តុលាការបារាំងបើកសវនាការ កាត់ទោសអតីតមន្ត្រីស៊ើបការណ៍២នាក់ រឿងលក់ព័ត៌មានសម្ងាត់ឲ្យចិន
នៅថ្ងៃចន្ទទី៦កក្កដា តុលាការពិសេសក្រុងប៉ារីស បានបើកសវនាការ ដើម្បីជំនំជំរះ សំណុំរឿងពាក់ព័ន្ធនឹងអតីតមន្ត្រីស៊ើបការណ៍សម្ងាត់របស់បារាំង២នាក់ ដែលគេសង្ស័យថា បានធ្វើសកម្មភាព បម្រើផលប្រយោជន៍ឲ្យមហាអំណាចបរទេស គឺប្រទេសចិន។ ដោយសំណុំរឿងនេះ មានពាក់ព័ន្ធនឹងការសម្ងាត់ការពារជាតិបារាំង សវនាកា ត្រូវបានធ្វើទៅដោយបិទទ្វារជិត។ ជនទាំង២នាក់ អាចប្រឈមនឹងទោស ជាប់ពន្ធនាគាររយៈពេល១៥ឆ្នាំ។
ចុះផ្សាយនៅថ្ងៃ៖
ស្តាប់ - ០២:៣៦
ចាប់ខ្លួនកាលពីខែធ្នូ ឆ្នាំ២០១៧ អតីតមន្ត្រីស៊ើបការណ៍ទាំង២នាក់ របស់អគ្គនាយកដ្ឋានសន្តិសុខក្រៅប្រទេសបារាំង ត្រូវប្រឈមនឹងអង្គជំនំជំរះ នៅតុលាការព្រហ្មទណ្ឌពិសេសក្រុងប៉ារីស។ ជនសង្ស័យទាំង២នាក់ ជាប់ជាប់ចោទ ពីបទ « ផ្តល់ព័ត៌មានសំងាត់របស់ជាតិ ទៅឲ្យមហាអំណាចបរទេស » បទ « បំពាននឹងផលប្រយោជន៍គ្រិះរបស់ជាតិឯង » និងបទ « ចូលដៃស៊ើបការសម្ងាត់ជាមួយមហាអំណាចបរទេស »។ គ្មានការបញ្ជាក់ជាផ្លូវការណាមួយ ថាមហាអំណាចបរទេសនោះ ជាប្រទេសណានោះទេ។ តែយោងតាមធាតុផ្សំជាច្រើន បណ្តាញព័ត៌មានបារាំងអះអាងថា គឺជាប្រទេសចិន។
ជនទីមួយឈ្មោះ Henri M. ត្រូវបានអគ្គនាយកដ្ឋានសន្តិសុខក្រៅប្រទេស (DGSE) បញ្ជូនឲ្យទៅបំពេញបេសកកម្មក្នុងប្រទេសចិន នៅឆ្នាំ១៩៩៧ ដោយមានមុខតំណែង ជាលេខាទី២ ប្រចាំទូតបារាំងនៅប៉េកាំង។ តែធ្វើការបានតែ១ឆ្នាំ ជននេះ ត្រូវគេបញ្ជូនត្រលប់មកវិញ បន្ទាប់ពីគេបានរកឃើញថា មានទំនាក់ទំនងស្នេហាលួចលាក់ ជាមួយស្ត្រីជនជាតិចិន ជាអ្នកបកប្រែប្រចាំស្ថានទូត។ ក្រោយមកនៅឆ្នាំ២០០៣ ជននេះបានចូលនិវត្តន៍ ហើយបានរៀបការជាមួយស្ត្រីនោះ និងបានទៅរស់នៅលើកោះហៃណាន។
ចំណែកជនទី២ ឈ្មោះ Pierre Marie H. មិនធ្លាប់ទៅបំពេញបេសកកម្មនៅបរទេសទេ តែធ្លាប់ជាមន្ត្រីជំនាញស៊ើបការណ៍សម្ងាត់ និងជាអ្នកឃ្លាំតាមដានអង្គការធំៗ ដូចជាសហជីពជាដើម។ ជននេះត្រូវបានគេចាប់ខ្លួន នៅព្រលានយន្តហោះក្រុងហ្សុយរិចប្រទេសស្វ៊ីស ជាមួយក្រដាសប្រាក់យ៉ាងសន្ធឹកសន្ធាប់ បន្ទាប់ពីត្រលប់មកពីជួប ជាមួយមេខ្យល់ជនជាតិចិនម្នាក់ នៅលើកោះមួយក្នុងមហាសមុទ្រឥណ្ឌា។ ភរិយារបស់ជននេះ ក៏ត្រូវបានតុលាការចោទប្រកាន់ដែរ ពីបទទទួលផល ពីសកម្មភាពលក់ព័ត៌មានសម្ងាត់ ឲ្យទៅមហាអំណាចបរទេស។
រហូតមកទល់ពេលនេះ គេមិនដឹងថាជនជាប់ចោទ ដែលជាអតីមន្ត្រីស៊ើបការណ៍សម្ងាត់បារាំងទាំង២នាក់នេះ មានអ្វីពាក់ព័ន្ធនឹងគ្នានោះទេ។ តែយ៉ាងណា ប្រភពច្បាស់ការបញ្ជាក់ថា ជនទាំង២នាក់ ត្រូវបានសមត្ថកិច្ច តាមដានឃ្លាំមើលអស់ជាច្រើនខែ មុននឹងឈានទៅដល់ការចាប់ខ្លួន នៅចុងឆ្នាំ២០១៧។
លោកស្រី Florence Parly រដ្ឋមន្ត្រីក្រសួងការពារជាតិបារាំង បានលើកឡើងថា ជនទាំង២នាក់នេះ ត្រូវគេសង្ស័យថា បានធ្វើអំពើល្មើស ដែលមានកម្រិតធ្ងន់ធ្ងរបំផុត ហើយអាចចាត់ទុកថា ជាអំពើក្បត់ជាតិ។ ក្រសួងការពារជាតិបារាំង បានបញ្ជាក់ផងដែរថា គឺអគ្គនាយកដ្ឋានសន្តិសុខក្រៅប្រទេសខ្លួនឯង ដែលបានរកឃើញបញ្ហានេះ ហើយបានប្តឹងទៅស្ថាប័នអយ្យកាក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ