់ឧត្តមសេនីយបារាំងដឺហ្គោក្នុងថ្ងៃទី១៨ មិថុនា ឆ្នាំ ១៩៤០ ឲ្យពលរដ្ឋបារាំងក្រោកឈរប្រឆាំងនឹងពួកអាល្លឺម៉ង់ណាហ្ស៊ី។ ការអំពាវនាវរបស់ឧត្តមសេនីយដឺហ្គោកាលពី ៨០ឆ្នាំមុនបានធ្វើឡើងតាមរយៈវិទ្យុ BBC ពីប្រទេសអង់គ្លេសដែលលោកបានភៀសខ្លួនជ្រកកោណ ខណៈដែលទីក្រុងប៉ារីសស្ថិតក្រោមការកាន់កាប់របស់អាល្លឺម៉ង់ណាហ្ស៊ី។ ប្រធានាធិបតីបារាំងលោកអេម៉ានុយអែល ម៉ាក្រុងបានចូលរួមរម្លឹកខួបមួយនេះនៅក្នុងប្រទេសបារាំង និងនៅក្នុងប្រទេសអង់គ្លេស។ នៅក្នុងទីក្រុងឡុងដ៏ លោកម៉ាក្រុងបានចូលរួមជាមួយរាទាយាទអង់គ្លេសព្រះអង្គម្ចាស់ឆាល។ ថ្លែងជាមួយព្រះអង្គម្ចាស់ឆាលនាឱកាសនោះ លោកម៉ាក្រុងបានរម្លឹកឡើងវិញពីការប្តេជ្ញាចិត្ត និងការតស៊ូស្វិតស្វាញរបស់ឧត្តមសេនីយដឺហ្គោនៅលើទឹកដីអង់គ្លេសក្នុងការរំដោះប្រទេសបារាំងពីកណ្តាប់ដៃអាល្លឺម៉ង់ណាហ្ស៊ី។ ទន្ទឹមគ្នានេះ លោកម៉ាក្រុងក៏មិនភ្លេចរម្លឹកពីគុណបំណាច់របស់ប្រទេសអង់គ្លេសដែលបានទទួលស្គាល់ឧត្តមសេនីយដឺហ្គោកាលណោះជាប្រេសិតស្របច្បាប់របស់ប្រទេសបារាំង។
ចុះផ្សាយនៅថ្ងៃ៖
ស្តាប់ - ០១:២៤
« ដឺហ្គោលពេលនោះជាមន្រ្តីយោធាបារាំងមួយរូបដែលជិតត្រូវរបប Vichy ដកស័ក្តិចេញ រឹបអូសយកទ្រព្យសម្បត្តិ និងដកសញ្ជាតិចេញពីគាត់។ ឧទ្ទាមក្នុងទីក្រុងរូបនេះលែងមានអ្វីៗទាំងអស់ តែតាមពិតទៅ ដឺហ្គោនៅមានអ្វីៗស្ទើរតែទាំងអស់។ ដោយមានជំនឿយ៉ាងមុតមាំមិនអាចចាញ់នៅក្នុងជោគវាសនានៃប្រទេសរបស់គាត់ និងដោយមានសេចក្តីទុកចិត្តនៅក្នុងជោគជ័យនៃក្រុមសម្ព័ន្ធមិត្តដែលមានរូបគាត់ជានិរទេសជនម្នាក់ ដឺហ្គោបាននាំជាមួយលោកនូវស្មារតីបារាំង។
ទៅដល់ទីក្រុងឡុងដ៏ ទឹកដីប្រទេសអង់គ្លេសក្នុងថ្ងៃទី១៧ មិថុនា ឆ្នាំ ១៩៤០ ដឺហ្គោលទទួលបានការគាំទ្រភ្លាមៗពីនាយករដ្ឋមន្រ្តីលោកចក ឈីល។ លោកចក ឈីល និងគ្រួសាររាជានិយមអង់គ្លេសបានផ្តល់សិទ្ធិជ្រកកោណឲ្យឧត្តមសេនីយដឺហ្គោល និងបានទទួលស្គាល់ដឺហ្គោលជាប្រេសិតស្របច្បាប់របស់ប្រទេសបារាំង។ ព្រះអង្គឆាលជាទីគោរព ពេលនោះ រាជានិយមអង់គ្លេសបានក្លាយជាទីជម្រករបស់សាធារណរដ្ឋបារាំង។ ពេលនោះ អង់គ្លេសបានសម្រេចចិត្តឲ្យបារាំងជ្រកកោណ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ