អង់គ្លេស៖ យុវជន២៥ឆ្នាំម្នាក់ ចាក់សម្លាប់មនុស្ស៣នាក់ និងរបួសច្រើននាក់ នៅសួនសាធារណៈ
ហេតុការណ៍ចាក់សម្លាប់មនុស្សនឹងកាំបិតមួយ បានកើតឡើងក្នុងប្រទេសអង់គ្លេស នៅសួនសាធារណៈក្នុងទីក្រុង Reading ភាគខាងលិចចំងាយ៦០គីឡូម៉ែត្រ ពីទីក្រុងឡុងដ៍។ មានមនុស្សយ៉ាងហោច៣នាក់បានស្លាប់ និងរបួសធ្ងន់ច្រើននាក់ផ្សេងទៀត។ ជនសង្ស័យ ភេទប្រុស អាយុ២៥ឆ្នាំ ត្រូវបាននគរបាលចាប់ឃាត់ខ្លួន ដោយពេលនេះ សមត្ថកិច្ចអង់គ្លេស នៅមិនទាន់ដឹង អំពីមូលហេតុពិតប្រាកដ ដែលជំរុញឲ្យជននេះ ធ្វើសកម្មភាពព្រៃផ្សៃនេះឡើយ។
ចុះផ្សាយនៅថ្ងៃ៖
ស្តាប់ - ០២:២៣
ល្ងាចថ្ងៃសៅរ៍ទី២០មិថុនា មានមនុស្សជាច្រើននាក់ បានមកអង្គុយជួបជុំគ្នា លំហែរស្រូបខ្យល់អាកាស និងទទួលពន្លឺព្រះអាទិត្យ ក្នុងសួន Forbury Gardens ក្នុងទីក្រុង Reading។ វេលាម៉ោង៧ល្ងាច ស្រាប់តែមានមនុស្សម្នាក់ ស្ទុះរត់ ដៃកាន់កាំបិត ចូលមកចាក់មនុស្សដែលកំពុងអង្គុយជួបជុំគ្នានៅតាមវាលស្មៅ។
សាក្សីម្នាក់ នៅកន្លែងកើតហេតុ បានប្រាប់ទូរទស្សន៍BBCថា ក្នុងពេលធ្វើសកម្មភាព ជនដៃដល់បានស្រែក តែខ្លួនមិនអាចស្តាប់យល់ថាជននោះ ស្រែកថាដូចម្តេចទេ។ ជនដៃដល់ បានចាក់មនុស្ស៣នាក់ នៅចំកពីក្រោយ និងចំក្រោមឃ្លៀក រួចហើយបន្តរត់ទៅចាក់អ្នកផ្សេងទៀត។ មនុស្សម្នា បានផ្អើលរត់ប្រសេចប្រសាចពេញសួនសាធារណៈ។ ជនដៃដល់បានរត់តាម និងបានចាក់មនុស្សឲ្យរបួសជាច្រើននាក់ទៀត។ មនុស្ស៣នាក់បានស្លាប់ នៅនឹងកន្លែង។ ចំណែកមនុស្ស៣នាក់ផ្សេងទៀត កំពុងស្ថិតក្នុងការសង្រ្គោះបន្ទាន់ នៅមន្ទីរពេទ្យ។
ជនសង្ស័យភេទប្រុសម្នាក់ អាយុ២៥ឆ្នាំ ត្រូវបានសមត្ថកិច្ចចាប់ឃាត់ខ្លួន និងចោទប្រកាន់ ពីបទមនុស្សឃាត។ យោងតាមប្រភពពីនគរបាលក្រុងReading ជនដៃដល់ គឺជាអ្នកកើតនិងរស់នៅក្នុងទីក្រុងនេះ។ កាលពីយប់ថ្ងៃសៅរ៍ លោក Ian Hunter មេនគរបាលក្រុង Reading បានលើកឡើងថា សម្រាប់ពេលនេះ ពុំមានធាតុផ្សំណាមួយ ដែលធ្វើឲ្យគេសង្ស័យថា អំពើនេះជាអំពើភេរវកម្មទេ។ តែយ៉ាងណា នគរបាលកំពុងធ្វើការជាមួយមន្ត្រីជំនាញផ្នែកភេរវកម្ម ដើម្បីស្វែងរកមូលហេតុពិតប្រាកដ ដែលជំរុញឲ្យជននេះ ធ្វើសកម្មភាពដ៏ព្រៃផ្សែនេះ។ ក៏ប៉ុន្តែ នៅព្រឹកថ្ងៃអាទិត្យទី២១មិថុនា នគរបាលក្រុងReading បានចេញលិខិតប្រកាសថា ដោយបានពិនិត្យល្អិតល្អន់ ហេតុការណ៍នេះ ត្រូវបានសមត្ថកិច្ចជំនាញចាត់ទុកថា មានលក្ខណជាអំពើភេរវកម្ម។
សូមបញ្ជាក់ថា ហេតុការណ៍នេះ បានបង្កឲ្យមានការតក់ស្លុតជាខ្លាំង នៅប្រទេសអង់គ្លេស។ លោកបូរីស ចនសុន នាយករដ្ឋមន្ត្រីអង់គ្លេស បានសរសេរសារ នៅលើទំព័រ Twitter ចូលរួមរំលែកទុក្ខ ដល់ក្រុមគ្រួសារជនរងគ្រោះ និងអរគុណ ចំពោះក្រុមសង្រ្គោះបន្ទាន់។
គួរបញ្ជាក់ដែរ ថាក្នុងសួនសាធារណៈដែលកើតហេតុនេះ គឺនៅពេលរសៀលមានការជួបជុំគ្នាធ្វើបាតុកម្ម ប្រឆាំងនឹងការរើសអើងប្រកាន់ពូជសាសន៍ទៅលើជនស្បែកខ្មៅ។ តែបាតុករបានរំសាយគ្នាចេញទៅអស់ នៅសល់តែអ្នកដែលមកសម្រាកលំហែរតែប៉ុណ្ណោះ មុននឹងជនដៃដល់បានធ្វើសកម្មភាពចាក់ដោយកាំបិត។ នេះបើផ្អែកតាមការអះអាង របស់អ្នកសម្របសម្រួលបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ