បារាំងផ្លាស់ប្តូរក្បាលម៉ាស៊ីនដឹកនាំ ដើម្បីទប់ទល់នឹងកូវីដ១៩ និងស្តារប្រិយភាពប្រមុខរដ្ឋ
ចុះផ្សាយនៅថ្ងៃ៖
ស្តាប់ - ០៧:០០
ថ្ងៃទី៧កក្កដា ក្រោយរដ្ឋាភិបាលបារាំង ប្រកាសពីសមាសភាពសមាជិករដ្ឋាភិបាលថ្មី ហើយនាយករដ្ឋមន្ត្រីថ្មី និងសមាជិករដ្ឋាភិបាលថ្មី ប្រមាណ៣០នាក់ បានជួបប្រជុំគ្នាជាគណៈរដ្ឋមន្ត្រីលើកដំបូង នៅវិមានប្រធានាធិបតី អេលីហ្ស។ តើសមាជិករដ្ឋាភិបាលបារាំង មានការផ្លាស់ប្តូរអ្វីខ្លះ? កិច្ចការកំណែទម្រង់រដ្ឋាភិបាលថ្មី នឹងត្រូវផ្តោតលើវិស័យណាជាអាទិភាព? ហើយថាតើការផ្លាស់ប្តូរសមាជិករដ្ឋភិបាលបារាំងពេលនេះ អាចជួយស្រោចស្រង់ប្រជាប្រិយភាពរបស់ប្រធានាធិបតីវ័យក្មេង លោក អេម៉ានុយអែល ម៉ាក្រុង បានកម្រិតណា?
តើសមាសភាពសមាជិករដ្ឋាភិបាលថ្មី មានអ្វីគួរឱ្យចាប់អារម្មណ៍ខ្លាំង?
បីចំណុច គួរឱ្យទាក់ភ្នែក។ ទី១ រដ្ឋាភិបាលបារាំងថ្មីនេះ មានភាគច្រើនជាអ្នកនយោបាយ ជាជនស្តាំនិយម ឧទាហរណ៍ រដ្ឋមន្ត្រីសេដ្ឋកិច្ច និងរដ្ឋមន្ត្រីអប់រំ ហើយរដ្ឋមន្ត្រីខ្លះទៀត ជាមនុស្សស្និទនឹងអតីតប្រធានាធិបតី នីកូឡា សាក់កូហ្ស៊ី។ ជាក់ស្តែង នាយករដ្ឋមន្ត្រីបារាំងថ្មី លោក ហ្សង់ កាស្តិច ផ្ទាល់តែម្តង ហើយមាន រដ្ឋមន្ត្រីក្រសួងមហាផ្ទៃ រដ្ឋមន្ត្រីវប្បធម៌ ជាអតីតសហការី និងក៏ជាមនុស្សជំនិតនឹងអតីតប្រធានាធិបតី នីកូឡា សាក់កូហ្ស៊ី ដែរ។
ចំណុចទី២ គឺការផ្ទេររដ្ឋមន្ត្រីខាងគ្រប់គ្រងហិរញ្ញវត្ថុសាធារណៈ លោក Gérald Darmanin ឱ្យទៅកាន់ការជារដ្ឋមន្ត្រីក្រសួងមហាផ្ទៃ។ លោកនេះ ត្រូវគេចោទពីការត្បិតត្បៀតថវិកា ហើយនិងត្រូវធ្លាប់ស្រីៗប្តឹងពីបទបំពារបំពានភេទផង។ អ្នកខ្លះធ្លោយមាត់ថា ស្រីៗនឹងទៅធ្វើបាតុកម្មមុខក្រសួងមហាផ្ទៃញឹកញយហើយ។
ចំណុចទី៣ដែលនាំឱ្យមានការជជែកសួរគ្នាច្រើននោះ គឺការតែងតែងមេធាវីមាត់ឆៅ លោក Éric Dupond-Moretti ជារដ្ឋមន្ត្រីក្រសួងយុត្តិធម៌។ មេធាវីឯកទេសព្រហ្មទណ្ឌរូបនេះ ដែលធ្លាប់តែរិះគន់ប្រព័ន្ធយុត្តិធម៌បារាំង និងវាយសំពងមិនសំចៃមាត់ ទៅលើក្រុមរដ្ឋអាជ្ញា ហើយលោកស្ទើរតែក្លាយទៅជាសត្រូវប្រឆាំងនឹងអយ្យការទៅហើយ បែរជាត្រូវតែងតាំងជារដ្ឋមន្ត្រីក្រសួងយុត្តិធម៌ទៅវិញ។ យ៉ាងណាក៏ដោយ មនុស្សច្រើនគ្នា គិតថា មេធាវី Éric Dupond-Moretti ជាជនដែលឈរលើសច្ចយុត្តិធម៌ ការពារសិទ្ធមនុស្សតែជាប់រហូត៤០សិបឆ្នាំហើយ លោកនឹងបំពេញតួនាទីជារដ្ឋមន្ត្រីដែលការពារប្រយោជន៍នៃយុត្តិធម៌របស់ពលរដ្ឋនិងរដ្ឋបារាំង។
ចំណុចបន្ទាប់បន្សំ តែទំនងជាចាប់អារម្មណ៍សម្រាប់ខ្មែរយើង គឺថា រដ្ឋាភិបាលបារាំងថ្មី មានការបែងចែកចំនួនកូតារដ្ឋមន្ត្រី ទៅតាមសមភាពយេនឌ័រ ស្ត្រីនិងបុរស យ៉ាងស្មើគ្មា។ ក្នុងចំណោមក្រសួង ដែលមានត្រឹមតែ១៦ គឺមានរដ្ឋមន្ត្រី ភេទស្រី ចំនួន៨នាក់ ស្មើនឹងរដ្ឋមន្ត្រីប្រុសដែរ ហើយថែមទាំងមានរដ្ឋមន្ត្រីអមនិងរដ្ឋលេខាធិការ ជានារីច្រើននាក់ទៀត។
ក្នុងដំណាក់កាលនៃការទប់ទល់នឹងជំងឺកូវីដ១៩ រដ្ឋាភិបាលបារាំងថ្មី ដែលផ្លាស់ប្តូរពាក់កណ្តាលអាណត្តិបែបនេះទៀត គឺច្បាស់ជាត្រូវមានកិច្ចការធ្វើច្រើនណាស់ហើយ?
ការងារចំពោះមុខ មុនគេ គឺទប់ទល់នឹងកូវីដ១៩។ លោកប្រធានាធិបតីបារាំងសន្យាសម្រេចផ្តល់លុយ ចន្លោះពី១៥ ទៅ២០ពាន់លានអឺរ៉ូ សម្រាប់ការវិនិយោគសាងសងអគារមន្ទីរពេទ្យ រៀបចំគ្រឿងបរិក្ខារពេទ្យ និងធ្វើទំនើបកម្មមន្ទីរសង្គ្រោះ។ ចំណែកលោក ហ្សង់ កាស្តិច គ្រាន់តែចូលកាន់តំណែងនាយករដ្ឋមន្ត្រីថ្មី ភ្លាម លោកបានសម្រេចថែមលុយ១.១ពាន់លានអឺរ៉ុបបន្ថែម ដើម្បីបង្គ្រប់ចំនួន ៧.៥ពាន់លានអឺរ៉ុប ជាកញ្ចប់ថវិកាសម្រាប់រដ្ឋមន្ត្រីសុខាភិបាល យកទៅចរចាជាមួយសហជីពវិស័យសុខាភិបាល និងសម្រាប់បើកប្រាក់ខែបន្ថែមដល់បុគ្គលិកសុខាភិបាល។ នៅថ្ងៃអាទិត្យនេះ នាយករដ្ឋមន្ត្រីថ្មី នឹងចុះសកម្មភាពដំបូង ទៅ Guyane ជាដែនដីឯនាយសមុទ្ររបស់បារាំង ដែលពេលនេះកំពុងរងគ្រោះខ្លាំងដោយសារជំងឺកូវីដ១៩។ នៅហ្គុយយ៉ាន់ មានអ្នកឆ្លងកូវីដ ជាង៥ពាន់នាក់ និងស្លាប់ជាង២០នាក់ហើយ។
ក្រៅពីសំណុំរឿងសុខភាព រដ្ឋាភិបាលបារាំងថ្មី ត្រូវញាប់ដៃញាប់ជើង ក្នុងសំណុំរឿងក្តៅៗជាច្រើនទៀត ដូចជា ការបង្កើនសន្ទុះនិងកសាងស្តារសេដ្ឋកិច្ចឡើងវិញ ដែលបង្ខូចដោយកូវីដ, សំណុំរឿងបរិស្ថានអាកាសធាតុ, កិច្ចការអប់រំ ជាដើម។ ចំណែកវិស័យយុត្តិធម៌វិញ នាយករដ្ឋមន្ត្រីសន្យាបង្កើនចំនួនកញ្ចប់ថវិកាសម្រាប់ក្រសួងយុត្តិធម៌ ដើម្បីបម្រើសេវាសាធារណៈផ្នែកយុត្តិធម៌សង្គម ឱ្យបានកាន់តែល្អជាងមុនថែមទៀត។ ផ្នែកសង្គមកិច្ច លោក ហ្សង់ កាស្តិច ក៏អះអាងថានឹងកែទម្រង់វិស័យធានារ៉ាប់រងសម្រាប់អ្នកអត់ការងារធ្វើ ទៀតផង។
កំណែទម្រង់សមាសភាពរដ្ឋាភិបាលបារាំង នៅពេលនេះ តើវាយឺតពេលឬទេ? ហើយតើវាអាចជួយស្រោចស្រង់ប្រជាប្រិយភាពរបស់ប្រធានាធិបតីបារាំង លោក ម៉ាក្រុង បានដែរឬទេ?
បើផ្អែកតាមអ្នកវិភាគនយោបាយបារាំងជាច្រើន គេយល់ថា ការដោះដូរសមាជិករដ្ឋាភិបាលបារាំង ពេលនេះ ជាសន្ទុះចុងក្រោយហើយសម្រាប់ប្រធានាធិបតី ម៉ាក្រុង។ ដ្បិតថា លោកបាក់មុខខ្លាំងសម្បើមក្នុងសំណុំរឿងបាតុកម្មនៃក្រុមអាវកាក់លឿង បន្ទាប់មក បញ្ហាកូវីដ នេះទៀត ដែលបញ្ហានីមួយៗសុទ្ធតែអូសបន្លាយរាប់ខែ និងប៉ះពាល់ដល់សេដ្ឋកិច្ចនិងសង្គមជាតិខ្លាំងមែនទែន។ ចំណែក ការបោះឆ្នោតឃុំសង្កាត់ ទៀតសោត គឺឈ្នះសំឡេងមេឃុំច្រើន បានទៅខាងក្រុមគណៈបក្សបរិស្ថាននិយម និងក្រុមអ្នកសាធារណរដ្ឋនិយម ទៅទៀត។ ហេតុនេះ អ្នកជំនាញវិទ្យាសាស្ត្រនយោបាយ ប្រមើលមើលថា លោក ម៉ាក្រុង គឺហាក់ត្រូវជួបលំបាកខ្លាំងណាស់ ក្នុងការស្តារកិត្តិនាម ដើម្បីប្រកួតប្រជែងការបោះឆ្នោតប្រធានាធិបតីអាណត្តិថ្មី ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ