ខឹងនឹងតួកគី បារាំងដកខ្លួនពីប្រតិបត្តិការរបស់អូតង់ នៅសមុទ្រមេឌីទែរ៉ាណេ
ការខឹងសម្បារ និងថ្នាំងថ្នាក់ចិត្តរបស់បារាំង ទៅលើរដ្ឋាភិបាលតួកគី បានរីករាលដាលទៅដល់សម្ព័ន្ធអាត្លង់ទិក អូតង់។ កាលពីថ្ងៃពុធ ក្រសួងការពារជាតិបារាំង បានបញ្ជាក់ ថាបារាំង នឹងផ្អាកមួយរយៈ ការចូលរួមរបស់បារាំង ក្នុងប្រតិបត្តិការរបស់អង្គការអូតង់ នៅសមុទ្រមេឌីទែរ៉ាណេ។ នៅក្នុងសវនាការសួរដេញដោលរបស់គណៈកម្មការបរទេស និងការពារជាតិរបស់ព្រឹទ្ធសភាបារាំង ឯកអគ្គរដ្ឋទូតតួកគី ប្រចាំប្រទេសបារាំងបាននិយាយថា រដ្ឋាភិបាលបារាំង មិនសប្បាយចិត្តនឹងអូតង់ ដែលមិនព្រមដាក់ទោសតួកគី នៅក្នុងរឿងប៉ះទង្គិចគ្នារវាងកប៉ាល់តួកគី និងកប៉ាល់បារាំង កាលពីដើមខែមិថុនាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ដោយដកខ្លួនចេញមួយរយៈ ពីប្រតិបត្តិការយាមសមុទ្រមេឌីទែរ៉ាណេ របស់អង្គការអូតង់ ទីក្រុងប៉ារីស ចង់បានការបកស្រាយបំភ្លឺ របស់សម្ព័ន្ធអាត្លង់ទិក អូតង់ ទាក់ទងនឹងការគោរពបម្រាមលក់ដឹកអាវុធចូលទឹកដីលីប៊ី។
កាលពីខែមិថុនា បារាំង បានប្តឹងទៅអង្គការអូតង់ ឲ្យចាត់ការតួកគី ដែលបារាំងចោទប្រកាន់ថា មានជំហរអរិភាព និងរំខានកិច្ចប្រឹងប្រែងរបស់បារាំង ក្នុងការអនុវត្ត បម្រាមរបស់អង្គការសហប្រជាជាតិ ក្នុងការលក់ដឹកអាវុធទៅប្រទេសលីប៊ី។ តាមក្រសួងការពារជាតិបារាំង នៅថ្ងៃទី១០មិថុនា នៅពេលកប៉ាល់បារាំង កំពុងតាមដានកប៉ាល់តួកគី ដែលគេសង្ស័យថា មានលួចលាក់ដឹកអាវុធទៅលីប៊ី កប៉ាល់ចម្បាំង តួកគី បានលេចមុខអន្តរាគម និងបានបែរកាណុងគំរាមកប៉ាល់ល្បាតរបស់បារាំង។
នៅពាក់កណ្តាលខែមិថុនា សម្ព័ន្ធអាត្លង់ទិកអូតង់បានបើកការស៊ើបអង្កេត តាមការចោទប្រកាន់របស់បារាំង ដែលតួកគីបានបដិសេធ ដាច់អហង្កា។ តាមឯកអគ្គរដ្ឋទូតតួកគីប្រចាំទីក្រុងប៉ារីស រដ្ឋាភិបាលបារាំង ដកខ្លួន ពីប្រតិបត្តិការយាមសមុទ្រ របស់អង្គការអូតង់ ក៏ដោយសារថា ការស៊ើបអង្កេត របស់អូតង់មិនបានផ្តល់លទ្ធផលដូច ការចោទប្រកាន់របស់បារាំង។
បារាំង និងតួកគី ដែលជាសមាជិកដូចគ្នារបស់អូតង់ បានចាប់ផ្តើមដំឡើងសំឡេងដាក់គ្នា ដោយសារតែវិបត្តិនៅ លីបី ជាទី បារាំង និងតួកគី ការពារ ភាគីជម្លោះ រៀងៗខ្លួន។ តួកគីបានបញ្ជូនកងទ័ព ទៅជួយរដ្ឋាភិបាលក្រុងទ្រីប៉ូលី ដែលជាសត្រូវរបស់សេនាប្រមុខ ហាហ្វតា គាំទ្រដោយទីក្រុងប៉ារីស។ នៅក្នុងដំណើរទៅប្រទេសអាល្លឺម៉ង់ កាលពីថ្ងៃចន្ទ ប្រធានាធិបតី បារាំងបានទាមទារឲ្យតួកគី បញ្ជាក់ច្បាស់ពីជំហរនយោបាយរបស់តួកគី ដែលបើតាមប្រមុខរដ្ឋបារាំង កំពុងគំរាមកំហែងអាហ្វ្រិក និងអឺរ៉ុប។ តាមប្រធានាធិបតីបារាំង តួកគីដែលតាំងខ្លួនជាសមាជិករបស់អូតង់ បានបង្កើន វត្តមានទ័ពកាន់តែច្រើននៅលីប៊ី និងដឹកនាំយកទាហានជីហាតពីស៊ីរី ទៅប្រយុទ្ធនៅលីប៊ី។
ក្រៅពីសំណុំរឿងលីប៊ី ទំនាក់ទំនងបារាំង និងតួកគី កាន់តែធ្លាក់ចុះអាក្រក់ ដោយសារសកម្មភាពខួងបូមប្រេងរបស់តួកគី នៅសមុទ្រមេឌីទែរ៉ាណេ និងការដែលតួកគីទិញមីស៊ីលពីរុស្ស៊ី នោះបើទោះជាតួកគីជាសមាជិករបស់អូតង់ក៏ដោយ។
នៅក្នុងសវនាការសួរដេញដោល របស់គណៈកម្មការទទួលកិច្ចការបរទេស និងកងទ័ព នៅព្រឹទ្ធិសភាបារាំង ឯកអគ្គរដ្ឋទូតតួកគីប្រចាំក្រុងប៉ារីសបានលើកឡើងពីទម្ងន់របស់តួកគីទាំងផ្នែក យោធា និងនយោបាយ។ គ្មានតួកគី នោះគេមិនអាចដោះស្រាយសំណុំរឿងអ៊ីរ៉ាក់ ស៊ីរី លីប៊ី អេហ្ស៊ីប បាននោះទេ។ សម្រាប់អ្នកតំណាងតួកគី អូតង់ គ្មានតួកគី នោះក៏គ្មានដែរ អង្គការអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ